Yaꞌ Pablo yebꞌ ebꞌnaj isbꞌaliko isbꞌa ischejabꞌo Komam Jesucristo
11
Hantam saqꞌal tato chitecha hunteqꞌan tzet chiwaltotiꞌan heyu,
hakojtam mach innabꞌalan,
yuxin hak tuꞌ intzotelan,
yajaꞌ yilal heyaqꞌni techahoj.
2 Kaw tzꞌeꞌ chiwute hinbꞌahan teyinh yuto xahan ay hex wuhan hakaꞌ isxahanil chexyil Komam Dios,
yuto xawaqꞌ tratohan yebꞌ Komam Cristo tato chexwakojan yul isqꞌabꞌ,
hakaꞌ hunu ix qꞌopo maxhto chiyiqꞌle hunu winaj.
3 Yajaꞌ chinxiwan yuto hakaꞌtaxka yu yaqꞌni subꞌchaho noꞌ labꞌa ix Eva yu iskanhil yehi,
haktaxka tuꞌ chu heyaqꞌlax subꞌchahoj,
kat heyinilo heyanma yinh Komam Jesucristo,
yebꞌ xin matxataxka toholo cheyute hebꞌa hakaꞌ choche Komam.
4 Hex tiꞌ kaw niman cheyute hekꞌul heyabꞌen tzet chal ebꞌnaj chiꞌekꞌ halnokꞌo hunteqꞌanxa nan kuybꞌanile yinh Komam Jesucristo,
mach hakaꞌo yu jalnihanh teyet.
Lanhan hechahnipaxo huneꞌ nan espíritu,
maxhtaj hakaꞌ huneꞌ chabꞌilxa heyu.
Lanhan hechahnipaxo huneꞌ nan kuybꞌanile,
maxhtaj hakaꞌ Tzotiꞌ Kꞌul yet Kolbꞌanile hechah yet jekꞌanh jalnokꞌojanh teyet.
5 Haꞌ hunteqꞌan ebꞌnaj ischejabꞌo Komam Jesucristo kaw niman yelapno ye chute yalni tuꞌ,
mach ekꞌbꞌalo yelapno ebꞌnaj insatajan.
6 Waxanhka mach kꞌulo intzotelan,
yajaꞌ haꞌ tzet wohtajan kaw niman yelapnoj.
Sunil tzet kinekꞌan inwatxꞌehan texol haꞌ chalniloj tato kaw ay inhelanilan.
7 Hayet wekꞌan walnokꞌojan Tzotiꞌ Kꞌul yet Kolbꞌanile texol machi nichꞌano tzet inqꞌanilojan teyet.
¿Tom wako inmulan yinh hakaꞌ tuꞌ?
Wal xin wiyo hinbꞌahan yunhe heyinikanh hebꞌa.
8 Hayet inmunlahan texol yet wekꞌan walnokꞌojan Tzotiꞌ Kꞌul yet Kolbꞌanile,
haꞌ hunteqꞌanxa ebꞌnaj juxhta nan konhobꞌal,
haꞌ ebꞌnaj kolwa winhan yunhe yekꞌ wuhan texol.
9 Hayet wekꞌan texol,
ay tiempo ay tzet ye tuꞌ tiꞌ kaw okniko wuhan,
yajaꞌ machi hunujex bꞌay inqꞌanan nichꞌano tzet ye tuꞌ.
Wal xin haꞌ ebꞌnaj juxhtaj ay bꞌey Macedonia apni inkꞌatanhan,
haꞌ ebꞌnaj aqꞌni tzet okniko wuhan.
Kaw machi hunujex bꞌay inqꞌanan hunu tzet ye tuꞌ,
haktikꞌapax tuꞌ chiwute hinbꞌahan tinanh.
10 Haꞌ isyelal Komam Jesucristo ayko winhan,
yuxin chiwalan tato matzet inqꞌanan yet wekꞌan texol hex wuxhta ay yul ismajul Acaya;
haꞌ huneꞌ tuꞌ ayko istzalabꞌalo inkꞌulan.
Huneꞌ tzalahilal tuꞌ machi mak chiꞌinilo wetan.
11 ¿Tom mach ayoko wanmahan teyinh yuxin hak tuꞌ walnihan?
¡Machoj!
Wal xin yohta Komam Dios tato kaw ayko wanmahan teyinh.
