2 ¡Aweyto yul heyanma yinh tzet chijalanh!

Kaw machi hunujex bꞌay kowatxꞌehanh hunu istxꞌojal.

Machi hunujex etaxnato henabꞌal juhanh.

Machipaxo hunujex kexjaqꞌ subꞌchahojanh.

3 Maxhtaj yu istak hekꞌul yuxin chiwaltojan hunteqꞌan tiꞌ teyet,

wal xin hakaꞌtikꞌa walnihan teyet yet yalanhtokanoj,

kaw ayexiko yinh wanmahan.

Yuxin waxanhka itzitz hinan maka lanhanxa inkaman huneꞌnhetikꞌa haꞌ yeko wanmahan teyinh.

4 Kaw yinh sunil wanmahan chintzotelan teyet yebꞌ xin kaw chintzalahan teyinh,

waxanhka lanhan wilnihan isyaꞌtajil bꞌey tiꞌ,

yaj kaw chiqꞌ yip wanmahan,

yebꞌ kaw chiꞌokkano huneꞌ niman tzalahilal yinh wanmahan chiwabꞌehan.

5 Yettaxtikꞌa julanh bꞌey ismajul Macedonia tiꞌ,

maxhtikꞌa nino aqꞌankꞌulal chijilanh.

Bꞌajxanhetuꞌwal chonhekꞌanh haꞌ isyaꞌtajil chichahlo juhanh;

haꞌ yichelax howal jinhanh haꞌ chu anma;

haꞌ istakbꞌal kokꞌulanh haꞌ chꞌaqꞌlaxi.

6 Yaj Komam Dios chiꞌiptzen anma bꞌiskꞌulal yehi,

haꞌ Komam aqꞌni yaqꞌlobꞌal kokꞌulanh yet yul naj Tito bꞌey tiꞌ.

7 Yajaꞌ maxhnhetaj yu hul naj yuxin chitzala kokꞌulanh,

wal xin to yu jabꞌehanh ta heyaqꞌ yaqꞌlobꞌal iskꞌul naj yet isbꞌeykꞌo naj texol,

yebꞌ yu cheyoche konhheyilaꞌanh.

Yalnipaxo naj ta kaw bꞌiskꞌulal heyehi yinh tzet yu texol,

yebꞌpaxo ta ayinikojan yinh hekꞌul.

Hayet wabꞌenan hunteqꞌan tuꞌ kaw yiqꞌkano yip tzalahilal yul wanmahan.

8 Kaw tak inkꞌulan yet wabꞌenan ta ok bꞌiskꞌulal teyinh hayebꞌ tzꞌayik yet heyabꞌen tzet yal teꞌ carta watojan teyet,

yajaꞌ wal tinanh xin matxa chiwiqꞌ bꞌiskꞌulalan yinh huneꞌ tuꞌ.

9 Waxanhka heyiqꞌ bꞌiskꞌulal yaj chintzalahan yinh yuto hebꞌiskꞌulal tuꞌ haꞌ aqꞌni hetxumulo henani hebꞌa hakaꞌ choche Komam Dios.

Machi xin nichꞌano tzet etanto henabꞌal yinh tzet yal teꞌ carta tuꞌ.

10 Tato chijiqꞌ bꞌiskꞌulal hakaꞌ choche Komam Dios,

huneꞌ bꞌiskꞌulal tuꞌ chiꞌaqꞌni kotxumuꞌloj ta yilal konani kobꞌa kat xin kokolchakanoj.

Ta hak tuꞌ ye chal tuꞌ machojabꞌ chitak kokꞌul yu bꞌiskꞌulal.

Ay huneꞌxa bꞌiskꞌulal yet yul sat yibꞌanhqꞌinal tiꞌ,

huneꞌ bꞌiskꞌulal tuꞌ chonhyito yinh kamikal mach istanhbꞌal.

11 Yajaꞌ hex tiꞌ,

xaheyiqꞌ bꞌiskꞌulal hakaꞌ choche Komam Dios,

kaw xin txꞌiꞌalxa iskꞌulal chaqꞌ teyet,

yuto haꞌ aniko yinh heyanma hewatxꞌenayo huneꞌ isyaꞌtajil yu texol tuꞌ,

hak tuꞌ yu hekolni hebꞌa.

Istit hehowal,

ischiwakanh hekꞌul yu huneꞌ tzet yu texol tuꞌ,

yuxin kaw txꞌiꞌal el heyoche ta ayinikꞌojan texol.

Yajaꞌ xin heyayo isyaꞌtajil yibꞌanh naj yako ismul tuꞌ,

hak tuꞌ yu heyeniloj ta maxhtaj hunex yinh huneꞌ ismul naj iswatxꞌe tuꞌ.

12 Yuxin huneꞌ carta intzꞌibꞌnhetojan tuꞌ maxhnhetaj yu naj ok ismul yuxin intzꞌibꞌnhetojan,

maxhnhetajpaxo yu naj bꞌay ok ismul naj tuꞌ,

wal xin to yunhe isyenilo isbꞌa yul sat Komam Dios ta kaw ayonhikojanh yipo hekꞌul.

13 Sunil hunteqꞌan tuꞌ aniko yip janmahanh,

maxhnhetaj yu hunteqꞌan tuꞌ,

wal xin kaw konhtzalakanhanh yet yalni naj Tito jetanh ta kaw saqꞌal yu hechahni naj yebꞌ ta kaw yaqꞌ tzalaho iskꞌul naj texol.

14 Isyelal walan,

yet walnihan tet naj Tito tato kaw kꞌul hex.

Heyohtaj tato istꞌinhanilnhetikꞌa chiwalan,

yebꞌpaxo xin mach leqꞌtiꞌalo eliko yinh tzet walan tet naj teyinh.

15 Yuxin haꞌ tinanh,

kaw ekꞌna xahan chexyil naj,

yuto chitit yul iskꞌul naj tato kaw yijem heyute hebꞌa yet isbꞌeykꞌo naj texol,

yebꞌ xin kaw xahan heyil naj yet ay naj tekꞌatanh.

16 ¡Kaw chintzalahan teyinh yuto chisje hexwanikojan yipo wanmahan!