2 Maxhtikꞌa chikobꞌejanh jaqꞌnihanh yuchꞌandiosal tet Komam Dios teyinh hesunil,

kat kexkonanitijanh yinh kotxahanh tet Komam Dios.

3 Ayonhnhetikꞌakojanh kexkonanitijanh yinh kotxahanh tet Komam Dios Mame yu hanta chexmunla yinh ismunil Komam,

yuto xaheyayto yul heyanma yinh Komam,

cheyijenpaxo yinh tzet chala,

yuto kaw ayko heyanma yinh Komam.

Cheyaqꞌnipaxo techaho sunil isyaꞌtajil chiꞌay teyibꞌanh,

yuto kaw ayko Komam Jesucristo yipo hekꞌul.

4 Hex wuxhtaj,

hex wanabꞌ,

kaw ochebꞌil hex yu Komam Jesucristo,

yebꞌ xin johtaj tato haꞌ Komam Dios sikꞌnhehexkanoj.

5 Yet jalnihanh kuybꞌanile yet kolbꞌanile teyet,

maxhnhetaj kotzotiꞌanh munlahi,

to haꞌ hun yip Komam Espíritu Santo munla teyinh,

kaw xin johtajanh tato huneꞌ kuybꞌanile tuꞌ kaw yel chalkanoj.

Wal hex hex tiꞌ,

heyohtaj tato kꞌul jute kobꞌahanh texol,

kosaynihanh bꞌaytet iskꞌulalo teyinh.

6 Haxa hex tiꞌ xin kexok tzujno yinh ej iskꞌulal koyekanojanh,

yebꞌ xin isbꞌeybꞌal Komam Jesucristo,

hechahnikano Istzotiꞌ Komam yinh kaw tzalahilal chiyaqꞌ Komam Espíritu Santo,

waxanhka yet hechahni tuꞌ heyil isyaꞌtajil yu anma.

7 Hak tuꞌ yu heyenilo iskꞌulal yinh sat sunil makta ayxako yul isqꞌabꞌ Komam ay bꞌey yul ismajul Macedonia yebꞌ ismajul Acaya.

8 Yu huneꞌ hebꞌeybꞌal tuꞌ pujnakanh yabꞌelaxilo Istzotiꞌ Komam,

yaj maxhnhetaj yul ismajul Macedonia yebꞌ Acaya,

wal xin kaw sunil yulajla konhobꞌ ohtanhelaxiloj tato heyayto yul heyanma yinh Komam Dios,

yuxin matxa tzet wal jalnihanh tet anma yinh huneꞌ tuꞌ.

9 Haꞌ kaw anma tuꞌ chalni tzet yu kobꞌeykꞌojanh texol,

yebꞌ xin ta kaw kꞌul yu konhhechahnihanh,

yebꞌ yinh tzet yu hebꞌejni hetxahli tet hetioxh,

heyok heyijen tzet chal Komam Dios itzitz,

yebꞌ kaw Dios yinh kaw isyelal.

10 Chiyalpaxo anma tuꞌ,

tato kaw ayko yinh heyanma heyechman Iskꞌahol Komam Dios chitit yul satkanh,

haꞌ ton Komam Jesucristo itzitzbꞌikanh xol kamom yu yip Komam Dios.

Haꞌ xin chonhkolni xol huneꞌ niman isyaꞌtajil chihul yu Komam Dios.