3 Hex wuxhtaj,

hex wanabꞌ,

kaw yilal chijaqꞌanh yuchꞌandiosal tet Komam Dios teyinh,

hakaꞌ kaw yehi yuto hunun tzꞌayik ischꞌibꞌ heyaniko heyanma yinh Komam Dios,

yebꞌpaxo xin kaw ekꞌbꞌalto chexahannhe hebꞌa hunun hex.

4 Yuxin kaw chitzala janmahanh chijalnihanh hekꞌulal xol hunun majan makta ayxako yul isqꞌabꞌ Komam Jesucristo,

yuto kaw niman hekꞌul,

cheyanipaxiko heyanma yinh Komam Dios,

waxanhka xin kaw chextzumbꞌelaxikꞌoj kat heyetalaxi.

5 Haꞌ ton tiꞌ chihalniloj tato yinh kaw istoholal chil Komam yinh tzet chiꞌeliko anma,

kat yalni Komam teyet tato ay heyok yinh bꞌay chiꞌok Komam yahawiloj,

yuto lanhan heyetan heyanma tinanh.

6 Wal xin kaw haꞌ istoholal chiswatxꞌe Komam Dios,

yuxin yilal yanayo Komam isyaꞌtajil yibꞌanh hunteqꞌan anma chiꞌaqꞌni ekꞌoyaꞌ heyanma.

7-8 Hex lanhan heyabꞌen isyaꞌtajil tinanh,

chexyiqꞌalo Komam Dios xol isyaꞌtajil tuꞌ jintajanh yet chitit Komam Jesucristo yul satkanh yebꞌ ebꞌnaj ángel kaw aykano yip.

Chul Komam xol qꞌa qꞌaꞌ yaqꞌaꞌ isyaꞌtajil tet anma mach chisje yohtanhelo Komam Dios,

anma mach chiyoche yabꞌeꞌ istzotiꞌal kolbꞌanile aykano yu Komam Jesucristo.

9 Chiꞌalaxkanto anma tuꞌ yinh isyaꞌtajil yinh hunelnhe,

kat yilaxilo sata Komam Dios,

hak tuꞌ xin matxa bꞌaqꞌinhal chiyil anma tuꞌ iskꞌulal Komam yebꞌ yip Komam.

10 Hayet huneꞌ tzꞌayikal yet chihul Komam tuꞌ,

kaw niman yelapno ye Komam yul sat makta yetxa Komam yehi,

yebꞌ mak xayayto yul yanma yinh Komam.

Xol mak tuꞌ xin ayexiko hex tiꞌ,

yuto heyako heyanma yinh huneꞌ tzotiꞌ halbꞌilkano juhanh.

11 Yuxinto kaw chonhtxahlihanh teyinh tet Komam Dios haxinwal kaw kꞌul hex yul sat,

ay heyok yinh yawtebꞌal Komam.

Chikoqꞌannipaxojanh ta chaqꞌ Komam yip teyet hewatxꞌen sunil iskꞌulal,

yebꞌ yinh munil chewatxꞌe tet Komam,

yuto ayko heyanma yinh Komam.

12 Hak tuꞌ xin chiꞌalaxiko ismay Komam Jesucristo heyu,

kat yalaxpaxiko hemay yu iskꞌulal Komam Dios yebꞌ xin Komam Jesucristo.