Iskamikal Komam Jesucristo yinh kulus haꞌ yalikꞌo yaꞌ Pablo
2
Hex wuxhtaj,
hex wanabꞌ,
yet kinbꞌeyan walnojan Istzotiꞌ Komam Dios yinh Komam Jesucristo texol,
maxhtaj ishelanil yul sat yibꞌanhqꞌinal tiꞌ yebꞌ hunteqꞌan nimeta tzotiꞌ kaw nanxa yok walan teyet.
2 Yet wekꞌan texol tuꞌ machi hunuxa tzet ye tuꞌ woche walaꞌan teyet hanhkꞌanhe kuybꞌanile yinh Komam Jesucristo,
yinh iskamikal Komam yinh teꞌ kulus.
3 Yet wekꞌan texol tuꞌ kinnanonan,
inluylunpaxokanhan yu xiwkilal.
4 Hayet walnihan Istzotiꞌ Komam Dios teyet,
mach kexinmontehan yu ishelanil yul sat yibꞌanhqꞌinal tiꞌ,
wal xin to haꞌ Komam Espíritu Santo yebꞌ yip Komam Dios,
haꞌ anayto yul heyanma.
5 Hak tuꞌ xin maxhtaj yu ishelanil ebꞌnaj winaj yuxin heyayto yul heyanma yinh Komam Dios,
wal xin to yu yip Komam.
Haꞌ Komam Espíritu Santo chiꞌaqꞌni johtanhelo Komam Dios
6 Yajaꞌ wal tet ebꞌnaj ayxako yul isqꞌabꞌ Komam Dios,
ebꞌnaj ayxa isnabꞌal yinh yet Komam,
chonhtzotelanh yinh huneꞌ helanilehal tet ebꞌnaj,
yajaꞌ maxhtaj helanilehal yet yul sat yibꞌanhqꞌinal tiꞌ.
Maxhkatajpaxo ishelanil ebꞌnaj jahaw sat txꞌotxꞌal tiꞌ,
yuto ebꞌnaj tuꞌ chitanhilo ebꞌnaj.
7 Huneꞌ chiwaltiꞌan,
haꞌ ton huneꞌ ishelanil Komam Dios ewanyehi,
yunhe kaw kꞌul chonhelkaniko yu iskꞌulchꞌanil iskꞌul Komam.
Huneꞌ tiꞌ nabꞌiltikꞌa yu Komam yet yalanhto maxhto chiwatxꞌi huneꞌ yul sat yibꞌanhqꞌinal tiꞌ.
8 Huneꞌ tiꞌ maxhtikꞌa txumcha yu ebꞌnaj yahaw konhobꞌ yul sat yibꞌanhqꞌinal tiꞌ,
yuto ta istxum ebꞌnaj machim yakanh ebꞌnaj Komam yinh kulus,
Komam kaw aykano yelapno yehi.
9 Wal xin tzꞌibꞌnhebꞌilkano yul Yum Komam Dios hakaꞌ tiꞌ:
«Ay hunteqꞌan tzet watxꞌebꞌilxa yu Komam Dios tet mak chiꞌochen Komam.
Huneꞌ tuꞌ maxhto hunu mak xaꞌilni,
yebꞌ xaꞌabꞌeni,
maxhtopaxo mak xaꞌekꞌ isnabꞌal yinh,»
xhihayoj.
10 Hunteqꞌan tzet ye tuꞌ tiꞌ xayaqꞌ Komam johtanhelo yu Yespíritu,
haꞌ Yespíritu Komam tuꞌ ohtanhe sunil,
yohtapaxo hunteqꞌan tzet ye tuꞌ yet Komam Dios yaꞌta kotxumni.
11 Hakaꞌ hunu mak tinanh,
mach yohtajo tzet ayayto yul yanma hunuxa yet anmahil,
wal xin kachannhe yanma huneꞌ mak tuꞌ ohtanhe.
Hak tuꞌ ye Komam Dios,
hanhkꞌanhe Yespíritu Komam ohtanhe tzet nabꞌil yu.
12 Walonh tiꞌ xin maxhtaj yespíritu yul sat yibꞌanhqꞌinal tiꞌ chabꞌil ju,
to haꞌ huneꞌ Espíritu chitit yinh Komam Dios.
Hak tuꞌ xin chu kotxumni hunteqꞌan iskꞌulal chaqꞌ Komam jet.
13 Maxhtaj tzotiꞌ johtajanh yu kohelanilanh chijalanh,
machoj,
wal xin to haꞌ Tzotiꞌ chaqꞌ Komam Espíritu jetanh haꞌ chijalanh.
Hak tuꞌ xin chu jalnilojanh yinh habꞌan hunteqꞌan yet Komam Espíritu Santo tet anma ayxako Yespíritu Komam Dios yinh.
14 Haꞌ mak maxhto Yespíritu Komam Dios yinh,
mach chischah yabꞌeꞌ hunteqꞌan tzet ye tuꞌ yet Komam Espíritu Santo,
yuto sukal ye yul sat,
mach chitxumchapaxo yu,
yuto hunteqꞌan tiꞌ hanhkꞌanhe Komam Espíritu Santo chiꞌaqꞌni kotxumuꞌloj.
15 Wal mak ayko Yespíritu Komam Dios yinh xin,
habꞌan istxumni sunil ej tzet ye tuꞌ,
ta kꞌul maka machoj.
Yajaꞌ wal komon anma xin,
mach chiqꞌoji istxumni tzet ye mak ayko Yespíritu Komam yinh.
16 Yuto chal yul Yum Komam Dios hakaꞌ tiꞌ:
«¿Mak hunu chu isnahnilo yinh tzet chiꞌekꞌ yinh isnabꞌal Komam Dios?
Yebꞌ xin ¿mak hunu chiꞌaqꞌni istzꞌajanbꞌal iskꞌul Komam?»
xhihayoj.
Wal hanhonh tiꞌ xin,
haꞌ Komam Espíritu Santo chiꞌaqꞌni johtanhelo isnabꞌal Komam Jesucristo.