5
Wal yinh tzet tiempohal yebꞌ tzet orahil chiyu huneꞌ tuꞌ,
hex wuxhtaj,
hex wanabꞌ,
mach yilalo walnitojan teyet.
2 Hex tiꞌ heyohtaxa yinh istzꞌayikal yet chul Komam,
lahan hakaꞌ yet chihul lemna hunu naj elqꞌom yet aqꞌbꞌalil,
yet tona nahul ay anma,
hak tuꞌ xin chiyu yul Komam.
3 Yuxin hayet chiyalni anma hakaꞌ tiꞌ:
«Wal tinanh aqꞌankꞌulalxa ye sunil,»
xhi.
Haꞌ ton tuꞌ yet chihul lemna kꞌayilal yibꞌanh anma,
hakaꞌ yet chiꞌichiti isyaꞌil iskꞌul hunu ix ix,
hak tuꞌ chiyaqꞌle anma,
matxa chiyu iskolni isbꞌa.
4 Yaj wal hex tiꞌ wuxhtaj,
wanabꞌ,
matxa ayexoko xol qꞌejholo,
yuxin mach tona nahul ay hex yet chihul lemna Komam,
hakaꞌ anma tona nahul aya yet chihul lemna naj elqꞌom yinh.
5 Wal hex tiꞌ,
yetxa issajilqꞌinal heyehi,
hakaꞌ mak chiꞌekꞌ tzꞌayikal hak tuꞌ heyehi,
yuxin matxa yeto aqꞌbꞌal yebꞌ qꞌejholo heyehi.
6 Yuxin machojabꞌ ayoko kowayanh hakaꞌ hunteqꞌan anma tuꞌ.
Wal xin majwahojonhwe yinh yulbꞌal Komam,
helanojabꞌ chijute kobꞌa.
7 Johtaj ta yet aqꞌbꞌalil chiway anma,
yebꞌpaxo aqꞌbꞌalil chiꞌukꞌi anma.
8 Wal honhpaxo hanhonh tiꞌ yetonhxa issajilqꞌinal,
yuxin toholojabꞌ chijute konabꞌal.
Yilal janiko janma yinh Komam,
yebꞌpaxo xahanojabꞌ chijil kobꞌa kosunil.
Ta hak tuꞌ chijute lahanonh hakaꞌ ebꞌnaj soldado chiskol isbꞌa yu chꞌen chꞌen pichbꞌiliko yinh istxam iskꞌul.
Hakaꞌojabꞌ yehato chꞌen casco yinh iswiꞌ ebꞌnaj soldado yu iskolni isbꞌa,
hakojabꞌ tuꞌ iskawxi kokꞌul yinh kokolbꞌanil.
9 Maxhtaj yu yaniti Komam Dios ishowal jibꞌanh yuxinto konhissikꞌiloj,
wal xin to yu kochahni huneꞌ kokolbꞌanil tet Komam Jesucristo.
10 Yuto Komam Jesucristo kam koseleloj,
yuxin waxanhka itzitzonh maka kamomonhxa yet chihul Komam,
hunxanhe chijukano yebꞌ Komam kosunil.
11 Yuxin iptzewe hebꞌa hunun hex,
kat helinhbꞌan hebꞌa,
hakaꞌtikꞌa lanhan heyuten tuꞌ.
Kuywa yaꞌ Pablo yinh anma ayxako yul isqꞌabꞌ Komam
12 Hex wuxhtaj,
hex wanabꞌ,
chijaltojanh teyet tato yilal heyijen tzet chal ebꞌyaꞌ chimunla texol bꞌey tuꞌ,
ebꞌyaꞌ chexijbꞌan yinh yet Komam,
yebꞌ chiꞌaqꞌni hekuybꞌanil.
13 Nimanojabꞌ yelapno ebꞌyaꞌ yul hesat,
xahanojabꞌ cheyil ebꞌyaꞌ,
yuto yinh yet Komam chimunla ebꞌyaꞌ.
Ehanhwe yinh aqꞌankꞌulal,
machojabꞌ howal texol hunun hex.
14 Hex wuxhtaj,
hex wanabꞌ,
chijalpaxtojanh teyet tato chekach mak mach chisje iskꞌul chimunlahi.
Iptzewe mak etza chipax yintaj,
kolwahanhwepaxo yinh mak machi yip yanma yinh Komam.
Ayojabꞌ henimankꞌulal teyinh hesunil.
15 Kam cheyil hebꞌa,
tajka chepajtze tet makta chiwatxꞌen istxꞌojal teyinh,
wal xin haꞌ heyet aweko yinh hekꞌul hewatxꞌen iskꞌulal teyinh hunun hex,
yaj maxhnhetaj teyinh,
to yinhpaxo sunil anma.
16 Tzalahilalojabꞌnhetikꞌa heyehi.
17 Txahlanhwe tet Komam Dios yinh hunun tzꞌayik.
18 Aqꞌwe yuchꞌandiosal tet Komam Dios yinh sunil,
yuto hak tuꞌ choche Komam teyinh,
yuto ayxako heyanma yinh Komam Jesucristo.
19 Mach cheyilo yip Komam Espíritu Santo yul heyanma.
20 Mach cheyah chejbꞌanile chitit tet Komam Dios chiyal ebꞌyaꞌ ischejabꞌ Komam.
21 Kaw okanhwe hetxumuꞌ sunil tzet chihal-laxi,
kat xin hekꞌubꞌankano yul heyanma bꞌaytet kꞌul.
22 Pohwelo hebꞌa yinh sunil istxꞌojal.
23 Haꞌojabꞌ Komam Dios chiꞌaqꞌni aqꞌankꞌulal,
haꞌ chexpohnikanilo xol istxꞌojal,
kat iskꞌubꞌan heyanma,
henabꞌal yebꞌ henimanil,
hak tuꞌ xin machi nino istxꞌojal teyinh yet chul Komam Jesucristo.
24 Komam konhawteni,
kaw tohol Komam,
masan chiyij isbꞌa sunil tiꞌ yu Komam.
Yalto yaꞌ Pablo ta chil isbꞌa makta ayxako yul isqꞌabꞌ Komam
25 Hex wuxhtaj,
hex wanabꞌ,
txahlanhwepaxo jinhanh hanhonhtiꞌanh.
26 Halwe tet sunil ebꞌnaj juxhtaj yebꞌ ebꞌix janabꞌ ta chil isbꞌa yinh iskawil yinh kaw tzalahilal,
yuto yetxa Komam yehi.
27 Haꞌ Komam aqꞌnhe huneꞌ inmuniltiꞌan,
yuxin chiwaltojan teyet tato cheyawte huneꞌ hum tiꞌ xol sunil ebꞌyaꞌ juxhtaj yebꞌ ebꞌix janabꞌ yetxa Komam Dios.
28 Haꞌojabꞌ Komam Jesucristo chiꞌanayo iskꞌulchꞌanil iskꞌul texol hesunil.
¡Hakojabꞌ tuꞌ!