2 Tesalonicenses 2

Kuybꞌanile yinh yet yalanhto maxhto chihul Komam Jesucristo

Tinanh hex wuxhtaj,

hex wanabꞌ,

yibꞌanhilo yet chul Komam Jesucristo,

yebꞌ yet chonhiskutxbꞌaniko Komam iskꞌatanh;

kaw chijaltojanh teyet

2 machojabꞌ subꞌutajo hexiwkanh,

yebꞌ henani hunuxa tzet ye tuꞌ ta chihal-lax teyet tato istiempohalxa yulbꞌal Komam Jesucristo.

Waxanhka chihal-lax teyet ta ay tzet il-lax yinh hakaꞌ wayike,

maka hunuxa tzotiꞌ,

maka hunu carta chiꞌapni teyet hakojtam hanhonhanh chijatojanh chihalni tato ayxayo istzꞌayikal yulbꞌal Komam Jesucristo.

3 Mach cheyaqꞌ subꞌchaho hebꞌa,

yuto yet yalanhto maxhto chihul Komam,

ay huneꞌ tiempohal bꞌay tzetkꞌa mak chipakꞌiko yinh Komam Dios,

kat isyenikanh isbꞌa huneꞌ naj yahawil istxꞌojal.

Haꞌ huneꞌ naj tuꞌ yilal yalaxto naj yinh isyaꞌtajil xol qꞌa qꞌaꞌ.

4 Haꞌ ton huneꞌ naj tuꞌ chiyikanh isbꞌa kat yok naj howal yinh hunteqꞌan chihal-lax Diosal,

maka hunteqꞌan bꞌay chiyiyo isbꞌa anma.

Chanikto isbꞌa naj yul Yatut Komam Dios kat yalni naj tato haꞌ naj kaw dioskanoj.

5 ¿Tom matxa chitit huneꞌ tiꞌ yul hekꞌul xin?

Kaw walan teyet yet ayinan texol.

6 Yajaꞌ heyohta mak chiꞌok majno sata naj yunhe mach chihul naj yalanhto istiempohal bꞌay halbꞌilkano yu Komam Dios.

7 Wal xin,

chimunla naj yahawil istxꞌojal yinh ewantajil xol anma tinanh,

kachanxanhe xin chechma naj yilaxilo huneꞌ mak mach chichahniti naj,

kat yul lemna naj.

8 Haꞌ to tuꞌ xin chisyekanh isbꞌa naj yahawil istxꞌojal tuꞌ,

yajaꞌ hayet chihul Komam Jesucristo yebꞌ isqꞌaqꞌal yip kat isxuno kamo Komam naj.

9 Naj yahawil istxꞌojal tuꞌ,

haꞌ yip naj matzwalil ayko yinh naj.

Kanh chute isbꞌa naj,

kaw ay tzet chilaiswatxꞌe naj,

chikꞌay iskꞌul anma yilni.

Chisyenipaxo naj hunteqꞌan kꞌaybꞌalkꞌule yunhe issubꞌcha anma yu naj.

10 Sunil yip ej istxꞌojal chimunla yu naj yahawil istxꞌojal tuꞌ,

yunhe yaqꞌni subꞌchaho naj anma kat kam yetanto isbꞌa,

kat istokano yinh isyaꞌtajil.

Yuto hunteqꞌan anma tuꞌ matxatikꞌa choche iskꞌul ischabꞌ isyelal tzet chal Komam Dios,

yuxin mach chischah iskolbꞌanil tet Komam.

11 Yu mach chischah anma isyelal Komam Dios,

yuxin tonhe chil Komam chiꞌaqꞌlax somchahoto isnabꞌal kat yanito isbꞌa xol hunteqꞌan leqꞌtiꞌal tuꞌ.

12 Hak tuꞌ chu yalaxkanto anma tuꞌ yinh isyaꞌtajil yu machi yayto Istzotiꞌ Komam Dios yul yanma,

yu ekꞌna chocheto sunil istxꞌojal.

Sikꞌbꞌilonhxalo yu Komam yu kochahni kokolbꞌanil

13 Hex wuxhtaj,

hex wanabꞌ,

kaw xahan ay hex yu Komam Jesucristo.

Yilal jaqꞌnihanh yuchꞌandiosal tet Komam teyinh,

yuto yet yalanhtokanoj kexissikꞌnilo Komam yunhe hekolchakano yu Komam Espíritu Santo,

Komam kexpohnikanilo yeto Komam Dios,

yebꞌ yu heyanayto yul heyanma yinh isyelal.

14 Yu huneꞌ tuꞌ yuxin kexyawte Komam,

yu istzotiꞌal kolbꞌanile konhekꞌanh jalaꞌkꞌojanh teyet yuxin ay heyok yinh issaqꞌalil ayko yinh Komam Jesucristo.

15 Yuxin hex wuxhtaj,

hex wanabꞌ,

toholojabꞌ cheyute hebꞌa yinh Komam,

mach chekꞌayto kuybꞌanile halbꞌilkano teyet juhanh yebꞌ kuybꞌanile jatojanh teyet yul carta.

16 Kaw xahan ayonh yu Komam Jesucristo,

yebꞌ yu Komam Dios Mame,

haꞌ chiꞌaqꞌni yaqꞌlobꞌal janma yinh hunun tzꞌayik.

Chaqꞌnipaxo huneꞌ iskꞌulchꞌanil jet bꞌay chikawxi kokꞌul.

17 Haꞌojabꞌ Komam Dios chiꞌaqꞌni yip heyanma kat kexislinhbꞌani,

haxinwal kꞌul tzet chewatxꞌe yul sat Komam yebꞌ tzet cheyala.