ISCARTA YAꞌ SAN PABLO YATO TET MAKTA AYXAKO YUL ISQꞌABꞌ KOMAM BꞌEY GALACIA
Yichebꞌanil iscarta yaꞌ Pablo
1
Hanin Pablo intiꞌan,
ischejabꞌ Komam Jesucristo wehan.
Mach anmaho chejnhe hinan yebꞌ aqꞌnhe huneꞌ inmuniltiꞌan,
to haꞌ Komam Jesucristo yebꞌ xin Komam Dios Mame,
Komam aqꞌni itzitzbꞌokanh Komam Jesucristo xol kamom.
2 Haꞌ hun ebꞌnaj juxhta aykꞌo inkꞌatanhan chitzꞌibꞌnhento huneꞌ carta tiꞌ wintajan teyet hex hunun majan ayexxako yul isqꞌabꞌ Komam yul ismajul txꞌotxꞌ Galacia.
3 Yaqꞌabꞌ Komam Dios Mame yebꞌ Komam Jesucristo iskꞌulchꞌanil iskꞌul yebꞌ aqꞌankꞌulal teyet.
4 Yako isbꞌa Komam Jesucristo yinh kamikal yu komul,
yunhe konhiskolni tet istxꞌojal huneꞌ yul sat yibꞌanhqꞌinal tiꞌ,
yuto hak tuꞌ yoche iskꞌul Komam Dios Mame.
5 Jalaꞌwe tzotiꞌ kꞌul yinh Komam yinh sunilbꞌal tiempo.
¡Hakojabꞌ tuꞌ!
Machi hunuxa tzotiꞌ kꞌul chꞌaqꞌni kolbꞌanile
6 Kaw chikꞌay inkꞌulan yuto pet heyilo hebꞌa yinh Komam Dios,
Komam kexawten yu iskꞌulchꞌanil iskꞌul Komam Jesucristo,
heyok tzujno yinta huneꞌxa kuybꞌanile nan chu yalni yinh tzet chu kokolchahi.
7 Wal xin,
matolo ay hunuxa kuybꞌanile bꞌay chonhkolchahi,
machoj,
wal xin to ay mak chiꞌaqꞌni etanoto henabꞌal,
chishelni kuybꞌanile yet kolbꞌanile chiyaqꞌ Komam Jesucristo.
8 Yajaꞌ xin tato ay hunuxa mak chiꞌaqꞌni hunuxa nan kuybꞌanilehal teyet yinh tzet chu kokolchahi,
mach lahano yebꞌ huneꞌ aqꞌbꞌilkano teyet juanh,
kaw yaqꞌabꞌayo Komam Dios ishowal yibꞌanh,
waxanhka hanhonhanh,
maka hunu naj ángel ay yul satkanh.
9 Wal xin xatikꞌa walan huneꞌ tiꞌ teyet,
yaj chiwalpaxojan hunelxa,
tato ay hunu mak chiꞌekꞌ halno hunuxa nan kuybꞌanile texol yinh tzet chu kokolchahi,
mach lahano xin yebꞌ huneꞌ chabꞌilxa heyu,
ayojabꞌ istzꞌaktiꞌ Komam Dios yibꞌanh huneꞌ mak leqꞌtiꞌ tuꞌ.
10 Yet chiwalnitojan huneꞌ tiꞌ,
mach chiwokan yinh tato chitzala anma winhan maka mach xin,
wal xin to haꞌ istzala Komam Dios winhan haꞌ chinsayan,
yuto ta haꞌ istzala anma winhan haꞌ chinsayan,
mach ischejabꞌo Komam Jesucristo wehan yinh hakaꞌ tuꞌ.
Yinh tzet yu yok yaꞌ Pablo ischejabꞌo Komam Jesucristo
11 Hex wuxhtaj hex wanabꞌ,
chiwaqꞌkanojan heyohtanheloj tato huneꞌ kuybꞌanile yet kolbꞌanile chiwalikꞌojan,
mach anmaho ay yet.
12 Mach anmaho aqꞌnhe wetan,
yebꞌ xin mach yinho hunu anma kuybꞌililo wuhan,
wal xin haꞌ Komam Jesucristo aqꞌnhe wohtanhelojan.
13 Hex tiꞌ,
heyabꞌemi yal-laxi tato yet yalanhtokanoj,
yet ayintokojan yinh isreligión ebꞌnaj wet konhobꞌ Israelan,
kaw ekꞌyaꞌ makta ayxako yul isqꞌabꞌ Komam Dios wuhan.
Kaw xin waqꞌlenan intanhtzenilojan.
14 Yinh isreligión ebꞌnaj wet konhobꞌ tuꞌan,
haninan kaw ekꞌna ayinkanhan yibꞌanh sunil ebꞌnaj wet chꞌibꞌoman,
yuto kaw ekꞌna chinyijehan sunil tzet iswatxꞌe ebꞌnaj jichmamanh.
15-16 Yaj xin,
haꞌ issaqꞌalil iskꞌul Komam Dios kinsikꞌnilojan yet yalanhto maxhto chinpitzkꞌahan,
kinyawtenikojan Komam munlaho yinh ismunil.
Haxa yet yapni istiempohal hakaꞌtikꞌa chal iskꞌul Komam,
yaqꞌni Komam iskꞌahol wohtanhelojan yunhe walnikꞌojan Tzotiꞌ yet kolbꞌanile xol anma mach Israeloj;
yet hunel tuꞌ xin,
machi hunu mak tet kinbꞌeyan inqꞌambꞌeꞌan.
17 Mach kinbꞌeypaxikꞌojan bꞌey yul konhobꞌ Jerusalén inqꞌambꞌeꞌan tet ebꞌyaꞌ ischejabꞌ Komam Jesús bꞌabꞌel okna insatajan.
Wal xin bꞌeh intohan yul ismajul txꞌotxꞌ Arabia,
lahwi tuꞌ xin inmeltzohan yul ismajul txꞌotxꞌ Damasco hunelxa.
18 Yet lahwi oxebꞌ habꞌil xin,
intohan wilnojan yaꞌ Pedro yul konhobꞌ Jerusalén;
holanhebꞌ tzꞌayik ayinan iskꞌatanh yaꞌ bꞌey tuꞌ.
19 Yet hunel tuꞌ,
machi hunuxa ebꞌyaꞌ ischejabꞌ Komam Jesús wilan yinh,
kachannhechꞌan yaꞌ Jacobo,
yaꞌ yuxhta Komam Jesús.
20 Yinh sat Komam Dios chiwalan teyet tato kaw yel tzet chintzꞌibꞌnhetojan teyet tiꞌ.
21 Lahwi tuꞌ xin,
intohan yulaj ismajul txꞌotxꞌ Siria yebꞌ yul ismajul txꞌotxꞌ Cilicia.
22 Wal ebꞌnaj juxhta ay yul hunun konhobꞌ yul ismajul Judea tuꞌ,
maxhto ohtabꞌilo hinan yu ebꞌnaj.
23 Isqꞌumalixto chiyabꞌe ebꞌnaj hakaꞌ tiꞌ:
«Huneꞌ naj kaw chikajwa jinh yet yalanhtokanoj,
tinanh chiꞌekꞌ naj yalaꞌkꞌo kuybꞌanile yinh tzet chu janayto yul janma yinh Komam Dios,
huneꞌ yoche iskꞌul naj istanhtzeloj,»
xhi ebꞌnaj.
24 Yu huneꞌ tuꞌ yuxinto ok ebꞌnaj yaqꞌaꞌ tzalaho iskꞌul yinh Komam Dios wuhan.