2 Ay huneꞌ naj ohtabꞌil wuhan,

kaw ayko yanma naj yinh Komam Cristo.

Kanhlanhebꞌxa habꞌil tinanh yilaxto naj satkanh bꞌay ay Komam Dios.

Yajaꞌ mach wohtajojan ta bꞌeykꞌo naj yebꞌ isnimanil maka hanhkꞌanhe yanma naj,

hanhechꞌan Komam yohtaj.

3 Kaw wohtajan tato ilaxto huneꞌ naj tuꞌ,

yajaꞌ haꞌ huneꞌ mach wohtajojan ta ilaxto naj yebꞌ isnimanil maka machoj,

hanhechꞌan Komam Dios ohtanhe.

4 Haꞌ huneꞌ wohtajan to ilaxto naj bꞌey paraíso;

bꞌey tuꞌ yabꞌe naj hunteqꞌan tzotiꞌ machi mak ohtanhe,

yebꞌ xin machi mak chisje yalnikꞌoj.

5 Haꞌ huneꞌ naj tuꞌ chisje winikanhan,

wal intiꞌan xin haꞌ yinh hunteqꞌan isyaꞌtajil chiwilan,

haꞌ bꞌay chiwikanh hinbꞌahan.

6 Qꞌinalo tato chiwochehan chiwikanh hinbꞌahan chitikꞌam isje yuto haꞌ isyelal chiwalan,

mach sukoj hinan yinh hakaꞌ tuꞌ.

Yajaꞌ mach chiwikanh hinbꞌahan yuto chiwochehan tato machi hunu mak chinani ta kaw ekꞌbꞌal welapnojan yibꞌanh tzet chil anma winhan,

yebꞌ xin tzet chiyabꞌe anma walnihan.

7 Yajaꞌ yunhe machi ok loloꞌal winhan yu hunteqꞌan tzet kaw niman yelapno yelax wilaꞌ tuꞌan,

yuxin aqꞌlax huneꞌ isyaꞌtajil wetan yu naj matzwalil,

hakaꞌ hunu teꞌ txꞌix alaxiko yinh innimanilan,

hak tuꞌ yu yaqꞌlax huneꞌ isyaꞌil tiꞌ winhan.

8 Oxelxa chinqꞌanan tet Komam Dios ta chilo Komam huneꞌ isyaꞌtajil tiꞌ winhan.

9 Yajaꞌ taqꞌwi Komam wetan hakaꞌ tiꞌ:

«Aqꞌ tzalaho hakꞌul yinh iskꞌulchꞌanil inkꞌulan xawaqꞌan tawet,

yaj yu inhelanilan chitecha hawu.

Hanhkꞌanhe huneꞌ tuꞌ xin chiꞌokniko hawu yuto kaw ekꞌna kaw kꞌul isyenilo isbꞌa wipan yinh isyaꞌtajil,»

xhi Komam.

Hak tuꞌ xin kaw chintzalahan yinh isyaꞌtajil chihul wibꞌanhan,

yuto chisyelo isbꞌa yip Komam Cristo winhan.

10 Yuxin kaw chintzalahan yinh ej isyaꞌtajil chihul wibꞌanhan,

yuxin waxanhka chibꞌuchwa anma winhan,

yebꞌ waxanhka matzet ayinan,

yebꞌ waxanhka chinkajlaxan,

yebꞌ waxanhka chihul isyaꞌtajil wibꞌanhan,

yaj yu inmunlahan yinh yet Komam Jesucristo.

Chintzalahan yuto hayet machi kaw wipan chiwabꞌehan,

kaw chiwiqꞌkanokanh wipan,

yajaꞌ yu Komam.

11 Hakaꞌ hunu mak mach kꞌulo ye yul iswiꞌ,

hak tuꞌ wute hinbꞌahan wanikojan inwinajilan,

yajaꞌ hex ay hemul winhan yuto hex wal heyaniko inwinajilan,

yuto mach ekꞌbꞌalo ebꞌnaj chisbꞌaliko isbꞌa ischejabꞌo Komam Jesucristo tuꞌ insatajan,

haꞌ ebꞌnaj cheyabꞌeto tzet chala.

Waxanhka mach chiyelapno wehan,

yajaꞌ mach chu ispalkꞌon ebꞌnaj wibꞌanhan.

