Kuybꞌanile yinh tzet yu ismunla yaꞌ Pablo bꞌey yul konhobꞌ Tesalónica
2
Hex wuxhtaj hex wanabꞌ,
kaw heyohtaj tato mach nabꞌanheho konhbꞌeykꞌojanh texol.
2 Waxanhka yet yalanhto maxhto chexkotuklehanh konhbꞌahlaxanh,
konhmaqꞌlaxpaxojanh bꞌey yul konhobꞌ Filipos hakaꞌ yu heyabꞌeni.
Yaj maxhtikꞌa konhxiwanh yuto Komam Dios kolwa jinhanh.
Hak tuꞌ yu kopujbꞌanikꞌojanh Tzotiꞌ Kꞌul yet Kolbꞌanile texol,
waxanhka kaw howbꞌi anma jinhanh.
3 Hanhonhtiꞌanh,
maxhtaj tzotiꞌ mach yelo jalanh yet jekꞌ tuꞌanh,
maxhtajpaxo istxꞌojal nabꞌil juhanh yebꞌ mach etalo nan juhanh.
4 Wal xin Komam Dios saynhehonhikojanh,
yaqꞌnikano Komam huneꞌ komunil tiꞌanh yinh jalnikꞌojanh Tzotiꞌ Kꞌul yet Kolbꞌanile.
Yuxinto maxhtaj tzet choche iskꞌul anma chikosayikꞌojanh,
to haꞌ tzet choche iskꞌul Komam Dios,
yuto yohta Komam tzet nabꞌil juhanh.
5 Hex tiꞌ heyohtaj,
yebꞌ xin yohtapaxo Komam Dios tato maxhtikꞌa hunelo kexkomontehanh yu tzotiꞌ kꞌulchꞌan yoki.
Machipaxo tzotiꞌ aqꞌni ayo hekꞌul jalanh yunhe jinilojanh melyu teyinh.
6 Maxhtaj yu heyaniko komayanh yuxin chonhekꞌanh,
maka yu jal-laxanh nime anmahil yu anma.
7 Waxanhka xin ay jipanh jalnihanh teyet tato konhheyilanh yuto ischejabꞌ Komam Jesucristo jehanh,
yajaꞌ xin mach hako tuꞌ jutehanh.
Haꞌ jetanh to kꞌulchꞌan jute kokꞌulanh teyinh hakaꞌ chiyu isyaꞌilnhen hunu ix miꞌe nixhte yunin.
8 Kaw chexkoyaꞌilnhehanh,
yuxinto maxhnhetaj Tzotiꞌ Kꞌul yet Kolbꞌanile jaqꞌanh teyet,
wal xin kohin kobꞌahanh jaqꞌni kamo kobꞌahanh teyinh,
yuto kaw chonhtzalahanh teyinh.
9 Hex wuxhtaj,
hex wanabꞌ,
tijabꞌ yul hekꞌul hanta konhsikihanh komunlahanh,
kosaynihanh yinh tzet chu yekꞌ juhanh.
Konhmunlahanh tzꞌayikal yebꞌ aqꞌbꞌalil,
yunhe matzet chikoqꞌananh teyet yet jekꞌanh jalnokꞌojanh Tzotiꞌ Kꞌul yet Kolbꞌanile texol.
10 Hex kaw hex chu heyalni yebꞌ xin testigo Komam Dios yinh tato kaw kꞌul jute kobꞌahanh,
yebꞌ hanhkꞌanhe istoholal kowatxꞌehanh yet jekꞌanh texol hex ayexxako yul isqꞌabꞌ Komam.
Machi xin hunu mak chu yalni ta txꞌoj kowatxꞌehanh texol.
11 Heyohtapaxoj tato kaw kexjiptzehanh,
jaqꞌnipaxojanh yaqꞌlobꞌal hekꞌul hakaꞌ chu hunu naj mame yinh yuninal.
12 Jalnipaxojanh teyet hunun hex tato kꞌul cheyute hebꞌa,
yuto ayexxako yul isqꞌabꞌ Komam Dios.
Haꞌ Komam awtenhehonhiko yul isqꞌabꞌ yebꞌ yu kochahni sunil iskꞌulchꞌanil Komam.
13 Yu huneꞌ tuꞌ,
chijaqꞌanh yuchꞌandiosal tet Komam Dios,
yuto yet heyabꞌen Istzotiꞌ Komam jalanh teyet,
hakaꞌ kaw Istzotiꞌ Komam yu hechahnikanoj,
mach hakaꞌo komon tzotiꞌ chal anma.
Yinh kaw yeli Istzotiꞌ Komam Dios huneꞌ tuꞌ,
haꞌ xin chimunla yul heyanma hex xahechah Komam.
14 Hex wuxhtaj,
hex wanabꞌ,
yet yaqꞌlax ekꞌoyaꞌ heyanma yu heyet konhobꞌ,
kaw lahan heyaqꞌle yebꞌ yuninal Komam Dios ay yul ismajul Judea,
hunteqꞌan mak yetxa Komam Jesucristo yehi,
kaw kaj il-lax yu yet konhobꞌ Israel.
15 Haꞌ ebꞌnaj israelita tuꞌ potxꞌnikamo Komam Jesucristo,
hakaꞌtikꞌa yu ispotxꞌnikamo ebꞌnaj ebꞌyaꞌ ischejabꞌ Komam Dios ekꞌlena yettax payat,
konhiskajnipaxojanh ebꞌnaj.
Kaw machi nichꞌano iskꞌulal ebꞌnaj tuꞌ yul sat Komam Dios,
yuto chiskaj ebꞌnaj sunil anma.
16 Mach chisje ebꞌnaj ta chijalanh Tzotiꞌ yet kolbꞌanile tet anma mach Israeloj yunhe iskolchahi,
hak tuꞌ chiyu yah sutsun ismul ebꞌnaj yibꞌanh.
Yajaꞌ wal tinanh xin xahul niman isyaꞌtajil yibꞌanh hunteqꞌan anma tuꞌ yu Komam Dios.
Choche yaꞌ Pablo isto bꞌey konhobꞌ Tesalónica hunelxa
17 Hex wuxhtaj,
hex wanabꞌ,
yet jelanh texol hanikꞌ tiempohal,
kaw ayexnhetikꞌako yul janmahanh,
waxanhka xin mach chijilanh teyinh.
Kaw xin jakojanh yinh kokꞌulanh kotohanh kexjilnojanh hunelxa.
18 ¡Kaw jaqꞌlehanh kotohanh kexjilnojanh!
Hanin Pablo intiꞌan txꞌiꞌal el wochehan intohan kexwilaꞌan,
yajaꞌ yayo naj matzwalil isyaꞌtajil yuxin maxhtikꞌa yu kotohanh.
19 ¿Mak yinh chikawxi kokꞌulanh?
¿Mak yinh chitzala janmahanh?
Wal xin hexton ispaj komunilanh chiꞌaqꞌni tzalahilal.
Teyinh kaw chitit kotzalahilalanh yul sat Komam Jesucristo yet chihuli.
20 Yinh kaw yeli hex tiꞌ ayexiko kotzalahilalojanh,
yebꞌ ayexiko komayojanh chiyute jabꞌenanh.