Yet ischahni ebꞌyaꞌ ischejabꞌ Komam Jesucristo yaꞌ Pablo yetbꞌihoj
2
Yinhxa 14 (iskanhlahonhebꞌ) habꞌil intohan bꞌey Jerusalén yebꞌ juxhta Bernabé,
yebꞌpaxo juxhta Tito.
2 Kinbꞌeykꞌojan,
yuto Komam Dios halni wetan tato chintohan.
Hayet ayinan bꞌey Jerusalén tuꞌ,
kokutxbꞌanayo kobꞌahanh yebꞌ ebꞌyaꞌ chiꞌijbꞌali xol ebꞌnaj juxhtaj,
walnihan tet ebꞌyaꞌ yinh kuybꞌanile yet kolbꞌanile chiwalikꞌojan xol anma mach Israeloj.
Walan huneꞌ tiꞌ tet ebꞌyaꞌ yunhe isnahnilo ebꞌyaꞌ tato tꞌinhan wehikojan,
yebꞌ xin ta mach nabꞌnheho chinmunlahan.
3 Haꞌ hun juxhta Tito tzujan jintajanh waxanhka griego yikꞌal naj,
yajaꞌ machi hunu mak ischilbꞌa yalni tato masan chiyaqꞌ circuncidar isbꞌa naj.
4 Waxanhka xin ay hunteqꞌan ebꞌnaj tonhe chal isbꞌa yuninalo Komam Dios,
ok ebꞌnaj koxolanh yunhe yok ebꞌnaj yilno huneꞌ kokolbꞌanil yinh Komam Jesucristo;
yuto yoche ebꞌnaj chonhmeltzohanh hunelxa yalanh isyaꞌtajil isley yaꞌ Moisés.
5 Yaj xin,
kaw maxhtikꞌa nino jabꞌetojanh tzet yal ebꞌnaj yuto kaw chijochehanh ta aynhetikꞌako isyelal huneꞌ Tzotiꞌ Kꞌul yet Kolbꞌanile tiꞌ teyinh.
6 Yet walnihan sunil kuybꞌanile tuꞌ,
kaw machi hunuxa akꞌ aqꞌlaxkano inkuyuꞌan yu ebꞌyaꞌ ijbꞌalom tuꞌ.
(Haꞌ tzet ye ebꞌyaꞌ yet yalanhtokanoj,
kaw machi wokan yinh,
yuto yul sat Komam Dios kaw lahanonhnhe kosunil.)
7 Machi hunuxa nan kuybꞌanile ahti yul istiꞌ ebꞌyaꞌ,
wal xin kaw istxum ebꞌyaꞌ tato haꞌ Komam Dios aqꞌnhe huneꞌ inmuniltiꞌan yinh walnikꞌojan Istzotiꞌ Komam Dios xol anma mach Israeloj,
hakaꞌ yu yalaxiko yaꞌ Pedro munlaho xol wet konhobꞌ Israelan.
8 Haꞌtikꞌa Komam Dios aqꞌnhe ishelanil yaꞌ Pedro yok kuywal xol anma Israel,
haꞌtikꞌapaxo Komam aqꞌnhe inhelanilan wokan kuywal xol anma mach Israeloj.
9 Yuxin juxhta Jacobo,
yebꞌ juxhta Pedro,
yebꞌ xin juxhta Juan,
ebꞌyaꞌ ayko ijbꞌalomal yinh makta ayxako yul isqꞌabꞌ Komam,
kaw txumchalo yu ebꞌyaꞌ tato Komam Dios aqꞌnhe huneꞌ inmuniltiꞌan yinh weltojan walnokꞌojan Istzotiꞌ Komam Dios xol anma mach Israeloj.
Haꞌ huneꞌ tiꞌ yeniloj tato konhischahanh ebꞌyaꞌ yetbꞌihoj.
Yaqꞌni ebꞌyaꞌ isqꞌabꞌ wetan yebꞌ xin tet juxhta Bernabé,
kaw xin chitzala iskꞌul ebꞌyaꞌ ta chonhmunlahanh xol anma mach Israeloj,
walpaxo ebꞌyaꞌ xin xol anma Israel kankano ebꞌyaꞌ munil.
10 Kachan huneꞌ tiꞌ yal ebꞌyaꞌ jetanh,
tato yilal konanitijanh anma mebꞌaꞌ,
huneꞌ tuꞌ nabꞌiltikꞌa wuhan inwatxꞌenan.
