Jofrenda chijaqꞌ tet Komam Dios
8
Tinanh xin hex wuxhtaj hex wanabꞌ,
chijaltojanh teyet yinh tzet yu isyeni isbꞌa iskꞌulchꞌanil iskꞌul Komam Dios yinh ebꞌnaj juxhtaj yebꞌ ebꞌix janabꞌ ay yul ismajul Macedonia tiꞌ.
2 Waxanhka kaw ay ilwebꞌal chihul yibꞌanh ebꞌnaj,
yajaꞌ kaw chitzala yanma ebꞌnaj,
yebꞌ xin waxanhka kaw mebꞌaꞌ ebꞌnaj,
yajaꞌ kaw chipalkꞌon ebꞌnaj yaqꞌni yofrenda,
hakaꞌtanhe kaw qꞌalom ebꞌnaj.
3 Hanintiꞌan chiwaqꞌ hinbꞌahan walnihan ta kaw yinh sunil yanma ebꞌnaj chaqꞌ ebꞌnaj yofrenda,
hatatikꞌa hanta ay yul isqꞌabꞌ ebꞌnaj,
ay bꞌay tiꞌ xin chipalkꞌon yaqꞌni ebꞌnaj.
4 Kaw ok ebꞌnaj yalaꞌ jetanh tato chikochahanh yofrenda ebꞌnaj,
yuto choche ebꞌnaj chikolwa ebꞌnaj yinh ebꞌnaj juxhta ay bꞌey Jerusalén.
5 Kaw ekꞌbꞌalkano yaqꞌ ebꞌnaj yibꞌanh hakaꞌ konanihanh.
Yuto yinh bꞌabꞌelal ishin isbꞌa ebꞌnaj yinh ismunil Komam Dios Jahawil,
lahwi tuꞌ xin yanipaxiko isbꞌa ebꞌnaj yijemal jetanh hakaꞌ choche Komam.
6 Yuxin xajalanh tet naj Tito ta chito naj ilwal teyinh,
kat ischahni naj hekolwal cheyaqꞌ yu iskꞌulchꞌanil hekꞌul,
yuto haꞌ naj ichiko ischahni hekolwal yet bꞌabꞌelal.
7 Hakaꞌojabꞌ ispalkꞌon iskawxi hekꞌul yinh Komam Dios yebꞌ hehelanil hetzoteli,
yebꞌ yitzꞌatil hewiꞌ,
yebꞌ yinh sunil heyanma chewatxꞌen hunu tzet ye tuꞌ,
yebꞌ konhhexahannhenpaxojanh;
hakojabꞌ tuꞌ ispalkꞌon heyaqꞌni heyofrenda tet Komam Dios.
8 Mach chejbꞌanile huneꞌ chiwaltiꞌan,
wal xin tonhe chiwochehan chiwalan teyet yinh iskꞌulchꞌanil iskꞌul hunteqꞌanxa ebꞌnaj juxhtaj.
Hakexpax tuꞌ yet cheyaqꞌni heyofrenda chohtanhelo ebꞌnaj bꞌay chiꞌaqꞌlax huneꞌ heyofrenda tuꞌ ta xahan cheyil ebꞌnaj.
9 Hanhonh tiꞌ johtaj ta Komam Jesucristo kaw kꞌulchꞌankano iskꞌul.
Kaw tzetkꞌa isqꞌalomal Komam ay bꞌey satkanh,
yajaꞌ yute isbꞌa Komam mebꞌaꞌil yuto kaw xahan ayonh yu yunhe jok qꞌalomal yul sat Komam Dios.
10 Chiwaltojan teyet tzet chiꞌekꞌ yinh innabꞌalan yinh heyofrenda,
yuto yettax hunbꞌi hex bꞌabꞌel kexichiko heyaqꞌni heyofrenda,
kaw xin yinh sunil heyanma heyaqꞌa.
11 Wal tinanh xin mach chebꞌej heyaqꞌni heyofrenda tuꞌ.
Wal xin aqꞌwe yinh sunil heyanma hakaꞌojabꞌ yu heyichenikoj,
hakojabꞌ tuꞌ xin cheyute tinanh,
hatatikꞌa tzet ay hex.
12 Yuto ta yinh sunil janma chijaqꞌ jofrenda,
kaw chitzala Komam Dios jinh,
hatatikꞌa tzet ay yul koqꞌabꞌ.
