Ismunil yaꞌ Pablo haꞌ yalnikꞌo Istzotiꞌ Komam Dios
10
Hanin Pablo intiꞌan yet chinqꞌannihan hunu tzet ye tuꞌ teyet hakaꞌ iskꞌulchꞌanil iskꞌul Komam Cristo hak tuꞌ chu inqꞌannihan.
Tolabꞌ chihal-laxikꞌoj tato yet ayinan texol kaw echo inxiwan,
wal yet machijinan texol xin,
tolabꞌ kaw kanh chiwute hinbꞌahan yalbꞌanil.
2 Yajaꞌ chiwaltojan teyet ta hayet chinapnihan bꞌey tuꞌ machojabꞌ cheyaqꞌtij inhowalan yinh ebꞌnaj chalni tato lahan chijute kobꞌahanh hakaꞌ komon anma,
yuto hanintiꞌan kaw hinaninan intzotelan yinh huneꞌ tuꞌ yebꞌ ebꞌnaj.
3 Wal xin kaw yeli anma honhanh,
yaj mach hakaꞌo chu yaqꞌni anma howal,
mach hako tuꞌ jaqꞌni howalanh.
4 Maxhtaj tzet ye tuꞌ yet yul sat yibꞌanhqꞌinal tiꞌ chijaqꞌbꞌalnhe yet chijaqꞌni howal,
wal xin to haꞌ yip Komam Dios haꞌ chiqꞌoji istanhtzenilo sunil tzet ye tuꞌ kaw ay yip.
5 Chiqꞌojipaxo yip Komam yinh sunil helanilehal yebꞌ loloꞌal mach chichahni ohtanhelaxo Komam Dios.
Haxa komon nabꞌale xin chijakaniko sunil tuꞌ yul isqꞌabꞌ Komam Jesucristo,
hak tuꞌ xin yijem chute isbꞌa.
6 Hayet kaw kꞌul hexxa heyijeni,
chijayojanh isyaꞌtajil yibꞌanh mak mach chisje iskꞌul isyijeꞌ.
7 Hex tiꞌ,
hanhechꞌan tzet cheyil yu isbꞌaqꞌ hesat haꞌnhe chexok hetxumuꞌ.
Ta tꞌinhanxa heyehi tato yet hexxa Komam Cristo,
yilal heyohtanheniloj tato yetpaxo Komam Cristo jehanh.
8 Waxanhka chiwikanh hanikꞌ hinbꞌahan yinh huneꞌ inmuniltiꞌan,
yajaꞌ mach chintxꞌixwihan,
yuto haꞌ Komam Dios aqꞌnhe huneꞌ inmuniltiꞌan yunhe helinhbꞌan hebꞌa yinh Komam,
maxhtaj yu kexwetantojan.
9 Yuxin mach chisje inkꞌulan ta chetxumu ta yu kexinxibꞌtenan yuxin hak tiꞌ chiwute walnitojan yul incartatiꞌan,
wal xin machoj.
10 Yuto ay mak chalni hakaꞌ tiꞌ:
«Haꞌ iscarta naj kaw how istzoteli,
yebꞌ xin kaw yaꞌ chilowi,
yajaꞌ haxa yet aykꞌo naj koxol xin machi yip tzet chiyal naj yebꞌ xin matzet chal yelapnoj,»
xhi ebꞌnaj.
11 Haꞌ mak hak tuꞌ yalni,
yilal yohtanheni tato hakaꞌtikꞌa intzotelan yul incartatiꞌan,
hak tuꞌ chu intzotelpaxojan yet ayinan texol.
12 Wal xin mach chu kolahbꞌan kobꞌahanh yebꞌ mak chisloloꞌnhe isbꞌa.
Haꞌ hunteqꞌan ebꞌnaj tuꞌ chischahko ebꞌnaj sukal yinh yu chꞌok ebꞌnaj yilaꞌ hanta ishelanil hunun ebꞌnaj.
13 Hanhonhtiꞌanh mach chonhpalkꞌonanh jinikanh kobꞌahanh bꞌay yebꞌilkano jetanh,
yuto haꞌ Komam Dios anhekaniko yechel bꞌay kachan komunlahanh.
Hak tuꞌ xin el yinh iskꞌul Komam yuxin konhapnihanh texol bꞌey konhobꞌ Corinto tuꞌ.
14 Qꞌinalo tato maxhtikꞌa hunelo konhapnihanh tekꞌatanh,
machim chonhmunlahanh texol tinanh.
Wal xin hanhonhanh konhapnihanh bꞌabꞌel texol,
jalnihanh Tzotiꞌ Kꞌul yet Kolbꞌanile yinh Komam Cristo teyet.
15 Mach chijikanh kobꞌahanh yinh ismunil hunuxa anma,
yebꞌ xin mach lanhan kopalkꞌonanh komunlahanh yibꞌanh bꞌay yebꞌilonhkanojanh yu Komam Dios.
Wal xin kaw chito jochehanh chonhmunlahanh yunhe ischꞌibꞌ komunil tuꞌanh bꞌay kachan komunlahanh,
yunhe kam heyaniko heyanma yinh Komam.
16 Chijochepaxojanh chonhhitztojanh jalnojanh Tzotiꞌ yet kolbꞌanile yul hunteqꞌanxa konhobꞌ nahat yehilo yinh hekonhobꞌ tuꞌ.
Yajaꞌ xin mach chijochehanh chonhmunlahanh bꞌay xaꞌichiko hunmajanxa ebꞌnaj ismunlahi,
yuto machi jochehanh kololoꞌnhe kobꞌahanh yinh ismunil hunuxa maka.
17 Ta ay hunu mak choche yiqꞌaꞌkanh isbꞌa,
yiqꞌabꞌkanh isbꞌa yaj yinh tzet chiswatxꞌe Komam Dios,
machojabꞌtaj yinh tzet chiswatxꞌe.a
18 Yuto maxhtaj anma chiyal isbꞌa kꞌulal yul yet ischukil haꞌ kꞌul,
machoj,
wal xin to haꞌ mak chal Komam kꞌulal,
haꞌ ton kꞌul.