3
Wal tinanh,
yu xakonhitzitzbꞌikanh yebꞌ Komam Jesucristo yul sat Komam Dios,
yuxin kosayaꞌwelo kowatxꞌen tzet ye tuꞌ yet yul satkanh yehi,
bꞌay tzꞌonhan Komam Jesucristo yinh iswatxꞌqꞌabꞌ Komam Dios.a
2 Kaw yilal janiko konabꞌal yinh tzet ay yul satkanh,
matxahojabꞌ chijako konabꞌal yinh tzettaj ye tuꞌ ay yul sat yibꞌanhqꞌinal tiꞌ.
3 Hayet iskam Komam Jesucristo,
hanhhunonh konhkampaxo yintaj,
yuxin koakꞌ qꞌinal yebꞌ Komam Jesucristo kaw kꞌuwan yu Komam Dios.
4 Haꞌ Komam Jesucristo koqꞌinal yekoj,
yuto hayet chisyeno isbꞌa Komam,
kat koyelaxpaxilo yinta Komam.
Hak tuꞌ chiyu istzꞌajnakanilo kokꞌulal hakaꞌ iskꞌulal Komam.
Huneꞌ icham bꞌeybꞌale yebꞌ huneꞌ akꞌ bꞌeybꞌale
5 Wal tinanh xin,
awekano sunil bꞌeybꞌale yet yul sat yibꞌanhqꞌinal tiꞌ,
hakaꞌ ixloj,
maka winajloj,
yebꞌ sunil tzettaj kaw machiswalil,
yebꞌ tzettaj istxꞌojal chilaheyochekoj.
Mach cheyako heyanma yinh qꞌalomal,
yuto huneꞌ tuꞌ chu yok hediosalo selelo Komam Dios.
6 Mak chito watxꞌen hunteqꞌan tuꞌ,
kaw chitit ishowal Komam Dios yibꞌanh,
yuto mach chisyije yinh tzet chal Komam.
7 Sunil hunteqꞌan tiꞌ hewatxꞌe yet yalanhtokanoj,
yet ayextoko xol anma chilawatxꞌen hunteqꞌan tuꞌ.
8 Yaj wal tinanh xin,
bꞌejwepaxkano sunil hunteqꞌan tiꞌ;
ischiwa hekꞌul,
yebꞌ istit hehowal,
yebꞌ henaniko istxꞌojal yinh hunuxa heyet anmahil,
yebꞌ hebꞌuchwahi,
yebꞌ tzotiꞌ txꞌoj chiꞌelti yul hetiꞌ.
9 Kaw mach cheyako leqꞌtiꞌal teyet hunun hex,
wal xin kaw matxa ayexokto yalanh yip huneꞌ icham bꞌeybꞌal iqꞌbꞌiltikꞌa heyu yebꞌ hunteqꞌan istxꞌojal chewatxꞌe yet yalanhtokanoj.
10 Yajaꞌ wal tinanh xin,
haxa huneꞌ akꞌ bꞌeybꞌale iqꞌbꞌil heyu,
lanhan istoholbꞌiko henabꞌal,
yunhe lahanxa chexeliko yebꞌ Komam Dios,
Komam konhwatxꞌeni,
kat heyohtanhenilo Komam yinh kaw kꞌul.b
11 Wal xin machi yok yinh mak anmahil,
waxanhka Israel maka machoj,
waxanhka chabꞌilxa circuncisión yinh isnimanil maka machoj.
Waxanhka nan konhobꞌal,
waxanhka xin mach kuywomoj,
waxanhka yet isbꞌa ischukil,
maka kꞌamteꞌ;
kaw mach chiyok hunteqꞌan tuꞌ yinh,
haꞌ huneꞌ kaw yilal to yetonhxa Komam Jesucristo kosunil,
Komam ekꞌbꞌal niman yelapnoj,
kaw xin ayko Komam yul janma.
12 Wal xin,
kaw ochebꞌil hex yu Komam Dios,
saybꞌil hex yu Komam yu heyokkano yeto Komam.
