Jiqꞌaweyo kobꞌa hakaꞌ yu yinayo isbꞌa Komam Jesucristo
2
Yuxin ta chexyiptze Komam Jesucristo,
ta chaqꞌ Komam yaqꞌlobꞌal hekꞌul yu xahan ay hex yu,
yebꞌ ta hunxanhe heye yu Komam Espíritu Santo,
yebꞌ ta xahan cheyil heyet anmahil,
kat istzꞌaypaxo hekꞌul yinh;
2 ta hak tuꞌ,
ayojabꞌ tzalahilal texol,
hunlahannhehojabꞌ cheyute hexahannhen hebꞌa.
Hunlahannhehojabꞌ cheyute heyanma yebꞌ hunxanhehojabꞌ tzet chiꞌekꞌ yinh henabꞌal;
hak tuꞌ xin kaw chititkano tzalahilal yul wanmahan heyu.
3 Machojabꞌ yu hepalkꞌon yibꞌanh hunuxa mak,
yebꞌ yu yok hewinajil yuxin chewatxꞌe hunu tzet ye tuꞌ,
machoj,
wal xin chewla winaj cheyute hebꞌa.
Ekꞌbꞌalojabꞌ yelapno ebꞌnaj juxhta teyibꞌanh cheyabꞌe.
4 Machojabꞌnhetaj iskꞌulal teyinh chesayikꞌoj,
wal xin yilal henanipaxti ebꞌnaj juxhtaj.
5 Lahanojabꞌ cheyute henabꞌal hakaꞌ isnabꞌal Komam Jesucristo.
6 Waxanhka lahan Komam Jesucristo hakaꞌ Komam Dios,
yaj matzet yal iskꞌul Komam yinh yehobꞌal.a
7 Wal xin isbꞌejkano Komam sunil tzet yet Komam yehi,
yaniko isbꞌa Komam chejabꞌoj yet ispitzkꞌa yul sat yibꞌanhqꞌinal tiꞌ.
8 Anma yu yulikꞌo Komam koxol,
yinayo isbꞌa,
kaw xin yijem yutepaxo isbꞌa Komam masanta yinh iskamikal,
waxanhka kaw txꞌixobꞌal huneꞌ kamikal yinh teꞌ kulus tuꞌ.
9 Yuxin kaw aqꞌlaxkano yip,
yilaxkanh yu Komam Dios,
yaniko Komam huneꞌ isbꞌi Komam Jesucristo tuꞌ ekꞌbꞌal yelapno yibꞌanh sunil bꞌihe.
10 Yuxin hayet chihal-lax isbꞌi Komam Jesucristo kaw chiꞌay jahno sunil mak ay yul satkanh,
yebꞌ mak ay yul sat yibꞌanhqꞌinal tiꞌ,
yebꞌpaxo mak ayayto yalanh txꞌotxꞌ.
11 Kat xin yalni yu istiꞌ tato haꞌ Komam Jesucristo,
haꞌ kaw Yahawil yekanikoj,
hak tuꞌ xin chu yok ismay Komam Dios Mame.b
Anma ayxako yul isqꞌabꞌ Komam Jesucristo kaw hakaꞌxa issajilqꞌinal yehi
12 Yuxinto hex wuxhtaj hex wanabꞌ,
hex kaw xahan ay wuhtiꞌan,
yet ayinan texol kaw yijem cheyute hebꞌa,
hakojabꞌ tuꞌ xin yet machijinan texol kaw ekꞌnahojabꞌ yijem cheyute hebꞌa.
Aweko yinh heyanma hexiw tet Komam kat helinhbꞌan hebꞌa yinh hekolbꞌanil.
13 Wal xin,
haꞌ Komam chiꞌaqꞌni oko yinh heyanma tzettaj iskꞌulal wal heyuni,
kat xin iskolwapaxo teyinh yunhe yijni isbꞌa hakaꞌ choche iskꞌul.
14 Watxꞌewe sunil yaj mach chexaqꞌwi kꞌule,
machika xin tzet cheyalpaxoj yet chewatxꞌeni.
15-16 Hak tuꞌ xin,
machi mule yebꞌ istxꞌojal chiꞌilchalo teyinh yu anma,
wal xin to kaw yuninal Komam Dios cheyute hebꞌa.
Ekꞌanhwe yinh iskꞌulal xol anma machiswalil yebꞌ kaw txꞌojkanoj.
Wal xin kaw chextzejla xol anma hakaꞌ istzejla txꞌumel xol qꞌejholo,
yuto hex cheyalikꞌo Istzotiꞌ Komam Dios chiꞌaqꞌni qꞌinale tet anma.
