Munlawomonhanh yinh huneꞌ akꞌ trato
3
Yet chijalnihanh hunteqꞌan tiꞌ teyet,
¿chimhetxumu tato lanhan jalni kobꞌahanh kꞌulal?
Wal xin ¿tom chikoyehanh carta chonhabꞌenikojanh yul heqꞌabꞌ?
maka ¿chikoqꞌananh carta chexabꞌeniko yul koqꞌabꞌanh hakaꞌ chute hunteqꞌanxa ebꞌnaj?
¡Machoj!
2 Wal xin hexnhechꞌan kocartahanh,
haꞌ xin chiꞌokniko juhanh.
Huneꞌ carta chexabꞌeniko tuꞌ tzꞌibꞌnhebꞌil yinh janmahanh,
huneꞌ carta tuꞌ sunil mak ohtanhe yebꞌ sunil mak chiꞌilni.
3 Kaw xin ixtanh yehi,
yuto hex tiꞌ hakaꞌ hunu carta tzꞌibꞌnhebꞌil yu Komam Cristo hak tuꞌ heyehi,
hanhonhtiꞌanh xin chijikꞌojanh huneꞌ carta tuꞌ.
Huneꞌ carta tuꞌ maxhtaj yu tinta tzꞌibꞌnhebꞌil,
to yu Yespíritu Komam Dios itzitz.
Machipaxotaj yinho chꞌen chꞌen tzꞌibꞌnhebꞌilikoj,
wal xin yinh heyanma tzꞌibꞌnhebꞌilxakoj.
4 Yu Komam Cristo yuxin chikawxi kokꞌul sata Komam Dios tato hak tuꞌ ye hunteqꞌan tuꞌ.
5 Hayet chijalnihanh huneꞌ tiꞌ mach lanhano jalnihanh tato chisje kowatxꞌenanh hunu tzet ye tuꞌ yul jetanh kochukilanh,
wal xin sunil tzet chisje kowatxꞌenanh,
yaj yu Komam Dios chikolwa jinhanh.
6 Haꞌ Komam aqꞌni jipanh jokanh chejabꞌo yinh huneꞌ akꞌ trato,
maxhtaj yinh huneꞌ ley tzꞌibꞌnhebꞌilkanoj.
Huneꞌ iskabꞌ trato tiꞌ chij isbꞌa yu Yespíritu Komam Dios.
Huneꞌ isley yaꞌ Moisés tzꞌibꞌnhebꞌilkano tuꞌ chonhyito yinh kamikal,
wal Yespíritu Komam Dios chaqꞌ koqꞌinal mach istanhbꞌal.
7 Huneꞌ isley yaꞌ Moisés tzꞌibꞌnhebꞌilkaniko yinh chꞌen chꞌen,
kaw ay isqꞌaqꞌal yip isjepla yet yuli,
yuxin matxa yu isqꞌoji ismujliko ebꞌnaj Israel yinh yaꞌ Moisés yu istzejtzoni,
yajaꞌ yekꞌbꞌanilnhe yehi.
Yuxin ta haꞌ huneꞌ ley chonhaqꞌni kamoj kaw xiwkilta yu yaqꞌlax tet anma,
8 ¡hajxampaxo xin huneꞌ iskabꞌ trato chij isbꞌa yu Komam Espíritu Santo,
ekꞌbꞌalto iskꞌulchꞌanil chu yaqꞌlax istzotiꞌal!
9 Haꞌ chal yelapno huneꞌ chiwaltiꞌan to ta kaw ay ismay yu yaqꞌlax istzotiꞌal huneꞌ ley chonhaniko yinh kamikal,
hajxam xin jabꞌen iskꞌulchꞌanil istzotiꞌal tzet chonhaniko kꞌulal sata Komam Dios.
10 Yuto waxanhka kaw ay yelapno huneꞌ isley yaꞌ Moisés yet yalanhto tuꞌ,
yajaꞌ wal tinanh matxa yelapno ye yul sat huneꞌxa tiꞌ,
yuto kaw ekꞌbꞌal iskꞌulchꞌanil.
11 Ta kaw niman yelapno ye huneꞌ ley txannhe istiempohal tuꞌ,
hajxam xin huneꞌ trato maxhtikꞌa istanhbꞌal,
to kaw ekꞌnaxa iskꞌulchꞌanil.
12 Ayko huneꞌ tiꞌ yipo janmahanh,
yuxin yinh sunil janmahanh chijalnikꞌojanh.
13 Mach chijutehanh hakaꞌ yute yaꞌ Moisés,
yuto yako yaꞌ huneꞌ qꞌap qꞌap yenhelo sat yunhe mach chil ebꞌnaj Israel istanhilo ismujli huneꞌ isqꞌaqꞌal yip Komam ayiko yinh sat yaꞌ tuꞌ.
14 Yajaꞌ mach istxum ebꞌnaj tato chitanhilo isqꞌaqꞌal huneꞌ tuꞌ,
yebꞌpaxo xin tinanh yet chilni ebꞌnaj Istzotiꞌ Komam Dios bꞌay ayayo huneꞌ bꞌabꞌel trato,
hakaꞌtotikꞌa ayko huneꞌ qꞌap qꞌap tuꞌ yenhelo isnabꞌal ebꞌnaj.
Haꞌ xin mach chiꞌaqꞌni istxumulo ebꞌnaj tzet chala,
yuto maxhto chiꞌaqꞌlax yohtanhelo ebꞌnaj tato yet yul Komam Cristo istanhkanilo bꞌabꞌel trato tuꞌ.
15 Yuxin hayet chiyilni ebꞌnaj isley yaꞌ Moisés tinanh hakaꞌtanhe aytoko qꞌap qꞌap yenhelo isnabꞌal ebꞌnaj.
16 Yajaꞌ yet chaniko isbꞌa anma yul isqꞌabꞌ Komam Cristo Jahawil,
chiꞌilaxilo huneꞌ yenhel isnabꞌal hakaꞌ qꞌap qꞌap tuꞌ.
17 Yuto haꞌ Komam Cristo Jahawil,
Espíritu ye Komam,
yuxin yet ayxako Yespíritu Komam jinh habꞌanxa kotxumni tzet chal Yum Komam Dios,
matxa ayonhokto yalanh yip huneꞌ bꞌabꞌel trato.
18 Yuxin matxa huneꞌ hakaꞌ ismaj sate tuꞌ yinh kosat kosunil.
Wal tinanh xin lahanonhxa hakaꞌ hunu chꞌen espejo bꞌay chiꞌil-lax isqꞌaqꞌal yip Komam,
yuto haꞌ jinh chiꞌilchalo iskꞌulal Komam Cristo Jahawil.
Yuxin lanhan ischꞌibꞌ konabꞌal hakaꞌ isnabꞌal Komam,
yebꞌ xin lanhan istzꞌajnalo iskꞌulchꞌanil Komam jinh.
Huneꞌ tiꞌ chij isbꞌa jinh yu yip Komam Espíritu.