2
Kaw chiwochehan cheyohtanheloj tato kaw lahbꞌiliko wuhan inmunlahan heyu,
yebꞌ yu ebꞌnaj juxhta ay yul konhobꞌ Laodicea.
Yebꞌpaxo yu makta ayxako yul isqꞌabꞌ Komam maxhto bꞌay chiliko winhan huneloj.
2 Kaw chinmunlahan yunhe yiqꞌni yip heyanma,
yebꞌ yunhe hunlahanxanhe hexahannhen hebꞌa hesunil.
Chiwochehan kaw helan chexelkaniko yinh yet Komam Dios,
yunhe kaw heyohtanhenkanilo mak huneꞌ mach ohtabꞌilo yet yalanhtokanoj,
haꞌ ton xin Komam Jesucristo.
3 Haꞌ yinh Komam Cristo chiꞌilchalo sunilal iskꞌulal helanilehal yebꞌ nabꞌale.
4 Chiwaltojan hunteqꞌan tiꞌ teyet yunhe machi mak chexaqꞌni subꞌchaho yu montebꞌal tzotiꞌ,
yuto ay mak tiꞌ kaw helan chutekano isbꞌa.
5 Waxanhka machijinan texol,
yajaꞌ ayexiko yinh inkꞌulan,
hakaꞌojtam ayinikojan texol.
Kaw chintzalahan yet chiwabꞌenan tato kaw kꞌul hebꞌeybꞌalnhen tzet choche iskꞌul Komam,
kaw cheyapaxiko heyanma yinh Komam Jesucristo.
6 Yuxin hakaꞌtikꞌa yu hechahni Komam Jesucristo yul heyanma,
hak tuꞌ xin cheyutepaxo hebꞌeybꞌalnhen tzet chal Komam.
7 Hakaꞌ hunu te teꞌ kaw kaw yekanayto xeꞌ yul txꞌotxꞌ saqꞌal ischꞌibꞌi hak tuꞌ cheyute hebꞌa yinh Komam Jesucristo,
linhbꞌawe hebꞌa heyaniko heyanma yinh Komam hakaꞌ yu yaqꞌlaxkano hekuybꞌanil,
kat xin heyaqꞌni yuchꞌandiosal tet Komam Dios yinh hunun tzꞌayik.
Huneꞌ koakꞌ qꞌinal yinh Komam Jesucristo
8 Cheyil hebꞌa xin,
mach cheyaqꞌ subꞌchaho hebꞌa tet ebꞌnaj choche kexyaqꞌaꞌ subꞌchahoj,
chalni ebꞌnaj helanile yet yul sat yibꞌanhqꞌinal tiꞌ,
yebꞌ kuybꞌanile maxhtaj yekoj,
yuto maxhtaj yinh Komam Jesucristo chilo ebꞌnaj hunteqꞌan tuꞌ.
Wal xin hanhetikꞌa iskuywabꞌal yichmam ebꞌnaj chilayala,
yebꞌ kuybꞌanile yet yul sat yibꞌanhqꞌinal tiꞌ.
9 Wal xin haꞌ sunil tzet ye Komam Dios,
kaw tzꞌajan yekaniko yinh Komam Jesucristo,
10 yuxin kaw tzꞌajan yekanayo iskꞌulal Komam Dios jibꞌanh tinanh,
yuto hunxa je yebꞌ Komam Jesucristo.
Haꞌ Komam ayko yahawilo yibꞌanh hunteqꞌan ayko yahawiloj yebꞌ ay yip,
hunteqꞌan mach chijiliko yinh.
11 Yuxin kaw ayxako circuncisión teyinh tinanh,
yuto kaw hunxa heye yebꞌ Komam Jesucristo.
Yaj maxhtaj huneꞌ circuncisión chiꞌok yinh konimanil chiwalan,
wal xin huneꞌ circuncisión chitit yinh Komam Jesucristo yinh konhiskolni yul isqꞌabꞌ istxꞌojal ayko jinh.
12 Hayet yahkano haꞌ hewiꞌ,
kaw hun yu hemujlax yebꞌ Komam Jesucristo yul sat Komam Dios.
Yebꞌpaxo xin hun yu heyitzitzbꞌikanh yinta Komam,
yuto kaw heyayto yul heyanma yinh Komam Dios aqꞌni itzitzbꞌikanh Komam Jesucristo.
13 Hayet yalanhtokanoj,
kamnajexilo yul sat Komam Dios yu hetxꞌojal yebꞌ yu mach circuncidado heyehi.