Hak tuꞌ xin yet chul Komam Jesucristo kaw chiwabꞌehan tzalahilal teyinh,
yuto kaw wohtajan tato mach nabꞌnheho kinekꞌan texol,
yebꞌ xin mach nabꞌnheho kinmunlahan texol.
17 Waxanhka xin kaw chiwako innimaniltiꞌan xahanbꞌalil,
yunhe istzꞌajnakano xahanbꞌal cheyaqꞌ tet Komam Dios yu heyanma yinh Komam,
kaw chintzalahan kat inpohniltojan huneꞌ tzalahilal tiꞌ texol.
18 Tzalahanhwepaxo hex tiꞌ,
aqꞌwe tzalaho hekꞌul wintajan yinh bꞌay chintzalakotiꞌan.
Yal yaꞌ Pablo ta chato yaꞌ naj Timoteo yebꞌ naj Epafrodito ilwal yinh ebꞌnaj juxhtaj
19 Tato kaw chiꞌel yinh iskꞌul Komam Jesucristo Jahawil chito naj Timoteo kexistukleꞌ yet hekal kabꞌe tiꞌ hakaꞌ chiwochehan,
yunhe yilni naj hanikꞌ heyehikoj kat yiniti naj tzotiꞌ wetan.
Hak tuꞌ chu istzalakanh inkꞌulan yet chiwabꞌehan hanikꞌ heyehi.
20 Yuto hanhkꞌanhe naj Timoteo tiꞌ,
lahan istxumni hakaꞌ intiꞌan,
yebꞌ xin chako yinh iskꞌul iswatxꞌen iskꞌulal teyinh.
21 Yaj wal hunteqꞌanxa ebꞌnaj xin,
haꞌ tzet choche iskꞌul ebꞌnaj chissaya,
maxhtaj tzet choche Komam Jesucristo.
22 Wal hex hex tiꞌ,
heyohtaxa hanta iskꞌulal chiyute isbꞌa naj Timoteo tiꞌ,
yebꞌ xin ta kaw chikolwapaxo naj wintajan yinh jalnikꞌojanh Istzotiꞌ Komam Jesucristo.
Hakaꞌ iskolwa hunu naj kꞌahole yinh ismam,
hak tuꞌ iskolwa naj winhan.
23 Yuxin toxanhe chiwechmahan tzet chinelikojan yinh huneꞌ isyaꞌtajil ayayo wibꞌanhtiꞌan,
kat wanitojan naj kexistuklenoj.
24 Yaj xin chikawxi inkꞌulan yinh Komam Dios tato chintopaxojan kexwilaꞌan yinh lembꞌil.
25 Chiꞌekꞌpaxo yinh innabꞌalan tato kaw yilal wanipaxtojan naj Epafrodito kexyilaꞌ.
Naj juxhta tiꞌ,
kaw chikolwa naj wintajan yinh ismunil Komam Jesucristo,
yebꞌ haꞌ hun naj chiꞌaqꞌlen isyaꞌtajil wintajan.
Naj juxhta tiꞌ,
hex heyati naj kolwal winhan.
26 Wal xin kaw choche naj isto kexyilaꞌ hesunil,
kaw xin ayko yinh iskꞌul naj teyinh yuto heyabꞌeloj tato yabꞌiꞌay naj.
27 Wal tuꞌ,
kaw yeli yabꞌilni naj,
hanikꞌxanhe mach kam naj.
Yaj xin kaw oqꞌ iskꞌul Komam Dios yinh naj,
iskawxikanh naj.
Yaj kaw maxhnhetaj yinh naj oqꞌ yanma Komam,
kaw tzꞌaypaxo iskꞌul Komam winhan,
yunhe matxa kam chislahiko bꞌiskꞌulal winhan yu naj.
28 Yuxin matxa chiꞌekꞌayo yet inchejnitojan naj tekꞌatanh,
haxinwal chextzalakanh yet cheyilni yapni naj hunelxa.
Yu hetzalahilal yinh naj chipax hanikꞌ inbꞌiskꞌulalan.
29 Chahwe naj yinh tzalahilal yuto kaw heyuxhta naj yinh Komam Jesucristo.
Kaw xahanojabꞌ cheyil mak hakaꞌ naj tiꞌ.
30 Yuto yu ismunil Komam Jesucristo,
yuxin etza kam naj.
Kaw ishin isbꞌa naj iskam winhan heseleloj,
yuto kaw nahat ayexilo winhan.