Chꞌen kolwal chiꞌaqꞌlax tet makta ayxako yul isqꞌabꞌ Komam Jesucristo
9
Wal yinh chꞌen kolwal cheyaqꞌ tet makta ayxako yul isqꞌabꞌ Komam Jesucristo ay bꞌey Judea,
mach yilalo chintzꞌibꞌnhetojan teyet.
2 Yuto wohtajan tato kaw yinh sunil heyanma chexkolwahi,
kaw chitzala inkꞌulan chiwalnihan tet ebꞌnaj juxhta ay bꞌey Macedonia tiꞌ tato kaw kꞌulchꞌan hekꞌul.
Xawalan tato hex ayexxako yul isqꞌabꞌ Komam bꞌey yul ismajul Acaya hunbꞌitax kexichiko heyaqꞌni heyofrenda.
Hayet yabꞌen ebꞌnaj ay bꞌey Macedonia huneꞌ tuꞌ,
kaw txꞌiꞌal ebꞌnaj ok yinh iskꞌul yaqꞌni yofrenda.
3 Tinanh xin chinchejtojan ebꞌnaj juxhtaj tiꞌ bꞌay ay hex tuꞌ,
haxinwal chexyiptze ebꞌnaj hekutxbꞌankanh chꞌen ofrenda tuꞌ.
Hak tuꞌ xin mach nabꞌnheho walan yinh iskꞌulchꞌanil hekꞌul.
4 Yuto kꞌuxantaxka ay ebꞌnaj ah Macedonia tiꞌ tzujan wintajan yet chinapnihan kexwilnojan,
txꞌixobꞌalmi ta maxhto heyofrenda tuꞌ kutxan heyu,
yuto kaw sunil janmahanh chijalnihanh tato kaw kꞌulchꞌan hekꞌul.
5 Yuxin chinnahan tato kaw yilal isbꞌabꞌito ebꞌnaj juxhta tiꞌ tekꞌatanh yunhe iskolwa ebꞌnaj teyinh hekutxbꞌankanh heyofrenda,
chꞌen taqꞌebꞌilxa heyu heyaqꞌni.
Haꞌ xin heyofrenda chikutxi tuꞌ,
haꞌ chalniloj ta kaw kꞌulchꞌan hekꞌul,
machi xin lanhbꞌiloj hex heyaqꞌni.
6 ¿Tom mach heyohtajo huneꞌ tiꞌ xin?:
Haꞌ mak hanikꞌnhe yawal chakoj,
hanikꞌnhetikꞌapaxo isnhal chishatxꞌpaxokanh.
Walpaxo mak niman yawal chakoj kaw niman isnhal chishatxꞌkanh.
7 Jaqꞌaꞌwe jofrenda hununonh,
hatatikꞌa hanta chikotxum jaqꞌni,
machojabꞌ yinho bꞌiskꞌulal chijaqꞌa,
machojabꞌpaxo xin yinh lanhbꞌilal,
yuto Komam Dios kaw chitzala Komam yinh mak kaw yinh tzalahilal chaqꞌ yofrenda.
8 Yuto ay yip Komam yaqꞌni sunil isyaxil teyet,
hak tuꞌ xin machi hunu tzet ye tuꞌ tiꞌ matzet teyet;
wal xin chipalkꞌon yul heqꞌabꞌ yunhe hekolwa yinh tzet ye tuꞌ kꞌul.
9 Chal yul Yum Komam Dios hakaꞌ tiꞌ:
«Saqꞌal yet mak chiꞌaqꞌni tzet ye tuꞌ tet anma mebꞌaꞌ,
yu huneꞌ iskꞌulchꞌanil iskꞌul tuꞌ,
yuxin mach chito nahul huneꞌ mak tuꞌ yu Komam Dios,»a
xhihayoj.
10 Komam Dios chiꞌaqꞌni ixim hinhat chitzꞌunlaxi,
yebꞌpaxo sunil tzet chilolaxi.
Haꞌ xin Komam chiꞌaqꞌnipaxo teyet tzet cheyaqꞌ yinh heyofrenda tet Komam.
Hakaꞌtikꞌa hunu tzet ye tuꞌ chetzꞌunkanoj,
chanayo Komam isyaxilal yibꞌanh,
hak tuꞌ xin ye huneꞌ iskꞌulchꞌanil hekꞌul tuꞌ kaw tzetkꞌaxa chiꞌelkanikoj.
11 Hak tuꞌ xin kaw txꞌiꞌal tzet chijechabꞌ yunhe kaw txꞌiꞌal tzet cheyaqꞌpaxoj,
hak tuꞌ xin tzetkꞌa ebꞌnaj juxhta chiꞌaqꞌni yuchꞌandiosal tet Komam Dios yet chischahni ebꞌnaj huneꞌ heyofrenda chijitojanh bꞌay ay ebꞌnaj tuꞌ.
12 Hunteqꞌan kolwal cheyaqꞌ tiꞌ maxhnhetaj chikolwa yinh tzet ye tuꞌ matzet yul isqꞌabꞌ ebꞌnaj,
wal xin chiꞌiptzelipaxo yinh ebꞌnaj yaqꞌni yuchꞌandiosal tet Komam Dios.
13 Chahnipaxiko ebꞌnaj ismay Komam,
yuto cheyeloj tato yijem hex yinh Tzotiꞌ Kꞌul yet Kolbꞌanile yinh Komam Cristo,
yebꞌpaxo chexkolwa yinh txꞌiꞌal ebꞌnaj juxhtaj.
14 Ebꞌnaj juxhta chichahni hekolwal tuꞌ,
chitxahli ebꞌnaj teyinh,
kat kexisxahannhen ebꞌnaj yuto hex chexyaqꞌbꞌalnhe Komam Dios yinh heyenilo hunteqꞌan iskꞌulal iskꞌul Komam.
15 ¡Jaqꞌaꞌwe yuchꞌandiosal tet Komam Dios yu huneꞌ komatan!
(haꞌ ton Komam Jesucristo.)
Kaw xin mach chonhqꞌoji kotxumni hanta iskꞌulchꞌanil iskꞌul Komam.