4
Yuxin mach chipax jipanh,
yuto yu iskꞌulchꞌanil iskꞌul Komam Dios yuxin yako huneꞌ munil tiꞌ yul koqꞌabꞌanh.
2 Wal tinanh sunil tzet kaw txꞌixobꞌal chiswatxꞌe anma yinh ewantajil yahbꞌilxakano juhanh,
machi mak chijaqꞌ subꞌchahojanh,
mach chikosomanh Istzotiꞌ Komam Dios yebꞌ komon tzotiꞌ.
Wal xin hanhe isyelal chijalanh sata anma yebꞌ sata Komam Dios,
hak tuꞌ chu koyenilojanh tato huneꞌ komunil tiꞌanh ayko yinh istoholal.
3 Hayet chonhekꞌanh jalnokꞌojanh Tzotiꞌ Kꞌul yet Kolbꞌanile,
ay mak tiꞌ mach chitxumchalo yu,
haꞌ ton hunteqꞌan mak tuꞌ chikꞌaytoj.
4 Yajaꞌ yu mach chayto yul yanma yinh Istzotiꞌ Komam;
yuxin haꞌ naj yahawil yinh huneꞌ yul sat yibꞌanhqꞌinal tiꞌ,
haꞌ naj machi aqꞌni yohtanhelo anma yunhe mach chu yilni istzejla isqꞌaqꞌal huneꞌ Tzotiꞌ yet kolbꞌanile,
yet Komam Cristo kaw aykano yip,
Komam yechel Komam Dios.
5 Maxhtaj honhanh chijalikꞌo kobꞌahanh,
wal xin to haꞌ Komam Jesucristo chijalikꞌojanh ta haꞌ Komam Jahawil.
Wal hanhonhanh xajako kobꞌahanh hechejabꞌoj yuto chitzala janmahanh yinh Komam.
6 Haꞌtikꞌa Komam Dios chejni ta chitzejla sajilqꞌinal xol qꞌejholo,
haꞌpaxo Komam aqꞌni sajilqꞌinal yul janma yunhe johtanhenilo isqꞌaqꞌal yip Komam Dios,
huneꞌ chitzejla yinh sat Komam Jesucristo.
Hanhkꞌanhe yinh Komam Dios bꞌay chu janiko janma
7 Hakaꞌ hunu qꞌalomal ayayto yul hunu txꞌotxꞌ xi,
hak tuꞌ ye Istzotiꞌ Komam Dios yinh konimanil,
yunhe isyenilo isbꞌa ta haꞌ Istzotiꞌ Komam kaw aykano yip;
yinh Komam Dios chitita,
mach jetojanh yehi.
8 Yuxin waxanhka hoybꞌilonhanh yu isyaꞌtajil,
yajaꞌ mach chonhaykꞌayanh yul isqꞌabꞌ.
Ay tzet ye tuꞌ chijako yinh kokꞌulanh,
yajaꞌ mach chikabꞌkon kokꞌulanh yu.
9 Chonhkajlaxanh,
yajaꞌ mach bꞌejbꞌilonhkanojanh,
chonhmaqꞌlaxkanhanh,
yajaꞌ mach maqꞌbꞌilo kotanhilojanh yinh hunelnhe.
10 Bꞌajxanhetuꞌwal chonhtohanh ayonhnhetikꞌakojanh yul isqꞌabꞌ kamikal,
hakaꞌ yaqꞌle Komam Jesucristo,
hak tuꞌ chu isyenilo isbꞌa jinhanh yinh tzettaj yaqꞌle Komam.
11 Hanhonhtiꞌanh waxanhka itzitzonhanh,
yajaꞌ ayonhnhetikꞌakojanh yul isqꞌabꞌ kamikal sunilbꞌal tiempo yu chonhmunlahanh yinh ismunil Komam Cristo.
Hak tuꞌ chu isyenilo isbꞌa tzettaj yaqꞌle Komam yinh huneꞌ konimanilanh kambꞌehal ye tiꞌ.
12 Yuxin hanhonhtiꞌanh ayonhnhetikꞌakojanh yul isqꞌabꞌ kamikal yunhe hechahnikano heqꞌinal tet Komam.
13 Chal yul Yum Komam Dios hakaꞌ tiꞌ:
«Xawaytojan yul wanmahan yuxin kintzotelan,»
xhi.
Hak tuꞌ jepaxojanh hanhonhtiꞌanh xajaytojanh yul janmahanh yinh Komam Dios,
yuxin chonhtzotelanh.
14 Hanhonhtiꞌanh johtajanh ta haꞌ Komam Dios aqꞌni itzitzbꞌokanh Komam Jesucristo Jahawil,
haꞌtikꞌa Komam xin chonhaqꞌni itzitzbꞌokanh yuto yetonhxa Komam Jesucristo,
hunxa xin chu konhyinito Komam iskꞌatanh.
15 Kaw chijaqꞌlehanh hunteqꞌan isyaꞌtajil tiꞌ yu iskꞌulalo teyinh,
yebꞌ yunhe txꞌiꞌal mak chichahni iskꞌulchꞌanil iskꞌul Komam Dios,
haxinwal txꞌiꞌal mak chiꞌaqꞌnipaxo yuchꞌandiosal tet Komam,
hak tuꞌ chu yok ismay Komam.
16 Yu huneꞌ tuꞌ,
yuxin mach chikabꞌkon kokꞌulanh waxanhka lanhan ispax yip konimanilanh,
yajaꞌ wal janmahanh xin hunun tzꞌayik yakꞌbꞌiloj.
17 Sunilal isyaꞌtajil chijilanh yul sat yibꞌanhqꞌinal tiꞌ,
yinh anhe chiꞌekꞌtoj yuto chiꞌapni istiempohal bꞌay chilahwi,
yajaꞌ wal iskꞌulchꞌanil chaqꞌ Komam jet xin ekꞌbꞌal niman yelapnoj,
yebꞌ xin mach istanhbꞌal.
18 Hanhonhtiꞌanh,
maxhtaj yinh hunteqꞌan tzet ye tuꞌ chijiliko yinh bꞌay chijako konabꞌalanh.
Wal xin yinh hunteqꞌan tzet ye tuꞌ mach chijiliko yinh haꞌ bꞌay ayko konabꞌalanh,
yuto sunil hunteqꞌan chijiliko yinh,
yinh anhe chitanhiloj.
Wal hunteqꞌan mach chijiliko yinh aynhetikꞌa yinh sunilbꞌal tiempo.