Istaqꞌeto yaꞌ Pablo yinh tzet wal yuten isbꞌa ebꞌnaj juxhtaj
13
Wal xin yinhxa yoxel chintohan kexwilaꞌan.
Hayet chinapni tuꞌan tzijxanhe tzet mulehal chiꞌok lahtiꞌ yinh,
yajaꞌ yilal yinh sat kawanh maka oxwanho testigo chikowatxꞌe.a
2 Hayet inbꞌeykanikꞌojan kexwilnojan yinh iskayel ay hunteqꞌan tzet intaqꞌekanojan teyet,
yajaꞌ chiwalpaxtojan hunelxa,
waxanhka machijinan texol bꞌey tuꞌ yet chiwalnihan huneꞌ tiꞌ tet mak xayako ismul yet yalanhto tuꞌ,
yebꞌ xin teyet hesunil.
Hayet chinapnihan kexwilno tuꞌan xin mach chiwaqꞌ nimankꞌulalan teyinh.
3 Hak tuꞌ chu heyohtanheniloj tato haꞌ Komam Cristo chiꞌaqꞌni wipan intzotelan.
Komam Cristo mach tzꞌono yaqꞌni Komam texol,
wal xin to kaw chisyelo yip Komam texol.
4 Hakaꞌ hunu mak machi yip,
hak tuꞌ yu yalaxkanh Komam Jesucristo yinh teꞌ kulus,
yajaꞌ itzitz Komam tinanh yu yip Komam Dios.
Hak tuꞌ xin jehanh hanhonhtiꞌanh,
tzꞌon chijute kobꞌahanh,
yu hunxa jehanh yebꞌ Komam,
yajaꞌ yu yip Komam yuxin itzitzonhanh yebꞌ yu komunlahanh texol.
5 Txumwe tzet heyeko hunun hex,
tato kaw yeli ayko heyanma yinh Komam Jesucristo.
Txumwepaxiloj tato lanhan hechꞌibꞌ yinh yet Komam.
¿Tom mach heyohtajo xin tato ayxako Komam Jesucristo teyinh hunun hex?
mato tonhe chebꞌaliko hebꞌa yuninalo Komam Dios.
6 Yajaꞌ chijochehanh ta cheyohtanheloj tato kꞌul konhelikojanh yet konhheyilwenanh,
hak tuꞌ chu isyenilo isbꞌa tato yetxa Komam Jesucristo jehanh.
7 Kaw chintxahlihan teyinh tet Komam Dios haxinwal machi hunu istxꞌojal chewatxꞌe,
maxhtaj yu kokananh kꞌulal,
machoj,
wal xin yu hewatxꞌen iskꞌulal,
waxanhka xin chal-laxi ta mach kꞌulo konhelikojanh.
8 Yuto mach chisje kowatxꞌenanh istxꞌojal yinh huneꞌ kuybꞌanile kaw yel chal tiꞌ,
wal xin haꞌ jetanh kaw ayonhikojanh kolwal yinh.
9 Yuxin chonhtzalahanh yet machi jipanh,
wal hex xin kaw ay heyip,
yuxin kaw chikolahikojanh kotxahlihanh teyinh,
yunhe kaw tzꞌajan chexelkaniko yinh yet Komam.
10 Chiwatojan huneꞌ incartatiꞌan teyet yalanhto maxhto chintohan kexwilaꞌan,
haxinwal hayet chinapni tuꞌan mach yilalo chinkachwahan teyinh yu wipan aqꞌbꞌil yu Komam.
Mach yuho kexwetanan yuxin aqꞌbꞌil wip tuꞌan,
wal xin to yunhe hechꞌibꞌ yinh yet Komam.
11 Wal tinanh hex wuxhtaj hex wanabꞌ,
ayojabꞌiko tzalahilal yul heyanma.
Kaw watxꞌeweko henabꞌal yinh istꞌinhanil.
Iptzewe hebꞌa hunun hex yinh yet Komam.
Hunxanhehojabꞌ henabꞌal.
Ayojabꞌ aqꞌankꞌulal texol.
Haꞌojabꞌ Komam kaw xahan ayonh yu yebꞌ chiꞌaqꞌni aqꞌankꞌulal yul janma chiꞌok heyetbꞌihoj.
12 Qꞌambꞌewej hanikꞌ heye hunun hex yinh sunil heyanma yinh tzalahilal.
13 Chixin isqꞌambꞌeto ebꞌnaj juxhtaj ay bꞌey tiꞌ hanikꞌ heye bꞌey tuꞌ.
14 Yaqꞌabꞌ Komam Jesucristo iskꞌulchꞌanil iskꞌul teyet,
yebꞌ xin chexxahannhe Komam Dios,
yebꞌ haꞌojabꞌ Komam Espíritu Santo chiꞌok heyetbꞌihoj hesunil.