3 Jalaꞌwe tzotiꞌ kꞌul tet Komam Dios,

Ismam Komam Jesucristo Jahawil,

yuto kaw txꞌiꞌal iskꞌulal iskꞌul Komam xayaqꞌ jet,

hunteqꞌan iskꞌulal chiyaqꞌ tet janma chitit yul satkanh yuto hunxa je yebꞌ Komam Jesucristo.

4 Yet yalanhtokanoj yet maxhto chiwatxꞌi huneꞌ yul sat yibꞌanhqꞌinal tiꞌ,

yok yinh isnabꞌal Komam Dios konhissikꞌnikanilo yu Komam Jesucristo,

yunhe jokkano yeto Komam yebꞌ matxa nino komul yul sat.

5 Kaw chonhyoche Komam Dios yuxinto kaw yettax payat konhissaynikanilo Komam yu konhyaniko yuninaloj yaj yu Komam Jesucristo;

hakaꞌtikꞌa kaw el yinh iskꞌul Komam Dios.

6 Yu huneꞌ tuꞌ yuxinto chijako ismay Komam Dios yu issaqꞌalil iskꞌulchꞌanil iskꞌul.

Xayaqꞌ Komam iskꞌulal iskꞌul jet yu Iskꞌahol kaw xahan ay yu.

7 Yu iskꞌulchꞌanil iskꞌul Komam Dios yuxin ay kokolbꞌanil,

yu ischikꞌil Iskꞌahol malto yinh teꞌ kulus yaqꞌnikano tanho sunil komul.

8 Kaw isyelo Komam iskꞌulal iskꞌul jet yuto yaqꞌkano Komam kohelanil,

yaqꞌnipaxo Komam konabꞌal.

9 Kaw yaqꞌ Komam johtanhelo yinh tzet nabꞌil yu,

huneꞌ ewantikꞌa yehi.

Huneꞌ iskꞌulal tuꞌ kaw nabꞌilxatikꞌa yu Komam iswatxꞌen yinh Komam Jesucristo.

10 Huneꞌ nabꞌiltikꞌa yu Komam Dios tuꞌ,

tꞌinhan yijni isbꞌa yinh istzꞌayikal bꞌay halbꞌilkanoj yu Komam,

tato chishunbꞌako Komam sunil tzet ay yul satkanh,

yebꞌ sunil tzet ay yul sat yibꞌanhqꞌinal tiꞌ,

kat iskankano yalanh yip Komam Jesucristo.

11 Yuxinto kaw yalanhto konhissikꞌlenkano Komam Dios,

yunhe kochahni komajul yinta Komam Jesucristo,

hakaꞌtikꞌa nabꞌil yu Komam Dios.

Haꞌ Komam Dios tuꞌ,

haꞌ kaw chiꞌaqꞌni yijaꞌ isbꞌa yinh ej tzet kaw chitikꞌa yal iskꞌul.

12 Hak tuꞌ xin yute Komam yunhe hanhonh bꞌabꞌel kochayto Komam Jesucristo yul janma chikoyelo ishelanil yip Komam Dios.

13 Yebꞌpaxo hex tiꞌ,

yet heyabꞌen isyelal kuybꞌanile yet kolbꞌanile heyanayto yul heyanma yinh Komam Jesucristo.

Yaqꞌlax Komam Espíritu Santo yinh heyanma,

Komam haltebꞌilkanoj.

Haꞌ xin kaw chiyeniloj tato yetxa Komam Dios heyehi.

14 Yu Komam Espíritu Santo ayxako jinh,

yuxin johtaj tato kaw yeli chikochah komajul chaqꞌaꞌ Komam Dios jet.

Yet chijni isbꞌa yaqꞌni Komam Dios iskolbꞌanil sunil anma yetxatikꞌa yehi,

yu yalaxiko ismay Komam yu ishelanil.

15 Abꞌebꞌilxa wuhan tato kaw ayko heyanma yinh Komam Jesucristo Jahawil,

yebꞌ ta kaw xahan cheyil sunil makta yetxa Komam Dios yehi.

16 Yuxin mach chinsikilojan waqꞌnihan yuchꞌandiosal tet Komam teyinh yet chintxahlihan.

17 Kaw chinqꞌanan tet Komam isDiosal Jahawil Jesucristo,

Komam Mame kaw ay ismay,

tato chaqꞌ Komam hehelanil yu Komam Espíritu Santo yunhe hetxumni tzet chaqꞌ Komam heyohtanheloj,

haxinwal cheyohtanhelo Komam yinh kaw kꞌul.

18 Kaw chinqꞌanan tet Komam Dios tato chiyaqꞌ hajlo Komam henabꞌal,

yunhe heyohtanhenilo huneꞌ iskawxobꞌal kokꞌul bꞌay awtebꞌilonh,

kat hetxumnilo huneꞌ komatan chaqꞌ Komam jet,

hanhonh ayonhxako yuninalo Komam.

19 Chinqꞌanpaxojan tet Komam tato kaw cheyohtanheloj ta machi isbꞌi hanta yip Komam chimunlako jinh,

hanhonh ayonhxako yul isqꞌabꞌ Komam,

yebꞌ xin machi bꞌay kachankan apno yip.

Huneꞌ yip Komam Dios tuꞌ kaw isyelo yinh sikꞌlebꞌil.

20 Yet yaqꞌni itzitzbꞌokanh Komam Dios Komam Jesucristo xol anma kamom,

yanipaxkaniko Komam Komam Jesucristo tuꞌ yinh iswatxꞌqꞌabꞌ yul satkanh.

21 Yokpaxo Komam Jesús tuꞌ yahawilo yibꞌanh sunil mak ay yip,

mak yahawil,

mak ijbꞌalom,

yebꞌ yibꞌanh mak yijebꞌil tzet chala.

Maxhnhetaj yibꞌanh mak ay yul huneꞌ tiempohal tiꞌ,

to yibꞌanhpaxo sunil yahawil yinh huneꞌxa tiempohal chihul kosataj.

22 Kaw sunil tzettaj ye tuꞌ yakaniko Komam Dios yalanh yip Komam Jesucristo.

Haꞌ Komam Dios anikaniko Komam Jesucristo iswiꞌehalo yinh sunil anma ayxako yul isqꞌabꞌ.

23 Haꞌ yuninal Komam Dios,

hakaꞌ isnimanil Komam Jesucristo yehi,

yuxin kosunil istzꞌajanil Komam ayko jinh.

Haꞌ Komam xin chiꞌaqꞌni tzꞌajnaho sunil tzettaj ye tuꞌ.