Jet munlawomal kobꞌa yinh ismunil Komam Dios
3
Hex wuxhtaj,
hex wanabꞌ,
hayet kinekꞌan texol,
mach kintzotelan teyet hakaꞌ tet mak kaw yijem tet Komam Espíritu Santo.
Wal xin kintzotelan teyet hakaꞌ tet anma yet yul sat yibꞌanhqꞌinal tiꞌ,
yebꞌ hakaꞌ mak uninto yinh yet Komam Dios.
2 Yuxin yet inkuywahan texol kaw komonnhe yu intzotelan teyet,
yuto hakaꞌto ye nixhte unin chitotxutxwi,
maxhto chu yaqꞌlax itah tet,
hak tuꞌ heyehi.
Hakto tuꞌ xin heyepaxo tinanh,
3 yuto hakaꞌ istxumni anma yet yul sat yibꞌanhqꞌinal tiꞌ,
hakto tuꞌ hetxumni,
yuto chichiwako hekꞌul teyinh hunun hex,
ay howal texol yebꞌ pohlebꞌahil.
Chal yelapno tuꞌ to haꞌ tzet chal heyanma haꞌ cheyije.
Chebꞌeybꞌalnhenpaxo hakaꞌ tzet chiswatxꞌe anma maxhto ayoko yul isqꞌabꞌ Komam.
4 Yuto texol hex tiꞌ ay hex cheyala:
«Hanhonhtiꞌanh yinta juxhta Pablo ayonhikojanh.»
Ay hex cheyalpaxoj:
«Hanhonhtiꞌanh yinta juxhta Apolos ayonhikojanh,»
kexchi.
Yet cheyalni hakaꞌ tuꞌ to hakaꞌto anma yet yul sat yibꞌanhqꞌinal tiꞌ,
hak tuꞌ hetxumni.
5 ¿Tzet yelapno wehan hanin Pablo intiꞌan?
yebꞌ ¿tzet yelapno ye juxhta Apolos tuꞌ?
Wal xin ischejabꞌnhe Komam Dios jehanh,
chejbꞌilonhikojanh texol yu Komam yunhe heyaniko heyanma yinh Komam Jesucristo.
Haꞌ munil yakaniko Komam yul koqꞌabꞌanh hununonhanh haꞌ chikowatxꞌehanh.
6 Yet wekꞌan texol hakaꞌtanhe haninan intzꞌunan hunu tzꞌunubꞌ texol.a
Haxa yet yekꞌ yaꞌ Apolos texol xin hakaꞌtanhe haꞌ yaꞌ ekꞌ hayenoj.
Yajaꞌ yinh kaw yeli,
haꞌ Komam Dios chiꞌaqꞌni chꞌibꞌo huneꞌ tzꞌunubꞌ tuꞌ.
7 Yuxin haꞌ naj chitzꞌunni yebꞌ naj chihayeni machi yelapno ebꞌnaj,
kachannhe Komam Dios kaw aykano yelapno yehi,
yuto haꞌ Komam chiꞌaqꞌni chꞌibꞌo huneꞌ tzꞌunubꞌ tuꞌ.
8 Yuxin naj chitzꞌunni hunu hinhat yebꞌ naj chihayeni lahan ismunil ebꞌnaj,
chischah ebꞌnaj ispaj selel ismunil tuꞌ tet Komam Dios hatatikꞌa hanta munil chiswatxꞌe hunun ebꞌnaj.
9 Hanhonhtiꞌanh jet munlawomal kobꞌahanh yinh ismunil Komam Dios,
wal hex tiꞌ xin hakaꞌ istzꞌunubꞌ Komam Dios heyehi.
Lahan hexpaxo hakaꞌ hunu nha lanhan iswatxꞌenkanh Komam Dios.
10 Haxa hanintiꞌan xin,
lahan hinan hakaꞌ hunu naj ijbꞌalom yinh watxꞌe nha yu iskꞌulal Komam Dios.
Hakojtam haninan wayojan isxeꞌal huneꞌ nha tuꞌ,
nanxa huneꞌ naj xin chiꞌanikanh islokꞌal.
