3 Hunta el yet chonhtxahlihanh teyinh kaw chijaqꞌanh yuchꞌandiosal tet Komam Dios,

Ismam Komam Jesucristo,

4 yuto jabꞌehanh isqꞌumal tato kaw ayko heyanma yinh Komam Jesucristo,

yebꞌ xin tato kaw xahan cheyil sunil makta ayxako yul isqꞌabꞌ Komam.

5 Hak tuꞌ cheyute,

yuto ayexiko heyechman huneꞌ hematan ay bꞌey yul satkanh.

Yettax heyabꞌen Tzotiꞌ Kꞌul yet Kolbꞌanile kaw yel chala,

hatax tuꞌ heyichiko heyaniko huneꞌ tuꞌ yipo heyanma.

6 Huneꞌ kuybꞌanile halbꞌilxa heyabꞌeꞌ,

kaw lanhan ispujnakanh yabꞌelaxilo yul hunun konhobꞌ yul sat yibꞌanhqꞌinal tiꞌ.

Kaw xin ay iskꞌulal chakanoj.

Hakaꞌtikꞌa yu texol yet heyabꞌenilo iskꞌulchꞌanil iskꞌul Komam Dios,

yebꞌ xin heyohtanheloj ta kaw yeli.

7 Haꞌ juxhta Epafras kexkuynikano yinh hunteqꞌan tuꞌ,

kaw xahankano ay naj juhanh yuto kaw jet munlawomal kobꞌahanh yebꞌ naj.

Kaw yijem chiyute isbꞌa naj ismunla yinh tzet chal Komam Jesucristo texol.

8 Haꞌ naj halni jetanh tato kaw xahan cheyil hebꞌa yu Komam Espíritu Santo.

9 Yuxin hayet jabꞌenanh heqꞌumal tuꞌ,

kaw mach chikobꞌejanh kotxahlihanh teyinh.

Chikoqꞌannihanh tet Komam Dios tato kaw chiꞌaqꞌlax hehelanil yebꞌ henabꞌal yu Komam Espíritu Santo,

kat heyohtanhenilo sunil tzet choche Komam teyinh.

10 Hak tuꞌ xin chu hebꞌeybꞌalnhen tzettaj chisbꞌeybꞌalnhe makta yetxa Komam Dios Jahawil,

yebꞌ hewatxꞌen tzet choche iskꞌul,

yebꞌ hewatxꞌen sunilal iskꞌulal,

yebꞌ xin heyohtanhenilo Komam yinh kaw kꞌul.

11 Kaw chonhtxahlihanh teyinh,

haxinwal haꞌ Komam chꞌaqꞌni heyip helinhbꞌan hebꞌa yu huneꞌ yip Komam kaw aykano yelapnoj,

hak tuꞌ xin kaw chexqꞌoji istecha sunil heyu,

yebꞌ kaw ay henimankꞌulal.

12 Yebꞌ xin cheyaqꞌ yuchꞌandiosal tet Komam Dios yinh kaw tzalahilal,

yuto xayaqꞌ Komam toholbꞌoko konabꞌal yuxin ay jok yinh kochahni komajul yinta makta yetxa Komam Dios yehi,

ayxako xol sajilqꞌinal.

13 Haꞌ Komam kolnhehonhilo yul isqꞌabꞌ qꞌejholo,

konhyaniko yul isqꞌabꞌ Komam Jesucristo,

Iskꞌahol kaw xahan ay yu.

14 Haꞌ Komam tuꞌ xin,

kolnhehonhilo yet iskam yinh teꞌ kulus,

yaqꞌnikano tanho komul yu iskamikal tuꞌ.

15 Waxanhka mach chijiliko yinh Komam Dios,

yaj Komam Jesucristo Iskꞌahol Komam Dios tuꞌ yenhelo Komam jet,

yuto kaw Diospaxo Komam Jesús.

Haꞌ Komam bꞌabꞌel yebꞌ ekꞌbꞌal yelapno yibꞌanh sunil tzet watxꞌebꞌil yu Komam Dios.

16 Yu Komam Jesucristo tuꞌ,

iswatxꞌe Komam Dios sunil tzet ay yul satkanh yebꞌ sunil tzet ay yul sat yibꞌanhqꞌinal tiꞌ;

sunil tzettaj chijiliko yinh,

yebꞌ sunil tzettaj ye tuꞌ mach chijiliko yinh.

Yu Komam,

Iskꞌahol Komam Dios xin,

iswatxꞌe Komam Dios sunil mak ayko yahawiloj,

yebꞌ sunil mak kaw ay yip,

yebꞌ sunil mak ayko iswiꞌehaloj.

Yu Komam Jesucristo yuxin watxꞌi sunil tuꞌ.

