2 Kaw nannhe heyu tet ebꞌnaj kaw lahlonnhetikꞌa yekꞌ hakaꞌ metx txꞌiꞌ,

hanhkꞌanhetikꞌa ismachiswalilal chiswatxꞌe,

kat yalni ta kaw yilal chiꞌok huneꞌ circuncisión yinh konimanil.

3 Hanhonh tiꞌ,

yinh kaw yeli circuncidadoxa je yul sat Komam Dios,

yuto chijiyo kobꞌa tet Komam Dios yu yip Komam Espíritu Santo.

Chonhtzalahi yuto yetxa Komam Jesucristo jehi,

maxhtaj yinh ej yechel chꞌok yinh konimanil bꞌay chikawxi kokꞌul.

4 Hanintiꞌan wal waniko wanmahan yinh hunteqꞌan chileyal ebꞌnaj tuꞌ,

yuto kaw tzꞌajan inwatxꞌehan sunil tzet chal isley yaꞌ Moisés.

5 Yuto waxajebꞌixto tzꞌayik inpitzkꞌahan waqꞌlax circuncidaran.

Kaw Israel wichmaman,

yinh yuninal yaꞌ Benjamín titnaj hinan,

hebreo hinan,

kaw hebreo inmaman yebꞌ inmiꞌan,

fariseo inpaxojan yinh walnikꞌojan kuybꞌanile yinh isley yaꞌ Moisés.

6 Kaw ayko wanmahan yinh kuybꞌanile tuꞌ,

yuxin kinokan inkajaꞌan makta ayxako yul isqꞌabꞌ Komam Jesucristo,

kaw xin inyijehan ley tuꞌ,

kaw machi hunu mak chu yalni ta mach tzꞌajano yu inyijenan.

7 Yajaꞌ sunil hunteqꞌan aykano yelapno ye yul insatan yet yalanhtokano tuꞌ,

tinanh matxa tzet chalilo yul insatan,

yaj yu Komam Jesucristo.

8 Yinh kaw isyelal,

sunil hunteqꞌan tuꞌ,

kaw matzet chiꞌokniko wuhan tinanh;

haꞌ huneꞌ kaw aykano yelapno yehi,

haꞌ yinh kaw wohtanhenilojan Komam Jesucristo Jahawil.

Sunil hunteqꞌan bꞌejbꞌilkano wuhtuꞌan xin kaw hakaꞌxa qꞌalem ye yul insatan,

yu inchahnihan huneꞌ inmajulan yinta Komam Jesucristo,

9 hak tuꞌ xin hunxanhe chiwukanojan yebꞌ Komam.

Tinanh xin,

kꞌulinan yul sat Komam Dios,

yuto wako wanmahan yinh Komam Jesucristo,

mach yuho inyijenan tzet chal isley yaꞌ Moisés.

Kachannhe yu janiko janma yinh Komam Jesucristo chonhok kꞌulal yul sat Komam Dios.

10 Hak tuꞌ xin chiwohtanhehan Komam Jesucristo,

kat wabꞌenan yip Komam Dios yinh wanmahan,

huneꞌ yip Komam pitzkꞌankanh Komam Jesucristo xol kamom.

Yebꞌ yu waqꞌlenan isyaꞌtajil hakaꞌ yaqꞌle Komam,

yebꞌ inkaman hakaꞌ yu iskam Komam.

11 Chikawxipaxo inkꞌulan ta chinitzitzbꞌikanhan xol kamom.

12 Kaw mach lanhano walnihan tato kaw xatzujcha sunil hunteqꞌan tiꞌ wuhan maka kaw tohol inxahan,

wal xin kaw lahbꞌiliko wuhan intohan insatajan.

Ayko yinh wanmahan intzujnayojan hunteqꞌan nabꞌil winhan yu Komam Jesucristo yet kinistzujnayojan bꞌabꞌel.

13 Hex wuxhtaj,

hex wanabꞌ,

mach lanhano walnihan tato xatzujcha apno hunteqꞌan tuꞌ wuhan,

yajaꞌ haꞌ huneꞌ chiwutehan tinanh kaw matxa chinnatijan hunteqꞌan inwatxꞌehan yet yalanhtokanoj;

chiwaqꞌni wanmahan intzujnayojan hunteqꞌan ayko insatajan.

14 Hak tuꞌ xin chu istzujcha apno wuhan,

kat yaqꞌlax huneꞌ matan wetan,

huneꞌ bꞌay awtebꞌilonh yu Komam Dios,

yuto hunxa je yebꞌ Komam Jesucristo.

15 Yuxin sunilonh ayxa yip janma yinh Komam,

yilal kotxumni hakaꞌ tuꞌ,

yajaꞌ ta ay hunujex nan chu hetxumniloj,

haꞌ Komam Dios chiyenopaxilo teyet.

16 Yajaꞌ haꞌ huneꞌ kaw yilal,

ekꞌojonhwe yinh hunteqꞌan tzet xatzujcha apno ju.

17 Hex wuxhtaj,

hex wanabꞌ,

ilweto hewatxꞌen hakaꞌ inbꞌeybꞌalan yebꞌ isbꞌeybꞌal makta chibꞌelwi hakaꞌtikꞌa yu koyenikanojanh teyet.

18 Ay huneꞌ tzet tiꞌ txꞌiꞌal elxa chiwalan teyet.

Tinanh xin kaw chinoqꞌan chiwalnipaxtojan teyet tato kaw tzetkꞌa ebꞌnaj ayko ishowal yinh kuybꞌanile yinh iskamikal Komam Jesucristo yinh teꞌ kulus.

19 Hunteqꞌan ebꞌnaj tuꞌ chitokano ebꞌnaj yinh isyaꞌtajil,

kat istanhkaniloj,

hanhkꞌanhe isnoh iskꞌul ayko yinh isnabꞌal,

haꞌ xin kaw aykaniko isdiosalo ebꞌnaj.

Kaw xin chitzala ebꞌnaj iswatxꞌen tzettaj kaw txꞌixobꞌal,

yebꞌ xin hanhkꞌanhe tzettaj ye tuꞌ ay yul sat yibꞌanhqꞌinal tiꞌ ayko yinh isnabꞌal.

20 Wal hanhonh tiꞌ xin yetxa satkanh jehi.

Lanhan jechman yayilo Kokolomal yul satkanh,

haꞌ ton Komam Jesucristo Jahawil.

21 Haꞌ Komam chihelni huneꞌ konimanil machi yip tiꞌ,

hakaꞌ xin iskꞌulchꞌanil isnimanil hak tuꞌ chonhelikoj.

Yu ishelanil Komam yuxin chishel konimanil,

haꞌ ton huneꞌ ishelanil tuꞌ chimunla yibꞌanh sunil tzet ay yul sat yibꞌanhqꞌinal tiꞌ.