Yajaꞌ tinanh,
kaw hun yu yaqꞌnikano Komam Dios heqꞌinal yebꞌ Komam Jesucristo.
Yuxin yu Komam Jesucristo yuxin yaqꞌkano tanho Komam Dios sunilal komul.
14 Ay huneꞌ tzet hakaꞌ kokꞌas ayko jibꞌanh yet yalanhtokanoj yuto machi koyije hunteqꞌan ley.
Yajaꞌ Komam Dios aqꞌni tanho huneꞌ kokꞌas tuꞌ;
yilo Komam jibꞌanh yuto pahlaxiko Komam yinh teꞌ kulus yu chꞌen lawuxh.
15 Hayet iskam Komam Jesucristo yinh kulus tuꞌ xin,
yaqꞌni aykꞌayo Komam hunteqꞌan yahawil yeko yu naj matzwalil.
Isyenikanilo Komam yinh sat anma tato elkano ispixan hunteqꞌan tuꞌ yinh hunelnhe.
Hak tuꞌ yu isyenilo Komam tato qꞌoji Komam yinh naj matzwalil.
Kaw yilal kosaynilo tzet ye tuꞌ ay satkanh
16 Yuxin,
ta choche ebꞌnaj Israel cheyije isnabꞌal ebꞌnaj hakaꞌ yinh tzet chilolaxi,
yebꞌ yinh tzet chiꞌukꞌlaxi,
yebꞌ yinh tzꞌayik kaw txahul yul sat ebꞌnaj,
maka yet chipitzkꞌa ixahaw,
maka yinh tzꞌayik xewilal;
kaw mach chechah heyabꞌe.
17 Yuto sunil hunteqꞌan tuꞌ yechelnhe yinh tzet xahul koxol,
haꞌ isyelal yechel tuꞌ,
haꞌ ton Komam Jesucristo.
18 Mach cheyaqꞌ hamanil hekachlax hechahni hematan chaqꞌ Komam Dios,
yu heyabꞌento tzet chiyal ebꞌnaj teyet.
Chal ebꞌnaj tuꞌ ta kaw yijem ebꞌnaj,
chiyo isbꞌa ebꞌnaj tet ebꞌnaj ángel,
chalni ebꞌnaj tato ay tzet chisyeko isbꞌa yinh sat ebꞌnaj.
Kaw komonnhetikꞌa chisnime winajnhe isbꞌa ebꞌnaj yinh tzettaj chiꞌekꞌ yinh isnabꞌal.
19 Haꞌ ebꞌnaj tuꞌ mach huneꞌnheho ye ebꞌnaj yebꞌ Komam Jesucristo,
Komam iswiꞌehal yeko jinh.
Haꞌ Komam Cristo chiꞌaqꞌni jip,
chonhishunbꞌakano kosunil hakaꞌ hunu nimanile tzabꞌlebꞌil isbꞌa isxijil yu istxꞌanhal;
chonhyaqꞌni chꞌibꞌo Komam,
yuto hak tuꞌ chiꞌel yinh iskꞌul.
20 Wal hex hex tiꞌ,
kamnaj hexxa yinta Komam Jesucristo yul sat Komam Dios,
yuxin matxa ayexikto yalanh chejbꞌanile yet yul sat yibꞌanhqꞌinal tiꞌ.
Yajaꞌ ¿tzet yinh yuxinto hakaꞌto anma yet yul sat yibꞌanhqꞌinal tiꞌ cheyute hebꞌa?
Chebꞌeybꞌalnhen hunteqꞌan kuybꞌanile chalni hakaꞌ tiꞌ:
21 «Txahul yokniko huneꞌ tiꞌ heyu,
maka xahan heloni hunteqꞌan tiꞌ,
maka hetzabꞌni hunteqꞌan tiꞌ,»
xhi.
22 Wal xin hunteqꞌan kuybꞌanile tuꞌ yet anmanhe yehi,
nixhtejal istanhiloj yet chiꞌokniko yu anma.
23 Yeli hunteqꞌan kuybꞌanile tuꞌ,
kochantanhe haꞌ yehi,
yuto chala ta chiko kach kobꞌa yinh ej tzet ye tuꞌ,
yebꞌ ta chijiyo kobꞌa,
kat kokachni konimanil yinh ej tzet ye tuꞌ,
yajaꞌ mach chikolwa yinh janma yinilo istxꞌojal chocheto konimanil.