Wal xin mach chisqꞌan Komam hunu tzet ye tuꞌ jet ta machi yul koqꞌabꞌ.
13 Mach chiwochehan ta chexkan yinh manhtzetal yu hekolwa yinh hunuxa maka.
14 Yajaꞌ chiwochehan tato lahanojabꞌ tzet ayonh kosunil.
Yuxin tinanh,
hex ay tzet ay yul heqꞌabꞌ kolwahanhwe yinh ebꞌnaj matzet aya,
haxinwal haxa yet matzet ay hex haxa ebꞌnaj chikolwa teyinh.
Ta hak tuꞌ lahan chikokol-le kobꞌa.
15 Hakaꞌ yalni yul Yum Komam Dios,
bꞌay chala:
«Haꞌ mak tzetkꞌa yet iskutxbꞌakanh,
mach palkꞌonkanh yul isqꞌabꞌ.
Haxa mak hanikꞌnhe yet iskutxbꞌakanh xin,
kꞌuxannhe ekꞌ yu,»a
xhihayoj.
Yet isto naj Tito yebꞌ hunteqꞌan ebꞌnaj juxhta bꞌey Corinto
16 Chiwaqꞌan yuchꞌandiosal tet Komam Dios,
yuto haꞌ Komam aniko yul yanma naj Tito kexyaniko yinh iskꞌul,
hakaꞌtikꞌa heyeko yinh inkꞌulan.
17 Yuxin hayet walnihan tet naj tato chito naj ilwal teyinh,
kaw yinh anhe istaqꞌwe naj istohi yuto ayko yinh iskꞌul naj isto kexyilnoj.
18 Ay xin huneꞌ naj juxhta tiꞌ chijatojanh yetbꞌiho naj Tito.
Haꞌ huneꞌ naj tiꞌ kaw kꞌul istzotel ebꞌnaj juxhtaj yul hunteqꞌanxa konhobꞌ yinh naj,
yuto kaw kꞌul ismunil naj yinh yalnikꞌo Tzotiꞌ Kꞌul yet Kolbꞌanile yinh Komam Jesucristo.
19 Haꞌ naj xin saybꞌil yu ebꞌnaj juxhtaj yu yok naj jetbꞌihojanh,
kat iskolwa naj jinhanh iskutxbꞌankanh chꞌen yofrenda ebꞌnaj juxhtaj.
Hak tuꞌ xin chiꞌilchalo iskꞌulchꞌanil iskꞌul Komam Dios jinh,
kat yilchapaxilo iskꞌulchꞌanil hekꞌul.
20 Hak tuꞌ chijutehanh yunhe machi hunu mak chihobꞌnikanh leqꞌtiꞌal jinhanh yinh chꞌen kolwal kaw ay yelapno chikokutxbꞌakanh tuꞌanh.
21 Yuxin chijako yinh kokꞌulanh ta kꞌul chijute kobꞌahanh yinh huneꞌ munil tiꞌ;
maxhnhetaj sata Komam Dios,
wal xin to kꞌul chijutepaxo kobꞌahanh sata anma.
22 Ay xin huneꞌxa naj juxhta chijatojanh yinta ebꞌnaj tiꞌ,
huneꞌ naj juxhta tiꞌ txꞌiꞌalxa el chijilanh tato kaw chitzala naj iskolwahi bꞌajxanhetikꞌa yinh tzet ye tuꞌ.
Yuxin tinanh kaw ekꞌbꞌalto chitzala naj yuto ayexiko yipo yanma naj.
23 Ta ay mak chiqꞌambꞌen teyet tzet ye naj Tito,
cheyala ta wetbꞌi hinbꞌahan yebꞌ naj,
yuxin chinchejtojan naj yu iskolwa naj teyinh.
Yebꞌ xin ta ay mak chiqꞌambꞌenpaxo yinh ebꞌnaj kawanh,
cheyala tato chejbꞌilto ebꞌnaj yu ebꞌnaj juxhtaj ay yul hunteqꞌanxa konhobꞌ ay bꞌey tiꞌ.
Ebꞌnaj tiꞌ kaw chisyelo ebꞌnaj iskꞌulchꞌanil Komam Cristo yu tzet chiswatxꞌe.
24 Kaw chiwochehan tato kꞌul chu hechahni ebꞌnaj,
haxinwal chil hunteqꞌanxa ebꞌnaj juxhtaj tato yeli kꞌul hex,
hakaꞌ yu walnitojan teyinh.