3 Hunta el chextit yul inkꞌulan,

kaw chiwaqꞌan yuchꞌandiosal tet Komam Dios teyinh.

4 Yet chintxahlihan tet Komam Dios,

kaw chitzalakano inkꞌulan inqꞌannihan iskꞌulal iskꞌul Komam teyibꞌanh hunun hex.

5 Yuto haꞌ hunexpaxo chexkolwa hepujbꞌanikꞌo Tzotiꞌ yet kolbꞌanile jintajanh,

yettaxtikꞌa heyaniko hebꞌa yul isqꞌabꞌ Komam Jesucristo masanta tinanh.

6 Kaw tꞌinhan wehikojan tato hakaꞌ yu yicheniko Komam Dios ismunil teyinh,

hak tuꞌ chu islahniko kexiswatxꞌeniko yinh iskꞌulal masanto yet chihul Komam Jesucristo hunelxa.

7 Kaw yilaltikꞌa innanihan hakaꞌ tiꞌ teyinh hesunil,

yuto kaw xahan ay hex wuhan,

yebꞌ xin haꞌ hunex chexkolwa winhan yinh huneꞌ munil aqꞌbꞌil wettiꞌan yu Komam,

hak tuꞌ xin haꞌ hunex chechah iskꞌulchꞌanil iskꞌul Komam.

Chexkolwa winhan waxanhka ayiniktojan yul preso maka yet chinokan sata ebꞌnaj yahawil yu inkolnihan huneꞌ tzotiꞌ yet kolbꞌanile tiꞌ kat walnihan ta kaw yeli.

8 Kaw yohta Komam Dios ta kaw xahan ay hex wuhan hesunil,

hakojtam Komam Jesucristo chexxahannheni.

9 Kaw chinqꞌanpaxojan tet Komam Dios yinh intxahan tato kaw ekꞌna xahan cheyil hebꞌa hunun hex yebꞌ ta kaw chiyaqꞌ Komam hehelanil yebꞌ henabꞌal.

10 Yunhe heyohtanhen hesaynilo bꞌaytet kaw kꞌul,

hak tuꞌ xin kaw kꞌulnhetikꞌa tzet chebꞌeybꞌalnhe,

haxinwal machi istxꞌojal chiꞌilchalo teyinh yet chihul Komam Jesucristo.

11 Yebꞌ xin sunil iskꞌulal chitit yinh Komam Jesucristo ayexiko hebꞌeybꞌalnheni yunhe isbꞌina Komam yebꞌ yu yokpaxo ismay Komam.

12 Hex wuxhtaj,

hex wanabꞌ,

chiwochehan cheyohtanheloj tato hunteqꞌan isyaꞌtajil chiwiltiꞌan chikolwa yinh ispujbꞌalaxikꞌo Tzotiꞌ yet kolbꞌanile.

13 Kaw sunil mak ay yul palacio yebꞌ sunil anma ohtanheni ta ayinikojan preso isyayil ischejabꞌ Komam Jesucristo wehan.

14 Hayet yil-laxi ta preso wehan,

kaw tzetkꞌa ebꞌnaj juxhta yihti yanma ispujbꞌanilto Tzotiꞌ yet kolbꞌanile.

Kaw matxa chixiw ebꞌnaj yalnikꞌoj yuto kaw yako ebꞌnaj Komam Dios Jahawil yipo yanma.

15 Walka xin yinh kaw yeli,

ay mak chihalni Istzotiꞌ Komam Cristo yu chichiwa iskꞌul winhan,

kat xin ispalkꞌon wibꞌanhan chiyute isnahni.

Aypaxo xin ebꞌnaj juxhta tiꞌ kꞌul tzet nabꞌil yu yuxinto chiyalikꞌoj.

16-17 Ay mak chihalnikꞌo Istzotiꞌ Komam Jesucristo yu ay tzet chiyochekoj,

mach kaw yelo iskꞌul chiyalnikꞌoj,

yuto choche yaqꞌaꞌko yaqꞌbꞌil isyaꞌtajil wibꞌanhan yulbꞌal ayiniktijan yul preso tiꞌ.

Aypaxo mak xin chalikꞌo yinh sunil yanma,

kaw xin yohtaj tato ayinikojan preso tiꞌ yu inkolnihan Tzotiꞌ yet kolbꞌanile yakano Komam Jesucristo koxol.