Kaw tzꞌayojabꞌ hekꞌul yinh heyet anmahil,
kaw kꞌulchꞌanojabꞌ cheyute hekꞌul,
chewchotanhehojabꞌ cheyute hebꞌa,
machojabꞌ chexhowbꞌi,
ayojabꞌ henimankꞌulal.
13 Kaw nimanojabꞌ cheyute hekꞌul teyinh hunun hex,
aqꞌwe nimankꞌulal teyinh.
Tato ay hex cheyako hemul teyet,
hakaꞌojabꞌ yu yaqꞌni nimankꞌulal Komam Jesucristo Jahawil yinh sunilal komul,
hakojabꞌ tuꞌ chu heyaqꞌnipaxo nimankꞌulal teyinh hunun hex.
14 Haꞌ huneꞌ kaw yilal yehi,
xahan cheyil hebꞌa hunun hex,
yuto haꞌ huneꞌ koxahannhen kobꞌa,
haꞌ chonhhunbꞌanayo yinh iskꞌulal Komam.
15 Haꞌojabꞌ huneꞌ aqꞌankꞌulal chiyaqꞌ Komam Cristo chiꞌijbꞌan heyanma,
yuto yu huneꞌ tuꞌ yuxin awtebꞌil hex yu Komam Dios,
yunhe huneꞌxanhe nimanile cheyukanoj.
Aqꞌwe yuchꞌandiosal tet Komam Dios yinh hunun tzꞌayik.
16 Kaw chiwochehan tato kaw hunelnhe chukaniko Istzotiꞌ Komam Jesucristo yul heyanma.
Yinhojabꞌ kaw helanil chekuylekanto hebꞌa,
kat hekachni hebꞌa.
Bꞌitnhewe isbꞌi Komam Dios yu Salmos,
himnos yebꞌ bꞌit chipitzkꞌati yul heyanma.
17 Sunil tzet chewatxꞌe yebꞌ sunil tzet cheyalpaxoj lahanojabꞌ hakaꞌ tzet choche Komam Jesucristo.
Aqꞌwe yuchꞌandiosal tet Komam Dios yu Komam Jesucristo.
Yinh tzet wal isbꞌeybꞌalnhen makta ayxako yul isqꞌabꞌ Komam Dios
18 Hex ixale,
yijewe tzet chal heyichamil,
yuto kaw ayexxako yul isqꞌabꞌ Komam Jesucristo.
19 Yebꞌpaxo hex ichamile,
xahan cheyil heyixal,
mach howo cheyute hebꞌa yinh ebꞌix.
20 Yebꞌpaxo hex uninale,
yijewe yinh sunil tzet chal hemam hemiꞌ,
yuto kaw chitzala Komam Dios yinh hakaꞌ tuꞌ.
21 Hex mame miꞌe hex tiꞌ,
mach cheyaqꞌtij ishowal heyuninal yinh isnabꞌnhehal,
haxinwal machi kabꞌkonkanh iskꞌul.
22 Haxa hex kꞌamteꞌ hex,
yijewe yinh sunil tzet chal heyahawil yul sat yibꞌanhqꞌinal tiꞌ.
Machojabꞌnhetaj yet tꞌanhaniko ebꞌnaj teyinh saqꞌal hemunlahi,
yunhe kaw kꞌul cheyukano yul sat ebꞌnaj.
Wal xin sunilojabꞌ heyanma chexmunlahi,
xiwanhwej yuto kaw chil Komam Jesucristo tzet chewatxꞌe.
23 Sunilojabꞌ tzet chewatxꞌe,
yinh sunil heyanma chewatxꞌeni,
hakojtam haꞌ tet Komam bꞌay lanhan heyijeni,
maxhtaj tet anma.
24 Kaw johtaxa tato chiyaqꞌ Komam komatan hanhonh yuninalonhxa tiꞌ,
yuto ayonhiko kowatxꞌen hakaꞌ tzet choche iskꞌul Komam Jesucristo,
Komam Jahawil.
25 Wal mak chiwatxꞌen istxꞌojal xin,
chischah ispaj sunil tzet machiswalil chiswatxꞌe tuꞌ tet Komam Dios.
Yuxin tzet chilaiswatxꞌe hunun anma,
hak tuꞌ ispaj chiꞌaqꞌlax tet yu Komam Dios.