12 Yajaꞌ huneꞌnhetikꞌa haꞌ chiwutehan texol hakaꞌ yet yalanhtokanoj.
Chiwutehan hakaꞌ tuꞌ yunhe mach chiwaqꞌan yubꞌ ebꞌnaj chihalni tato lahan komunilanh yebꞌi,
kat yinikanh isbꞌa ebꞌnaj.
13 Haꞌ ebꞌnaj tuꞌ tonhe chisbꞌaliko isbꞌa ebꞌnaj ischejabꞌo Komam Jesucristo.
Chaqꞌni subꞌchaho ebꞌnaj anma yinh tzet chala,
chuteniko isbꞌa ebꞌnaj ischejabꞌo Komam Jesucristo.
14 Yajaꞌ huneꞌ chiswatxꞌe ebꞌnaj tuꞌ mach chikꞌay kokꞌul jilni yuto hak tuꞌ chute naj matzwalil;
chuteko isbꞌa naj kꞌulal hakaꞌ ebꞌnaj ángel.
15 Yuxin mach chikꞌay kokꞌul ta chutepaxo isbꞌa ebꞌnaj tuꞌ hakaꞌ mak chikuyni istoholal,
yuto ischejabꞌ naj matzwalil ye ebꞌnaj.
Yajaꞌ chischah ebꞌnaj tuꞌ isyaꞌtajil hakaꞌtikꞌa istxꞌojal chiswatxꞌe.
Hunteqꞌan isyaꞌtajil hul yibꞌanh yaꞌ Pablo
16 Wal tinanh xin chiwalpaxtojan teyet hunelxa,
mach locohoj hinan,
yajaꞌ ta ay hex chetxumu tato loco hinan xin,
chahwe heyabꞌeꞌ tzet chiwaltiꞌan.
Hakaꞌ hunu mak mach chistxumu yinh tzet chala,
hak tuꞌ chu winikanh hinbꞌahan nichꞌanoxa,
hakaꞌ hunteqꞌan ebꞌnaj chikanh isbꞌa ischukil.
17 Haꞌ hunteqꞌan chiwaltojan teyet tiꞌ,
maxhtaj Komam Dios chiꞌaqꞌni walaꞌan.
Hakaꞌojtam mach chintxuman yet chiwalnihan,
yuto tonhe chiwikanh hinbꞌahan chiwalnitojan teyet.
18 Tzetkꞌa ebꞌnaj chikanh isbꞌa yinh tzet chiswatxꞌe,
hakintuꞌan chiwikanh hanikꞌo hinbꞌahan hakaꞌ chute ebꞌnaj tuꞌ.
19 Kaw helan hex heyalni,
yajaꞌ cheyaqꞌ techaho tzet chal ebꞌnaj mach kꞌulo tzet chiswatxꞌe teyinh.
20 Ay ebꞌnaj chexlanhni yu heyaqꞌni chejaꞌ hebꞌa tet,
kat yinikanikꞌo ebꞌnaj sunil tzet ay hex.
Kaw yahawilxa chute isbꞌa ebꞌnaj teyinh,
chexyaqꞌnipaxo subꞌchaho ebꞌnaj.
Chexisyahni ebꞌnaj,
chiꞌokpaxo yinh isnabꞌal ebꞌnaj ispaqꞌnilto hesat.
Wal hex tiꞌ xin cheyaqꞌ techaho sunil tzet chexyute ebꞌnaj tuꞌ.
21 Wal xin chintxꞌixwihan walnitojan teyet yuto hanhonhtiꞌanh kaw tzꞌon jute kobꞌahanh texol,
mach hakaꞌ yute isbꞌa ebꞌnaj tuꞌ teyinh.
Yajaꞌ ta chikanh isbꞌa ebꞌnaj,
hakinpax tuꞌan chiwipaxokanh hinbꞌahan.
Hayet chiwalnihan huneꞌ tiꞌ,
hakaꞌtanhe mach tzꞌajano yul inwiꞌan chiwalnihan.
22 Ebꞌnaj tuꞌ hebreo ebꞌnaj,
hakinpax tuꞌan hebreo hinan;
Israel ebꞌnaj,
hakinpax tuꞌan,
Israel hinan;
yinh yaꞌ Abraham titna ebꞌnaj,
hakinpax tuꞌan,
yinh yaꞌ Abraham tuꞌ titnaj hinpaxojan.
23 Ischejabꞌ Komam Cristo ye ebꞌnaj yalni,
wal hinan xin ekꞌbꞌalto ischejabꞌ Komam wehan sata ebꞌnaj.