17 Ayxatikꞌa Komam Jesucristo yalanhto maxhto chiwatxꞌi sunil yul sat yibꞌanhqꞌinal tiꞌ,

yinh xin Komam tzabꞌan sunil tzettaj ye tuꞌ.

18 Iswiꞌehal yeko Komam jinh kosunil ayonhxako yul isqꞌabꞌ,

yuxin isnimanil Komam jehi,

haꞌ Komam yichebꞌanil.

Haꞌ Komam bꞌabꞌel itzitzbꞌikanh xol anma kamom,

yuxin ekꞌbꞌal yelapno ye Komam yibꞌanh sunil.

19 Kaw sikꞌlebꞌil tzꞌajan yekaniko Komam Dios yinh Komam Jesucristo,

yuto hak tuꞌ chiyoche iskꞌul Komam.

20 El yinh iskꞌul Komam Dios tato yu Komam Jesucristo hunxanhe chiyukano sunil tzettaj ye tuꞌ yinh Komam,

sunil tzet ay yul satkanh yebꞌ tzet ay yul sat yibꞌanhqꞌinal tiꞌ.

Yuto kam Komam Jesucristo yinh teꞌ kulus,

yel ischikꞌil Komam,

hak tuꞌ xin yu yokkano sunil yinh aqꞌankꞌulal yebꞌ Komam Dios.

21-22 Yet payxa,

hex tiꞌ kaw nahat heyehilo yinh Komam Dios,

yu istxꞌojal tzet chewatxꞌe,

yuxin chikajtza heyanma yinh Komam.

Yaj wal tinanh xin,

ayexxako yinh aqꞌankꞌulal yebꞌ Komam yu iskamikal Komam Jesucristo,

yet yaqꞌlax ekꞌoyaꞌ yanma yinh teꞌ kulus.

Hak tuꞌ yute Komam yunhe hayet cheyeni hebꞌa yinh sat kaw matxa nino hetxꞌojal,

yebꞌ matxapaxo nichꞌano hemul yuto kaw yetxa Komam heyehi.

23 Yajaꞌ kaw yilal helinhbꞌan hebꞌa yinh kaw istoholal yinh huneꞌ chabꞌilxayto yul heyanma.

Mach chepohilo hebꞌa yinh tzet ayxako yipo heyanma yu tzotiꞌal yet kolbꞌanile xaheyabꞌe.

Haꞌ ton huneꞌ tzotiꞌ yet kolbꞌanile tuꞌ chihal-laxikꞌo sunil yul sat yibꞌanhqꞌinal tiꞌ.

Hanin Pablo intiꞌan,

haꞌ huninan chejbꞌil hinan walnikꞌojan.

24 Wal tinanh xin,

kaw chintzalahan yu hanta chꞌekꞌyaꞌ wanmahan heyu,

hakaꞌojtam lanhan intzꞌajbꞌanan yinh innimanilan hantato isyaꞌtajil mach yaqꞌle Komam Jesucristo yinh isnimanil.

Yaqꞌle Komam Jesucristo isyaꞌtajil ju hanhonh ayonhxako yul isqꞌabꞌ tiꞌ,

yuxin isnimanilxa Komam je tinanh.

25 Haꞌ Komam anheinikojan munil xol anma ayxako yul isqꞌabꞌ,

yunhe hewatxꞌiko yinh iskꞌulal,

yebꞌ xin yunhe inpujbꞌanikꞌojan Istzotiꞌ Komam Dios yinh hakaꞌ kaw yelapno yehi.

26 Haꞌ ton huneꞌ tzet mach ohtabꞌiloj huneꞌ ewan ye yu Komam Dios yettax maxhto yul sat yibꞌanhqꞌinal tiꞌ,

yajaꞌ wal tinanh xin xayaqꞌ Komam johtanhelo hanhonh yetonhxa tiꞌ.

27 Kaw el yinh iskꞌul Komam yaqꞌni ohtanhelaxo hanta issaqꞌalil isqꞌalomal iqꞌbꞌil yu huneꞌ ewantikꞌa ye teyet hex mach Israelo hex tiꞌ.

Haꞌ huneꞌ tzet ewan tuꞌ,

haꞌ ton Komam Jesucristo chiꞌehikꞌo teyinh,

yuxin ayko yipo kokꞌul ta yu Komam Jesucristo chikochah iskꞌulal tet Komam Dios.

28 Yuxin haꞌ Komam Jesucristo kaw chijalikꞌojanh tet sunil anma kat kokuynihanh,

kat jalnihanh sunil helanile tet.

Yuto kaw chijochehanh tato chitoholbꞌiko isnabꞌal hunun anma yinh Komam Cristo.

29 Yuton huneꞌ tiꞌ,

yuxinto kaw chiwaqꞌ wanmahan inkuynikantojan sunil anma yu yip Komam Jesucristo chikolwa winhan.