Tzalahanhwe yinh Komam Jesucristo Jahawil
4
Yuxin hex wuxhtaj hex wanabꞌ,
kaw xahan ay hex wuhan.
Kaw ay walaꞌan chiwilikojan teyinh tinanh,
kaw istzalabꞌal wanmahan heyehi,
yebꞌ xin ispajpaxo inmunilan heyehi.
Kaw chelahweko xin,
toholojabꞌ cheyute hebꞌeybꞌal yinh Komam Jesucristo.
2 Chiwaltojan tet janabꞌ Evodia yebꞌ xin janabꞌ Síntique tato kaw yilal yok ebꞌix yinh aqꞌankꞌulal,
yuto kaw isnohxa isbꞌa ebꞌix yinh Komam Jesucristo.
3 Yebꞌpaxo xin,
hach wuxhta wet munlawomal kaw yijem,
chinqꞌanan tawet chaxhkolwa yinh ebꞌix janabꞌ tiꞌ,
haxinwal chiꞌok ebꞌix yinh aqꞌankꞌulal,
yuto kaw kolwa ebꞌix winhan yalnikꞌo Tzotiꞌ Kꞌul yet Kolbꞌanile xol anma;
yebꞌpaxo juxhta Clemente kaw kolwa wintajan,
yebꞌ hunteqꞌanxa ebꞌnaj juxhtaj.
Ebꞌnaj tuꞌ tzꞌibꞌnhebꞌilxayo isbꞌi ebꞌnaj yul teꞌ hum bꞌay ayayo isbꞌi makta ayxa isqꞌinal mach istanhbꞌal yinh Komam Jesucristo.
4 Tzalahanhwe yinh Komam Jesucristo Jahawil sunilbꞌal tiempo.
Chiwalnipaxojan hunelxa,
¡tzalahanhwej!
5 Kaw kꞌulchꞌanojabꞌ hekꞌul yul sat sunil anma.
Hanikꞌxanhe tiempohal kat yul Komam.
6 Machojabꞌ tzet kaw cheyako yinh hekꞌul.
Halwe sunil tzet cheyoche tet Komam Dios yinh hetxah,
qꞌanwe tet Komam kat xin heyaqꞌnipaxo yuchꞌandiosal tet Komam.
7 Hak tuꞌ xin chiyu yaqꞌni Komam Dios aqꞌankꞌulal teyet.
Huneꞌ aqꞌankꞌulal tuꞌ,
kaw ekꞌbꞌal sata hanta tzet chiyu istxumchalo yu anma.
Huneꞌ aqꞌankꞌulal tuꞌ,
haꞌ chikꞌubꞌan heyanma yebꞌ xin henabꞌal,
yuto kaw hunxa heye yebꞌ Komam Jesucristo.
Aweko henabꞌal yinh tzettaj kaw kꞌul
8 Tinanh xin,
hex wuxhtaj hex wanabꞌ,
aweko henabꞌal yinh sunil tzet kaw tꞌinhan yehi,
yinh sunil tzet ay yelapno yul kosat,
yinh sunil tzet kaw tohol,
yinh tzet mach iskistalil,
yebꞌ yinh sunil tzet kaw yeli,
yebꞌ yinh sunil tzet chijoche jabꞌeꞌ,
yebꞌpaxo yinh sunil tzet kaw kꞌul yul sat Komam Dios,
yebꞌ hunteqꞌan kaw istzan yal-lax kꞌul-la tzotiꞌ yinh;
haꞌ yinh hunteqꞌan tuꞌ cheyako henabꞌal.
9 Yijewe hunteqꞌan kuybꞌanile yebꞌ chejbꞌanile waqꞌan teyet,
yebꞌ hunteqꞌan tzet heyabꞌe walnihan,
yebꞌ tzet heyil inwatxꞌenan.
Ta chewatxꞌe hakaꞌ tuꞌ,
chiꞌok Komam Dios heyetbꞌihoj,
chiyaqꞌnipaxo Komam aqꞌankꞌulal teyet.
Hunteqꞌan kolwal yato ebꞌnaj juxhta tet yaꞌ Pablo
10 Wal tinanh xin,
kaw chintzalahan yinh Komam Jesucristo Jahawil,
yuto kinhenatijan heyaniti hekolwal wetan.
Mach lanhano walnihan ta xakinhenahulnhetojan,
¡machoj!
