3
Kaw xin matxa chitecha juhanh jabꞌenanh tzet heyehikoj,
yuxin ok yinh konabꞌalanh kokankanojanh kochukilanh bꞌey yul konhobꞌ Atenas.
2 Janitojanh yaꞌ juxhta Timoteo kexistukleꞌ,
yaꞌ ayko ischejabꞌo Komam Dios yinh yalnikꞌo Tzotiꞌ Kꞌul yet Kolbꞌanile yinh Komam Jesucristo.
Jatojanh yaꞌ yunhe yaniko yaꞌ yip heyanma,
yebꞌ yunhe kam hetoholbꞌanheniko hebꞌa yinh Komam.
3 Haxinwal machi hunujex chikabꞌkonkanh hekꞌul yu isyaꞌtajil chihul teyibꞌanh.
Wal xin heyohtaxa tato yilal yekꞌyaꞌ janma yu ej is isyaꞌtajil chihul jibꞌanh.
4 Yuxin yet jekꞌanh texol,
jalkanojanh teyet tato yilal chul isyaꞌtajil jibꞌanh,
kaw xin cheyila tato hak tuꞌ elikoj.
5 Kaw mach chitecha wuhan wabꞌenan hanikꞌ heyekoj,
yuxin inchejtojan yaꞌ Timoteo kexistukleꞌ,
yunhe yilni yaꞌ hanikꞌ yeko heyanma yinh Komam bꞌey tuꞌ.
Yuto ayko yinh inkꞌulan kꞌuxantaxka kexyaqꞌ subꞌchaho naj matzwalil yinh ej istxꞌojal,
yuto ta hak tuꞌ nabꞌnhem konhmunlahanh texol chal tuꞌ,
yaj machoj.
6 Yajaꞌ wal tinanh xabꞌeykꞌo juxhta Timoteo kexistukleꞌ,
haꞌ yaꞌ xin initi tzotiꞌ tato kaw huneꞌnhetikꞌa haꞌ yeko heyanma yinh Komam Dios,
yebꞌpaxo xin ta kaw xahan cheyil hebꞌa hunun hex.
Yal yaꞌ jetanh tato kaw chitzala hekꞌul jinhanh,
chonhhenanitijanh yebꞌ xin ta kaw cheyoche konhheyilaꞌanh,
hak tuꞌ heyepaxiko yinh kokꞌulanh,
kaw chijochehanh kexjilaꞌpaxojanh.
7 Wal tinanh,
hex wuxhtaj,
hex wanabꞌ,
walka soman bꞌiskꞌulal yebꞌ soman isyaꞌtajil jehanh kaw aqꞌlo kokꞌulanh yet jabꞌenanh tato kaw huneꞌnhe haꞌ yehiko heyanma yinh Komam Jesucristo.
8 Hayet jabꞌenanh tato tohol hebꞌelwi yinh Komam kaw okkano janmahanh yinh tzalahilal.
9 Tinanh xin mach chitxumcha juhanh tzet chu jaqꞌnihanh yuchꞌandiosal tet Komam Dios teyinh yu huneꞌ icham tzalahilal chijabꞌehanh heyu sata Komam Dios.
10 Wal xin,
kaw hunun tzꞌayik yebꞌ hunun aqꞌbꞌal koqꞌannihanh tet Komam tato chiyaqꞌ Komam kohamanilanh kotohanh kexjilnojanh,
yunhe kam hechꞌibꞌ yinh heyaniko heyanma yinh Komam Dios.
11 Haꞌojabꞌ Komam Dios Mame yebꞌ Komam Jesucristo,
chikolwa jinhanh yunhe chiyu kotohanh kexjilnojanh.
12 Haꞌojabꞌ Komam chexaqꞌni chꞌibꞌoj,
yebꞌ yunhe kam xahan cheyil hebꞌa hunun hex,
kat hexahannhen sunil anma,
hakaꞌtikꞌa isxahanil chexjilanh hanhonhtiꞌanh.
13 Chijochepaxojanh tato chiyaqꞌ Komam yip heyanma,
haxinwal toholnhe chiyu hebꞌelwi.
Machojabꞌ hemul chiꞌilchati yul sat Komam Dios Mame yet chihul Komam Jesucristo hunelxa yebꞌ sunil makta yetxa Komam yehi.