Yajaꞌ hunun mak chimunla yinh huneꞌ nha tuꞌ yilal kam chil yinh tzet chu ismunlahi.
11 Wal xin machi hunuxa mak chu yanayo hunuxa isxeꞌal nha yibꞌanh huneꞌ ayxayo tuꞌ,
yuto haꞌ huneꞌ ayxayo tuꞌ haꞌ ton Komam Jesucristo.
12 Yibꞌanh huneꞌ xeꞌal nha tuꞌ xin,
ay mak chiꞌaniko chꞌen oro,
maka chꞌen plata,
maka chꞌen chꞌen kaw kꞌulchꞌan jilni isxihaloj.
Aypaxo mak chiꞌaniko te teꞌ,
maka teꞌ chꞌim,
maka xaj waleꞌ yichoj.
13 Yajaꞌ yet islahobꞌal tzꞌayik yet chiꞌil-lax tzet chiꞌeliko anma,
kat yilwelax komunil hununonh xol qꞌa qꞌaꞌ,
yunhe yil-laxi ta kꞌul maka mach kꞌulo tzet chikowatxꞌe.
14 Yuxin haꞌ mak kaw kꞌul ismunil iswatxꞌe,
machi tzꞌato tzet iswatxꞌe tuꞌ yu qꞌa qꞌaꞌ.
Haꞌ mak hakaꞌ tuꞌ chischah ispaj selel ismunil.
15 Yajaꞌ wal mak mach kꞌulo ismunil chiswatxꞌe,
chitzꞌato ismunil tuꞌ xol qꞌa qꞌaꞌ,
chikꞌaywa huneꞌ mak tuꞌ yinh ismunil.
Waxanhka xin chikolchahi,
yajaꞌ hakaꞌxanhe iskol-laxilti hunu anma xol qꞌa qꞌaꞌ,
hak tuꞌ chu iskolchahi.
16 ¿Tom mach heyohtajo xin tato Yatut Komam Dios heyehi yebꞌ ayko Komam Espíritu Santo teyinh?
17 Yuxin mak chitanhtzenilo Yatut Komam tuꞌ,
chistanhtzelo Komam huneꞌ mak tuꞌ,
yuto hanhkꞌanhe Komam ay yet huneꞌ nha tuꞌ.
Huneꞌ Yatut Komam Dios chiwaltiꞌan,
haꞌ ton hex hex tiꞌ.
18 Mach cheyute hebꞌa sukal,
tato ay hunu mak texol kaw helan yinh tzet ay yul sat yibꞌanhqꞌinal tiꞌ chabꞌe,
yutehojabꞌ isbꞌa hakaꞌ hunu mak matzet yohtaj haxinwal kaw helan chiꞌelkanikoj.
19 Yuto haꞌ ishelanil anma yul sat yibꞌanhqꞌinal tiꞌ,
kaw matzet chalilo yul sat Komam Dios.
Hak tuꞌ yalni Istzotiꞌ Komam bꞌay chal hakaꞌ tiꞌ:
«Haꞌ mak kaw ay ishelanil yalni,
yinhtikꞌa ishelanil tuꞌ chitzabꞌchati yu Komam,»
xhihayoj.
20 Chalnipaxoj:
«Yohta Komam Dios tato matzet chal yelapno yitzꞌatil iswiꞌ anma kaw helan yalni,»
xhihayoj.
21 Yuxin mach chubꞌ heloloꞌnhen hebꞌa yu tzujan hex yinta hunu maka,
yuto sunil aqꞌbꞌilxa teyet yu Komam Dios.
22 Hakaꞌ hanin Pablo intiꞌan yebꞌ juxhta Apolos,
yebꞌ juxhta Pedro,
haꞌ Komam Dios konhanikojanh chejabꞌo texol,
hakaꞌojtam heyet jehanh.
Hakaꞌpaxo yul sat yibꞌanhqꞌinal tiꞌ,
yebꞌ qꞌinale,
yebꞌ kamikal,
yebꞌ tzet ay tinanh,
yebꞌ tzettaj chitohuli,
heyet ye sunil tuꞌ.
23 Haxa hex tiꞌ xin,
yet Komam Cristo heyehi,
Komam Cristo tuꞌ xin yet Komam Dios yehi.