2
Yuxin xaꞌintxumilojan tato mach chintohan ilwal teyinh yu wanikojan bꞌiskꞌulal texol.
2 Yuto ta chintohan waqꞌaꞌkojan bꞌiskꞌulal teyinh,
¿maktaxka xin chu yaqꞌni tzalaho wanmahan?
Wal xin mach chisje inkꞌulan waqꞌaꞌkojan bꞌiskꞌulal texol,
yuto kaw hex cheyaqꞌ tzalahilal yul wanmahan.
3 Yuxin watojan incartahan teyet yunhe mach cheyaqꞌ bꞌiskꞌulal wabꞌehan yet chinapnihan bꞌay ay hex tuꞌ.
Haꞌ heyet to tzalahilal cheyaqꞌ wabꞌehan.
Wal xin tꞌinhanxa wehan ta hesunil chextzalapaxoj,
hakaꞌ huneꞌ tzalahilal ayko yinh wanmatiꞌan.
4 Hayet wanitojan huneꞌ incarta tuꞌan teyet,
kaw wiqꞌ bꞌiskꞌulalan,
kaw kinoqꞌan heyu,
yaj maxhtaj yu yok bꞌiskꞌulal teyinh yuxin intzꞌibꞌnhetojan huneꞌ carta tuꞌ,
wal xin to yunhe heyilni tato kaw xahan ay hex wuhan.
Yaqꞌ nimankꞌulal yaꞌ Pablo yinh huneꞌ naj yako ismul
5 Ay huneꞌ mak aniko bꞌiskꞌulal,
yajaꞌ maxhnhetajinan wabꞌehan huneꞌ bꞌiskꞌulal tuꞌ,
to hex heyabꞌepaxo nichꞌan.
Nichꞌan kinchihan yuto mach chisje inkꞌulan tato chichꞌibꞌ isyaꞌtajil naj tuꞌ yibꞌanh.
6 Haꞌ texol tuꞌ etza hesunil heyako isyaꞌtajil yibꞌanh naj,
yajaꞌ kꞌuxanxa isyaꞌtajil heyako yibꞌanh naj tuꞌ.
7 Haxa tinanh xin,
aqꞌwe nimankꞌulal yinh naj,
iptzewe naj haxinwal matxa chislahiko bꞌiskꞌulal yinh naj.
8 Yuxin chiwalpaxtojan teyet ta chexahannhe naj hakaꞌtikꞌa yet yalanhtokanoj.
9 Yu huneꞌ tuꞌ,
yuxin intzꞌibꞌnhetojan huneꞌ incarta tuꞌan teyet yunhe wilnihan ta yijem hex yinh tzet chiwalan teyet.
10 Haꞌ mak cheyaqꞌ nimankꞌulal yinh yu hunu istxꞌojal chiswatxꞌe,
chiwaqꞌpaxo nimankꞌulalan yinh,
waxanhka mach wetojan yako ismul,
yajaꞌ heyu yuxin chiwaqꞌan nimankꞌulal,
yu iskꞌulalo teyinh sata Komam Jesucristo.
11 Hak tuꞌ chijute haxinwal mach chiqꞌoji naj matzwalil jinh,
yuto johtaxa tzet chu yok naj etlo jinh.
Mach tzala iskꞌul yaꞌ Pablo yet yekꞌ yaꞌ bꞌey Troas
12 Hayet wapnihan bꞌey konhobꞌ Troas yu walnikꞌojan Tzotiꞌ Kꞌul yet Kolbꞌanile yinh Komam Jesucristo,
kaw yaqꞌ isbꞌa munil wetan yinh yet Komam.
13 Yaj ok hanikꞌ bꞌiskꞌulal yinh wanmahan,
yuto machi ilcha juxhta Tito wuhan bꞌey tuꞌ,
yuxin kintaqꞌlikanojan tet ebꞌnaj juxhtaj ay bꞌey tuꞌ,
intohan yul ismajul Macedonia.
Chonhqꞌoji yuto ayxako Komam Jesucristo jetbꞌihoj
14 Jaqꞌaꞌ yuchꞌandiosal tet Komam Dios yuto yu Komam Jesucristo yuxin sunilbꞌal tiempo chonhqꞌoji.
Hanhonh xin chonhisqꞌan Komam yu jaqꞌni ohtanhelaxo Istzotiꞌ tet anma.
Haꞌ huneꞌ Tzotiꞌ tuꞌ kaw sunil bꞌay chipujnatoj,
hakaꞌ yekꞌ isxuqꞌal sam hunu tzet ye tuꞌ kaw xuqꞌ sam.
15 Yul sat Komam Dios hakaꞌ isxuqꞌal sam pom hak tuꞌ je yinh Komam Cristo,
yet chonhekꞌ jalno Istzotiꞌ Komam tet anma chikolchahi yebꞌ xin tet anma chikꞌaytoj.
16 Haꞌ mak chikꞌaytoj yahbꞌeta sam huneꞌ Tzotiꞌ Kꞌul yet Kolbꞌanile yul sat yuto ayko yinh kamikal,
walpaxo mak chikolcha xin,
kaw xuqꞌ sam chabꞌe yuto chischah isqꞌinal tet Komam.
¿Maktaxka xin chiqꞌoji iswatxꞌen huneꞌ munil tiꞌ?
17 Yuto hanhonhtiꞌanh maxhtaj yu jiqꞌnihanh melyu yuxin chonhekꞌanh jalaꞌkꞌojanh Istzotiꞌ Komam Dios hakaꞌ chute hunteqꞌanxa ebꞌnaj soman ye isnabꞌal.
Wal xin kaw hakaꞌtikꞌa kaw ye yul sat Komam Dios,
hak tuꞌ chu jalnikꞌojanh,
yuto haꞌ Komam aqꞌnhe huneꞌ komunil tiꞌanh,
yebꞌ hunxanhe jehanh yinh Komam Jesucristo.