6
Hanhonhtiꞌanh chonhkolwahanh komunlahanh yinh ismunil Komam Dios,
yuxin chiꞌelto jawanh teyinh ta mach cheyintanhekanilto iskꞌulchꞌanil iskꞌul Komam Dios.
2 Chal Komam Dios yul Yum hakaꞌ tiꞌ:
Yinh istiempohal kinhawawtehan tawinh,
wabꞌetojan tzet hawala;
yinh istzꞌayikal hawoche hakolbꞌanil kinkolwahan tawinh,a
xhihayoj.
Yuxin tinanh istiempohalxa heyawten Komam teyinh,
yebꞌ xin istzꞌayikalxa hechahni hekolbꞌanil.
3 Hanhonhtiꞌanh kaw kꞌul chijute kobꞌeybꞌalanh yunhe machi mak chijaqꞌ lektahojanh,
yuto mach chisje kokꞌulanh tato ay mak chihalni isqꞌumal huneꞌ komunil tiꞌanh.
4 Wal xin kaw chikoyehanh yinh tzet chikowatxꞌehanh ta kaw yeli ischejabꞌ Komam Dios jehanh,
yuxin chijaqꞌ janmahanh jijlenanh isyaꞌtajil chihul jibꞌanhanh,
yebꞌ manhtzetal,
yebꞌpaxo yekꞌyaꞌ janmahanh.
5 Ay bꞌay kaw konhmaqꞌlaxanh,
ay bꞌay xin konhalaxikojanh preso,
yebꞌ xin ay bꞌayah wejna anma jinhanh,
ay bꞌay xin kaw konhekꞌyaꞌanh komunlahanh,
aypaxo bꞌay xin el kowayanhanh,
ay bꞌay jijlepaxojanh wahil.
6 Chikoyenipaxilojanh tato ischejabꞌ Komam Dios jehanh yu iskꞌulal chikowatxꞌehanh,
johtaxahanh bꞌaytet istꞌinhanil,
yuxin chijaqꞌ nimankꞌulalanh yinh anma,
kꞌulchꞌan chijutepaxo kokꞌulanh yuto ayko Komam Espíritu Santo yul janmahanh,
kat kotzalapaxojanh yinh jet anmahil.
7 Chikoyepaxilojanh tato ischejabꞌ Komam Dios jehanh yuto haꞌ kuybꞌanile kaw yel chijalanh,
yebꞌ yu ayko yip Komam Dios jinhanh.
Hakaꞌ hunu naj soldado chiskol isbꞌa yu ismunlabꞌal kat yaqꞌnipaxo naj howal yu ismunlabꞌal tuꞌ;
hakonh tuꞌanh yuto haꞌ istoholal chijalikꞌojanh.
8 Ay bꞌay niman jelapnojanh yul sat anma,
aypaxo bꞌay xin chiꞌilaxilo kopixananh.
Ay bꞌay kꞌul istzotel anma jinhanh,
ay bꞌay xin txꞌoj istzotel anma jinhanh.
Ay bꞌay chonhhal-laxanh leqꞌtiꞌal,
waxanhka xin haꞌ isyelal chijalanh.
9 Ay bꞌay chal-laxi tato mach konhyohtajojanh anma,
waxanhka xin kaw ohtabꞌil honhanh yu.
Kamomonhxahanh yalni anma,
yajaꞌ itzitzonhanh,
chiꞌalaxpaxayo isyaꞌtajil jibꞌanhanh,
yajaꞌ mach chonhkamanh.
10 Hakaꞌtanhe bꞌiskꞌulal jehanh,
yajaꞌ wal xin tzalahilalnhetikꞌa jehanh.
Waxanhka kaw mebꞌaꞌ honhanh,
yajaꞌ tzetkꞌa mak qꞌalom yul sat Komam Dios juhanh.
Waxanhka machi nichꞌano tzet ayonhanh,
yajaꞌ yul sat Komam Dios tzꞌajan yeko sunil yul koqꞌabꞌanh.
11 Hex wuxhtaj,
hex wanabꞌ,
hex ay hex bꞌey Corinto,
kaw chijaltojanh isyelal teyet yebꞌ sunil tzet ay yinh janmahanh.
12 Kaw machi hunu tzet ye tuꞌ chijebꞌahanh teyet,
wal hex tiꞌ xin ay hunteqꞌan tzet ye tuꞌ ewan ye jetanh heyu.
13 Hakaꞌ yay sat hunu naj mame tet iskꞌahol,
hak tuꞌ yay insatan teyet,
chinqꞌannihan tato haꞌ kaw isyelal haꞌ cheyal wetan,
hakaꞌ chu walnitojan tzet ay yul wanmahan teyet.
Hanhonh tiꞌ yatutonhxa Komam Dios itzitz
14 Mach chu heyetbꞌinhen hebꞌa yebꞌ anma maxhto chichahni Komam yul yanma,
yuto ¿tom chu yetbꞌinhen isbꞌa iskꞌulal yebꞌ istxꞌojal?
Yebꞌ xin ¿tom chu yetbꞌinhen isbꞌa sajilqꞌinal yebꞌ qꞌejholo?
¡Wal xin mach chuhi!
15 Yebꞌ ¿tom chu islahbꞌan isnabꞌal Komam Jesucristo yebꞌ naj matzwalil?
Yebꞌ xin hanhonh xakochah Komam Jesucristo yul janma,
¿tom chu kolahbꞌan konabꞌal yebꞌ mak maxhto chichahni Komam yul yanma?
¡Mach chuhi!
16 ¿Tom ay yokbꞌalto tioxh yul Yatut Komam Dios?
¡Machoj!
Yuto hanhonh tiꞌ Yatut Komam Dios itzitz jehi,
hakaꞌ yalni yul Yum Komam Dios bꞌay chala:
«Hanintiꞌan chinehayojan xol ebꞌnaj kat xin wekꞌan yebꞌ ebꞌnaj,
haninan xin chinokan isDiosaloj,
kat yok ebꞌnaj inkonhobꞌojan,»b
xhi Komam.
17 Yu huneꞌ tuꞌ,
yuxin yalpaxo Komam:
«Elanhwe xol ebꞌnaj,
pohilo hebꞌa yinh ebꞌnaj.
Mach chetzabꞌ hunteqꞌan tzet ye tuꞌ machiswalil,
hak tuꞌ xin chexinchahan inkꞌatanhan.c
18 Chinokan hemamoj,
kat heyok inkꞌaholojan yebꞌ xin inkutzꞌinojan,»d
xhi
Komam Dios Jahawil,
Komam chisje iswatxꞌen sunil tzet ye tuꞌ.