5
Huneꞌ konimanil tiꞌ,
lahan hakaꞌ huneꞌ nichꞌan lexhpat chiꞌetaxtoj.
Yajaꞌ johtaj ta ay huneꞌ nimanile kaw kꞌul watxꞌebꞌil yu Komam Dios yul satkanh,
mach anmaho watxꞌenhe,
yebꞌ xin machi bꞌaqꞌinhal chitanhiloj.
2 Yuxin hayet ayonhtokꞌo yinh konimanil tiꞌ kaw chꞌah kokꞌul,
jochebꞌal chiꞌaqꞌlaxna huneꞌ konimanil yet satkanh tuꞌ.
3 Haꞌ huneꞌ tuꞌ chiꞌok xilo koqꞌap,
yunhe mach tꞌilanojonh yet chonhapni.
4 Hayet ayonhtokꞌo yinh konimanil tiꞌ kaw chiꞌah kokꞌul chijaqꞌlen isyaꞌtajil,
ay jalaꞌ mach chonhkan tꞌilnoj,
mach chijoche ta tonhe chiꞌilaxilo huneꞌ konimanil tiꞌ,
wal xin to chijoche ta chiꞌaqꞌlax hunxa konimanil akꞌ,
hak tuꞌ xin chitanhilo huneꞌ konimanil kambꞌehal ye tiꞌ,
kat kochahni huneꞌ koqꞌinal mach istanhbꞌal.
5 Yu huneꞌ tiꞌ yuxin konhiswatxꞌe Komam Dios,
yaqꞌnipaxo Komam Espíritu Santo jet yu yaqꞌni johtanhelo yinh kaw istꞌinhanil tato chikochah huneꞌ tuꞌ.
6 Yuxin kaw sunilbꞌal tiempo chijako huneꞌ tuꞌ yipo janma,
johtaj tato yet ayonhtoko yinh huneꞌ konimanil tiꞌ machijonh iskꞌatanh Komam Dios yul satkanh.
7 Tinanh maxhto chijil huneꞌ tuꞌ,
yajaꞌ yulbꞌal istiempohal ayonh yinh huneꞌ konimanil tiꞌ chijayto yul janma ta hak tuꞌ yehi.
8 Yuxin kaw ayko Komam Dios yipo janma,
jochebꞌal chikobꞌejkano huneꞌ konimanil tiꞌ kat japni iskꞌatanh Komam.
9 Yuxin waxanhka ayonhikꞌojanh yebꞌ konimanil tiꞌanh,
maka haxa iskꞌatanh Komam bꞌey satkanh,
haꞌ tzet choche Komam Dios haꞌ ayko yinh kokꞌulanh kowatxꞌenanh yunhe istzala Komam jinhanh.
10 Kaw kosunil chonhok sata Komam Jesucristo yul iskapil yunhe kochahni ispaj yinh tzettaj chikowatxꞌe hununonh yet ayonhikꞌo yul sat yibꞌanhqꞌinal tiꞌ,
ta kꞌul maka istxꞌojal kowatxꞌe.
Ismunil yaꞌ Pablo yalnikꞌo yinh tzet chu yok anma yinh aqꞌankꞌulal yebꞌ Komam Dios
11 Wal honhtiꞌanh,
haꞌ tet Komam Dios Jahawil bꞌay chonhxiwanh,
yuxin ayko yinh kokꞌulanh jalnihanh tet anma ta chako isbꞌa yul isqꞌabꞌ Komam Dios.
Kaw ohtabꞌil kobꞌeybꞌalanh yu Komam,
hakexpax tuꞌ hantam saqꞌal ta heyohtapaxo kobꞌeybꞌalanh.
12 Mach lanhano jalnihanh tato kaw kꞌulonhanh yul hesat.
Wal xin jochebꞌalanh tato chextzala jinhanh yebꞌ yunhe kꞌul hekolni hebꞌa hepajtzen tet ebꞌnaj yinhnhe anma nime winaj chako yanma,
maxhtaj iskꞌulal ayayto yul yanma anma bꞌay chitꞌanhxiko ebꞌnaj.
13 Wal honhtiꞌanh,
waxanhka chonhhal-laxanh locohal,
yajaꞌ yu komunlahanh yinh yet Komam Dios,
yajaꞌ ta mach locohoj honhanh cheyila yaj yu iskꞌulalo teyinh.
14 Wal xin sunil tzet chikowatxꞌehanh,
haꞌ iskꞌulchꞌanil iskꞌul Komam Jesucristo,
haꞌ chiꞌaqꞌni jubꞌanh,
yuto johtajanh tato ay huneꞌ mak kam koselelo kosunil,
yuxin kamnajonhxa yinh kobꞌeybꞌal yet yalanhtokanoj.
15 Ju kosunil yuxin kam Komam Jesucristo yuxin hanhonh itzitzonh tiꞌ,
matxahojabꞌ chonhekꞌ yinh tzet chal janma.
Wal xin haxahojabꞌ tzet chal Komam haꞌ chikoyije;
yuto kam Komam Jesucristo,
lahwi tuꞌ yitzitzbꞌipaxokanh yu yaqꞌni iskꞌulal jet.
16 Yuxin hanhonhtiꞌanh matxa chonhokanh aqꞌokꞌule yinh ebꞌnaj juxhtaj,
hakaꞌ chute anma yet yul sat yibꞌanhqꞌinal tiꞌ.
Waxanhka yet yalanhto konhokanh aqꞌokꞌule yinh Komam Cristo,
yajaꞌ wal tinanh xin,
matxa hako tuꞌ konanihanh yinh Komam.
17 Yuxin haꞌ mak chako isbꞌa yul isqꞌabꞌ Komam Jesucristo,
akꞌ anmaxa chꞌelikoj.
Haꞌ tzet iswatxꞌe yet yalanhtokanoj chitanhkaniloj,
haxa tzet chiswatxꞌe tinanh xin akꞌtoxa.
18 Sunil hunteqꞌan chiwaltiꞌan,
haꞌ Komam Dios chiwatxꞌeni.
Hanhechꞌan yu Komam Jesucristo yuxin ayonhiko yinh aqꞌankꞌulal yebꞌ Komam Dios.
Yaqꞌnipaxkano Komam komunilanh jalnikꞌojanh tzet chu yok anma yinh aqꞌankꞌulal yebꞌ Komam Dios.
19 Haꞌ chal yelapno huneꞌ tuꞌ to ayko Komam Dios yinh Komam Cristo yet yulikꞌoj yunhe yok anma yinh aqꞌankꞌulal yebꞌ Komam,
matxa xin chisnati Komam ismul.
Haꞌ Komam aqꞌnhekano huneꞌ munil tiꞌ yul koqꞌabꞌanh jalnikꞌojanh yinh tzet chu yok anma yinh aqꞌankꞌulal yebꞌ Komam Dios.
20 Yuxin hanhonhtiꞌanh ischejabꞌ Komam Cristo jehanh yuxin hakojtam haꞌ Komam Dios chiꞌay sat teyet,
yuxin yinh isbꞌi Komam Jesucristo chijalanh teyet ta chexok yinh aqꞌankꞌulal yebꞌ Komam Dios.
21 Machi nino istxꞌojal Komam Jesucristo,
yajaꞌ yibꞌanh Komam alaxkanto ismul sunil anma yu Komam Dios.
Yuxin hayet chijaniko kobꞌa yul isqꞌabꞌ Komam Jesucristo chonhok kꞌulal yul sat Komam Dios.