Yet iskachlax yaꞌ Pedro yu yaꞌ Pablo yul konhobꞌ Antioquía
11 Yet yapni juxhta Pedro yul konhobꞌ Antioquía,
inkachan yaꞌ yinh sat sunil ebꞌnaj juxhtaj,
yuto maxhtaj istoholal chiswatxꞌe juxhta tuꞌ.
12 Yuto yet yalanhto maxhto chiꞌapni hunteqꞌan ebꞌnaj chejbꞌil yu juxhta Jacobo,
yaꞌ Pedro tuꞌ chiwaꞌ xol ebꞌnaj ayxako yul isqꞌabꞌ Komam Dios mach Israeloj.
Haxa yet yapni ebꞌnaj tuꞌ xin,
nixhtejal ishitzilo yaꞌ,
ispohnilo isbꞌa yaꞌ xol ebꞌnaj mach Israelo tuꞌ yu xiwkanh yaꞌ tet ebꞌnaj chalni ta yilal yaqꞌlax circuncidar ebꞌnaj mach Israeloj.
13 Aypaxo xin ebꞌnaj juxhta Israel ok tzujno yinta tzet isbꞌeybꞌalnhe juxhta Pedro tuꞌ,
hakpax tuꞌ juxhta Bernabé isbꞌeybꞌalnhepaxo yaꞌ huneꞌ sukal tuꞌ.
14 Yuxin hayet wilnihan tato mach chisyije ebꞌyaꞌ hakaꞌ yalni Tzotiꞌ yet kolbꞌanile,
walnihan tet juxhta Pedro yinh sat sunil ebꞌnaj kutxaniko tuꞌ:
«Wal hach tiꞌ Israel hach,
yajaꞌ chaxhekꞌ hakaꞌ anma mach Israeloj,
yajaꞌ tinanh xin ¿tzet yinh yuxinto chawal tet ebꞌnaj mach Israeloj tato yilal chikꞌo ebꞌnaj isbꞌeybꞌal anma Israel?»
kinchihan tet juxhta tuꞌ.
Sunil anma chischah iskolbꞌanil tato chako isbꞌa yul isqꞌabꞌ Komam Jesucristo
15 Wal hanhonh Israel jikꞌal tiꞌ,
mach yikꞌalo hunteqꞌanxa nan konhobꞌal chihal-lax mulumal jehi.
16 Yaj xin johtaj tato machi hunu mak chikan kꞌulal yul sat Komam Dios yu isley yaꞌ Moisés,a
wal xin chikan anma kꞌulal,
yajaꞌ kachannhe yu yaniko yanma yinh Komam Jesucristo.
Hakonh tuꞌ hanhonh tiꞌ xajayto yul janma yinh Komam Jesucristob yuxin xakonhkan kꞌulal yul sat Komam Dios,
maxhtaj yu koyijen tzet chal ley.
Wal xin kaw machi hunu mak chikan kꞌulal yul sat Komam Dios yu isyijen tzet chal isley yaꞌ Moisés.
17 Tato chikosay jok kꞌulal yul sat Komam Dios yu yip Komam Jesucristo,
chal yelapnoj ta mulumonh hakaꞌ anma mach Israeloj.
Yajaꞌ ¿tom haꞌ Komam Jesucristo chonhaniko mulumal?
¡Machoj!
18 Qꞌinalo tato chinmeltzohan wintajan,
kat wokan inwatxꞌenpaxojan sunil tzet bꞌejbꞌilkano wuhan yet payxa,
hankawinan chiwako inmulan yinh hakaꞌ tuꞌ.
19 Wal hanintiꞌan kamnajinxalojan yinh ley.
Haꞌ huneꞌ ley tuꞌ kinaqꞌni kamojan yunhe kaw witzitzbꞌilojan yinh Komam Dios.
20 Wal tinanh,
haꞌ yul sat Komam Dios,
kinalaxkanhan yinh kulus yinta Komam Cristo,
yuxin matxataj hinan itzitz hinan tinanh,
haxa Komam Jesucristo itzitz winhan.c
Haꞌ tzet chinwatxꞌehan tinanh xin kachannhe waniko wanmahan yinh Iskꞌahol Komam Dios,
haꞌ chiwuhan.
Kaw isyelo Komam ta xahan ayinan yu,
yuto yaqꞌkamo isbꞌa winhan.
21 Mach chikoyah iskꞌulchꞌanil iskꞌul Komam Dios.
Wal xin ta yu koyijen ley yuxin chonhkan kꞌulal yul sat Komam Dios,
kaw nabꞌnhem kam Komam Jesucristo chal tuꞌ.