Wal xin ayinnhetikꞌakojan yinh henabꞌal,
yaj tonheton yumi machi yu hekolwa winhan.
11 Wal xin,
maxhtaj yu kaw matzet ayinan yuxin chiwaltojan huneꞌ tiꞌ teyet,
machoj;
wal xin qꞌaynaj inxahan waqꞌni tzalaho wanmahan yinh tzet ay yul inqꞌabꞌan.
12 Wohtajan wijlenan isyaꞌtajil,
ay tiempo machi nichꞌano tzet ayinan,
aypaxo tiempo kaw kꞌul chiꞌekꞌ wilaꞌan.
Wohtajan wijlenan wahil,
aypaxo tiempo nohnanhetikꞌa inkꞌulan,
aypaxo tiempo ay inmelyuhan yebꞌ ay tiempo machipaxo inmelyuhan,
yajaꞌ qꞌaynaj inxatikꞌahan yinh sunil.
13 Sunil chisje wuhan,
yuto haꞌ Komam Jesucristo chiꞌaqꞌni wipan.
14 Yajaꞌ hex tiꞌ,
kaw kꞌul tzet hewatxꞌe yuto kexkolwa winhan yet ayinikojan yinh huneꞌ isyaꞌtajil tiꞌ.
15 Yet welan yul ismajul Macedonia,
yet wichenikojan walnikꞌojan Tzotiꞌ Kꞌul yet Kolbꞌanile yul hunteqꞌanxa nan konhobꞌal,
hanhkꞌanhe hex ay yul isqꞌabꞌ Komam bꞌey yul konhobꞌ Filipos kexkolwa winhan.
Haꞌ ton tuꞌ heyaqꞌ ispajo wetan,
yuto hechah kolbꞌanile yu inmunilan texol.
Wal hunmajanxa ebꞌnaj ayxako yul isqꞌabꞌ Komam yul hunteqꞌanxa konhobꞌ bꞌey tuꞌ,
matzet yaqꞌa.
16 Yebꞌpaxo yet ayinan bꞌey konhobꞌ Tesalónica,
kayel oxel heyato hekolwabꞌal wetan,
yu yok yinh tzet chiꞌokniko wuhan.
17 Maxhnhetaj inchahnihan hekolwabꞌal ayko yinh innabꞌalan,
wal xin kaw chintzalahan yuto ekꞌbꞌalto chiꞌaqꞌlax ispaj selel teyet yu Komam Dios.
18 Yuxin kaw nimanxa tzet chinchahan teyet,
kaw xapalkꞌoni.
Sunil tzet heyati wetan yinta naj Epafrodito,
kꞌuxanxa.
Kaw kꞌul huneꞌ tuꞌ yul sat Komam Dios,
yuto hakaꞌ isxuqꞌal sam hunu xahanbꞌal chiꞌaqꞌlax tet Komam,
kaw xin chitzala Komam yinh,
hak tuꞌ issaqꞌalil huneꞌ hekolwabꞌal tuꞌ.
19 Haꞌ Komam Dios xin chiꞌaqꞌni sunil tzet matzet yul heqꞌabꞌ,
hakaꞌtikꞌa iskꞌulchꞌanil isqꞌalomal ay yinh Komam Jesucristo.
20 Ayojabꞌ yelapno isbꞌi Komam Dios yinh sunilbꞌal tiempo.
Haꞌ ton Komam,
Mame jinh kosunil.
¡Hakojabꞌ tuꞌ!
Yalto yaꞌ Pablo ta chil isbꞌa makta ayxako yul isqꞌabꞌ Komam
21 Chiwaltojan teyet cheyil hebꞌa yinh hekawil hesunil hex yet hexxa Komam Dios bꞌey tuꞌ,
hex hunxa heye yinh Komam Jesucristo.
Chalpaxto ebꞌnaj juxhtaj ay inkꞌatanhan ta cheyil hebꞌa yinh hekawil.
22 Chalpaxto sunil mak yetxa Komam bꞌey tiꞌ ta cheyil hebꞌa yinh hekawil,
yebꞌpaxo xin ebꞌnaj juxhta chimunla yinta naj yahaw Roma tiꞌ.
23 Yaqꞌabꞌayo Komam Jesucristo iskꞌulchꞌanil iskꞌul teyibꞌanh hesunil.