18 Yajaꞌ machi wokan yinh ta kꞌul nabꞌil yu ebꞌnaj maka mach xin,

tanhe chihal-laxikꞌo Istzotiꞌ Komam Jesucristo;

wal xin kaw chintzalahan yu chihal-laxikꞌo Istzotiꞌ Komam.

Yaj xin kaw ekꞌbꞌalto chintzalahan,

19 yuto wohtajan tato yu chextxahli winhan yebꞌ yu iskolwal Yespíritu Komam Jesucristo winhan,

hunteqꞌan tiꞌ chikolwa kiniskolnihan.

20 Yajaꞌ haꞌ huneꞌ chiwochehan yebꞌ ayko yinh wanmahan,

tato mach chinkanan yinh txꞌixwilal,

wal xin to haꞌ intzotelan yinh sunil wanmahan hakaꞌtikꞌa yet yalanhtokanoj.

Waxanhka itzitz hinan maka chinkaman chiwochehan ta chiꞌil-lax iskꞌulal Komam Jesucristo winhan.

21 Yuto yulbꞌal yet itzitz hinan,

hanhkꞌanhe ismunil Komam Cristo ayko yinh wanmahan inwatxꞌenan;

taka chinkaman xin ekꞌbꞌal kaw kꞌul chinelikojan.

22-23 Yuxin tato yet itzitz hinan yinh inchibꞌehaltiꞌan,

chiyu inmunlahan ninoxa yinh ismunil Komam Jesucristo,

yuxin kaw mach wohtajojan bꞌaytet wal insaynilojan xol kabꞌebꞌ tiꞌ;

yuto ay walaꞌan tato chinkamnahan,

kat intohan iskꞌatanh Komam Jesucristo,

yuto ekꞌna kꞌul huneꞌ tuꞌ.

24 Yajaꞌ xin,

kaw yilal itzitz hinan hanikꞌoxa yul sat yibꞌanhqꞌinal tiꞌ yu inmunlahan texol.

25 Kaw xin tꞌinhan wehan yinh tiꞌ,

tato chitokinehayojan texol yu inkolwahan teyinh hechꞌibꞌi,

yebꞌ yunhe kam heyabꞌen tzalahilal,

yu xaheyayto yul heyanma yinh Komam.

26 Hayet chinapnihan tekꞌatanh hunelxa,

cheyaqꞌ tzalaho hekꞌul yinh Komam Jesucristo.

27 Hach kachannhe chiwaltojan teyet tato cheyako yinh hekꞌul hebꞌeybꞌalnhen hakaꞌ kuybꞌanile aykano jet yu Komam Jesucristo.

Hak tuꞌ xin waxanhka chintohan kexintukleꞌan maka machoj,

chiwochehan wabꞌehan heqꞌumal hesunil tato kaw tohol heyehikoj,

yebꞌ xin tato kaw hun chiyu hemunlahi,

yebꞌpaxo xin lahan helahniko hesunil heyaniko heyanma yinh Tzotiꞌ yet kolbꞌanile,

28 yebꞌ xin mach chexxiw tet ebꞌnaj kaj chexilni.

Hak tuꞌ chiyu isyenilo isbꞌa tato chikꞌaykanto ebꞌnaj tuꞌ yinh hunelnhe,

yebꞌpaxo xin hak tuꞌ chu heyeniloj tato ayxa hekolbꞌanil yu Komam Dios.

29 Yu iskꞌulchꞌanil iskꞌul Komam Jesucristo xayaqꞌ jet,

maxhnhetaj janiko janma yinh,

haꞌ wal juni,

wal xin yilal jaqꞌni kabꞌo kobꞌa jabꞌen isyaꞌtajil yinta Komam.

30 Hex tiꞌ,

hunlahan heyaqꞌni heyip helinhbꞌan hebꞌa xol isyaꞌtajil hakaꞌ intiꞌan.

Kaw xaheyila tato kaw waqꞌ wanmahan inlinhbꞌan hinbꞌahan xol isyaꞌtajil texol,

tinanh xin lanhan heyabꞌeni tato huneꞌnhe haꞌ waqꞌni wanmahan xol isyaꞌtajil.