12 Hayet wekꞌan texol kaw niman wute inkꞌulan teyinh.

Inyehan kꞌaybꞌalkꞌule yebꞌ yechel yip Komam Dios texol;

haꞌ xin chalniloj tato kaw yeli ischejabꞌ Komam Jesucristo wehan.

13 Huneꞌxanhe tzet mach lahano kexwutehan hakaꞌ hunteqꞌanxa ebꞌnaj juxhtaj ay yul hunun konhobꞌ,

yuto mach inqꞌanan yinh tzet okniko wuhan,

yuxin aqꞌwe nimankꞌulal yinh huneꞌ inmul tuꞌan.

14 Tinanh xin toxa chintohan kexwilaꞌan yinh yet yoxel,

yajaꞌ matzet chinqꞌanpaxojan teyet yinh tzet chu yekꞌ wuhan bꞌey tuꞌ.

Yuto maxhtaj yinh tzet ay hex bꞌay ayko wanmahan,

wal xin to hex ayexiko yinh inkꞌulan.

Yuto hakaꞌ hunu naj mame tinanh yilal yaqꞌni naj tzet chiꞌokniko yu yuninal,

maxhtaj yuninal naj tuꞌ chiꞌaqꞌni tzet chiꞌokniko yu.

15 Hanintiꞌan,

hinaninan inkꞌaytzenilojan sunil tzet ayinan yebꞌ innimaniltiꞌan yu iskꞌulalo teyinh.

Yajaꞌ chiwilan,

hayet ekꞌbꞌalto chiwako wanmahan teyinh,

wal hex xin ip heyinilo heyanma winhan.

16 Yajaꞌ waxanhka ay ebꞌnaj yohtaj ta machi hunelo tiꞌ wako hinbꞌahan heyijatzo yinh tzet chiꞌokniko wuhan,

yajaꞌ chal ebꞌnaj tato yu inhelanilan yinh istxꞌojal yuxin kexwaqꞌ subꞌchahojan inqꞌannihan tzet ye tuꞌ teyet.

17 ¿Tom kexwaqꞌ subꞌchahojan yu ebꞌnaj juxhtaj watojan yu isto kexyilnoj?

18 Inqꞌanan tet naj Tito tato chito naj kexyilaꞌ yebꞌ hunxa naj juxhta to yinta naj.

¿Tom kexyaqꞌ subꞌchaho naj Tito tuꞌ?

¡Machoj!

Wal xin hakaꞌ innabꞌalan yebꞌ iskꞌulchꞌanil inkꞌulan,

hak tuꞌ yute isbꞌa naj texol.

19 Hex wuxhtaj hex wanabꞌ,

hex xahan ay juhanh,

ham hetxumni tato lanhan kokolni kobꞌahanh yinh hesat yet chijalnihanh hunteqꞌan tiꞌ,

¡machoj!

Wal xin yet Komam Cristo jehanh yuxin chonhtzotelanh yinh istꞌinhanil sata Komam yunhe hechꞌibꞌ yinh yet Komam Dios.

20 Chinxiwan kꞌuxantaxka mach lanhano hewatxꞌen hakaꞌ chiwochehan yet chinapnihan ilwal teyinh,

yebꞌpaxo ta mach chischah hewiꞌ yinh tzet chinwatxꞌehan.

Chinxiwpaxojan wapnihan kꞌuxantaxka aytoko howal texol,

maka ta chito chíwa hekꞌul teyinh hunun hex,

maka ta ayko chichonkꞌulal texol,

maka ta ay hex lanhan heyinikanh hebꞌa,

maka ay hex cheyal txꞌoj tzotiꞌ yinh hunu ebꞌnaj juxhtaj,

maka tato ay hex halo qꞌumal cheyu,

maka ta ay hex cheloloꞌnhe hebꞌa,

maka ta ay hex lanhan hewatxꞌen tzet ye tuꞌ mach toholoj.

21 Yet chinapnihan kexwilaꞌan hunelxa,

kꞌuxantaxka chintxꞌixwikanhan sata Komam Dios,

kat wokan oqꞌo teyinh,

hex maxhtikꞌa chebꞌejkano heyaniko hemul,

heyixli maka hewinajli,

yebꞌ hunteqꞌan istxꞌojal qꞌayna hextikꞌa hewatxꞌeni.