Huneꞌ bꞌeybꞌale hakaꞌ choche iskꞌul Komam Dios
4
Hex wuxhtaj,
hex wanabꞌ,
kaw hakaꞌtikꞌa yu koyenikanojanh teyet tato kꞌul chijute kobꞌeybꞌal yunhe istzala Komam Dios jinh,
kaw hak tuꞌ cheyute tinanh.
Yuxin chijaltojanh kat kotaqꞌentojanh teyet,
hakojtam Komam Jesucristo chihalnito teyet tato chelahiko heyaqꞌni tzalaho iskꞌul Komam Dios.
2 Heyohtaj bꞌaytet hekuybꞌanil aqꞌbꞌil teyet juhanh,
yu ischejbꞌanil Komam Jesucristo.
3 Wal xin choche Komam Dios tato toholnhetikꞌa hebꞌeybꞌal yul sat Komam,
machojabꞌ hunu mak chiꞌixli maka chiwinajli.
4 Hunun hex tiꞌ,
yilal heyohtanheni tato yinhnhe heyixal cheyako henabꞌal,
ayojabꞌ yelapno ebꞌix yul hesat.
5 Machojabꞌtaj tzet choche henimanil chiꞌekꞌ yinh henabꞌal,
hakaꞌ chute isbꞌa anma mach ohtanheho Komam Dios.
6 Mach cheyixnhe yixal hunuxa heyuxhtaj,
yuto haꞌ mak chiꞌuten hunteqꞌan istxꞌojal tuꞌ chiꞌay isyaꞌtajil yibꞌanh yu Komam Dios,
hakaꞌtikꞌa yu jalnikanojanh teyet yebꞌ hakaꞌ yu kexkokachnikanojanh.
7 Yuto maxhtaj yu kowatxꞌen istxꞌojal yuxinto awtebꞌilonh yu Komam Dios,
wal xin to yu kopohnilo kobꞌa xol istxꞌojal yuxin awtebꞌilonh.
8 Maknhetikꞌa chiyahni hunteqꞌan kuybꞌanile chiwaltiꞌan,
maxhtaj hunu anma lanhan isyahni,
wal xin to haꞌ Komam Dios chisyaha,
Komam aqꞌnhe Komam Espíritu Santo jet.
9 Wal yinh hexahannhen hebꞌa hunun hex mach yilalo chintzꞌibꞌnhetojan teyet,
yuto kuybꞌilexxa yu Komam Dios hexahannhen hebꞌa hunun hex.
10 Wohtajan tato kaw xahan cheyil sunil makta ayxako yul isqꞌabꞌ Komam ay yul ismajul Macedonia,
yajaꞌ chijaltojanh teyet tato kam chelahiko hexahannhen hebꞌa.
11 Chiwaltojan teyet,
aweko yinh heyanma heye yinh aqꞌankꞌulal,
haweko hemunil yinh hekꞌul.
Munlahanhwej,
hakaꞌtikꞌa jute jalnikanojanh teyet.
12 Ta cheyije hakaꞌ tuꞌ,
kꞌul istzotel anma maxhto ayoko yul isqꞌabꞌ Komam teyinh,
yebꞌ mach yaꞌtajo chiꞌekꞌ heyu.
Kuybꞌanile yinh yet chihul Komam Jesucristo hunelxa
13 Hex wuxhtaj,
hex wanabꞌ,
chijochehanh tato cheyohtanhelo tzet chiyaqꞌle anma ayxako yul isqꞌabꞌ Komam xalekamtoj,
haxinwal mach cheyiqꞌ bꞌiskꞌulal,
hakaꞌ anma machi bꞌay chikawxi iskꞌul.
14 Hakaꞌtikꞌa janayto yul janma tato kam Komam Jesucristo,
yitzitzbꞌipaxokanh xol kamom hunelxa,
haktikꞌapax tuꞌ janayto yul janma tato makta ayxako yul isqꞌabꞌ yet iskami chati Komam Dios yinta Komam Jesucristo yet chul Komam hunelxa.
15 Yuxinto chijalanh huneꞌ kuybꞌanile yet Komam Jesucristo tiꞌ teyet,
tato hanhonh itzitzonh yet chul Komam hunelxa,
mach chonhbꞌabꞌito sata makta xalekamtoj.
16 Yuto hayet chꞌawi Komam Jesús yet chaqꞌni chejbꞌanile,
kat yel yaw naj arcángel,
kat yoqꞌ istrompeta Komam Dios,
kat istit Komam yul satkanh;
haꞌ makta ayxako yul isqꞌabꞌ Komam yet iskami haꞌ chiꞌitzitzbꞌikanh bꞌabꞌel.
17 Wal hanhonh ayonhtokꞌo xin,
chonhilaxkanh yebꞌ anma tuꞌ,
kat jah xol moyan kochahno Komam xol jaqꞌeqꞌ.
Hak tuꞌ chu japni iskꞌatanh Komam yinh hunelnhe.
18 Yuxinto iptzewe hebꞌa hunun hex yu huneꞌ kuybꞌanile tiꞌ.