Hayet chiwalnitojan hunteqꞌan tiꞌ teyet hakaꞌojtam mach chintxuman yinh tzet chiwalan.
Wal hanintiꞌan kaw ekꞌbꞌalxa chinmunlahan sata ebꞌnaj,
txꞌiꞌalxa el chinalaxiktojan yul preso sata ebꞌnaj.
Ekꞌbꞌalxapaxo el chinmaqꞌlaxan sata ebꞌnaj,
txꞌiꞌalxa el xin chiꞌeliko inkaman.
24 Howel kinismaqꞌan ebꞌnaj wet Israelan,
39 (bꞌalonhlahonhebꞌ iskawinaj) tzꞌum wijan yu ebꞌnaj hunta el.
25 Oxel xin alaxayto teꞌ kꞌax winhan,
hunel xin kinqꞌojlaxkanhan.
Yet wekꞌan yinh inbꞌelan,
oxel to teꞌ barco yich haꞌ yet ayinikojan yul teꞌ.
Ay hunel tiꞌ xin,
huneꞌ tzꞌayik yebꞌ huneꞌ aqꞌbꞌal ayinikojan yibꞌanh haꞌ mar yuto tokano teꞌ barco yich haꞌ.
26 Mach isbꞌi hayel kinekꞌan yinh inbꞌelan.
Ay bꞌay kinelikojan kinyijnitojan ha haꞌ,
ay bꞌay kinelikojan inkaman yu ebꞌnaj elqꞌom,
yebꞌ yul isqꞌabꞌ wet konhobꞌan,
yebꞌpaxo yul isqꞌabꞌ anma nan konhobꞌal.
Aypaxo bꞌay kinelikojan inkaman yulaj konhobꞌ yebꞌ yulaj bꞌeh,
yebꞌ yibꞌanh haꞌ mar,
yebꞌ xin kaw kinelikojan inkaman yul isqꞌabꞌ ebꞌnaj tonhe chisbꞌaliko isbꞌa juxhtajoj.
27 Ay bꞌay kaw kinsikihan inmunlahan,
waqꞌlenan isyaꞌtajil.
Txꞌiꞌal el mach kinwayan,
ay bꞌay wijlehan nhohchahilal,
yebꞌ tajintiꞌal.
Txꞌiꞌal el mach kinwaꞌan.
Ay bꞌay xin wetapaxo inkꞌulan yu chew,
yebꞌ txꞌiꞌal el kinkankanojan manh xilqꞌapehal.
28 Mach hanhkꞌanheho hunteqꞌan isyaꞌtajil tuꞌ waqꞌlenan,
wal xin aynhetikꞌako yinh inkꞌulan yinh ebꞌnaj juxhtaj ay yul hunun konhobꞌ.
29 Yuto ta ay hunu mak maxhto chiyiqꞌ yip yinh yet Komam kaw chiwiqꞌ bꞌiskꞌulalan yinh,
hakaꞌtanhe maxhto chiwiqꞌpaxo wipan.
Ta ay ebꞌnaj chiꞌetaxto isnabꞌal yu hunuxa maka,
kaw chitak inkꞌulan.
30 Ta kaw ay isyilalil winikanh hinbꞌahan,
chimwikanh hinbꞌahan yinh hunteqꞌan lanhan walnitiꞌan,
yuto haꞌ hunteqꞌan tiꞌ chiyeniloj tato machi bꞌin wipan.
31 Haꞌ Komam Dios,
Ismam Komam Jesucristo,
haꞌ ay yet yalaxiko ismay yinh sunilbꞌal tiempo,
kaw yohta Komam tato kaw yel chiwalan.
32 Yet hunel,
yet ayinikꞌojan yul konhobꞌ Damasco,
ischejni naj gobernador chimunla yinta naj rey Aretas tato chiꞌok ismajomal istiꞌ hunun ispultahil chꞌen kꞌubꞌ hoyaniko yinh konhobꞌ tuꞌ yunhe intzabꞌlaxayojan.
33 Yajaꞌ kinalaxaytojan yul huneꞌ motx yu hunteqꞌan ebꞌnaj juxhtaj,
walaxiltijan yul isventanahil chꞌen kꞌubꞌ tuꞌ.
Hak tuꞌ yu inkolchahan yul isqꞌabꞌ naj gobernador tuꞌ.