Txahlanhwe jinhanh
3
Wal tinanh,
hex wuxhtaj,
hex wanabꞌ,
txahlanhwe jinhanh,
haxinwal yinh anhe chiꞌapni Istzotiꞌ Komam Dios sunil bꞌaytajtuꞌwal,
yebꞌ yunhe istzala iskꞌul anma ischahnikanoj,
hakaꞌ yu istzala hekꞌul yet heyaniko hebꞌa yul isqꞌabꞌ Komam.
2 Txahlanhwepaxoj yu konhiskolnilojanh Komam Dios yul isqꞌabꞌ anma machiswalil yebꞌ txꞌoj isnabꞌal,
yuto mach sunilo anma chiꞌanayto yul yanma yinh Istzotiꞌ Komam Dios.
3 Wal Komam Dios chij isbꞌa sunil tzet chala,
haꞌ Komam chexiptzeni,
kat kexiskolni yul isqꞌabꞌ istxꞌojal.
4 Chikawxi kokꞌulanh yinh Komam Dios tato ayexiko heyijen sunil tzet chijalanh teyet,
yebꞌ ta kaw chelahiko heyijeni.
5 Haꞌojabꞌ Komam Jesucristo chikolwa teyinh,
haxinwal cheyohtanhe ta xahan ay hex yu Komam Dios,
kat xin istecha sunil isyaꞌtajil heyu yu yip Komam Jesucristo.
Sunil mak yilal ismunlahi
6 Hex wuxhtaj,
hex wanabꞌ,
yinh isbꞌi Kokolomal Jesucristo chijaltojanh huneꞌ chejbꞌanile tiꞌ teyet tato chepohilo hebꞌa yinh ebꞌnaj juxhta mach chisje iskꞌul munlahoj,
yebꞌ mach chisyije kuybꞌanile halbꞌilkano teyet juhanh.
7 Yuto heyohtaxatikꞌa tzet wal heyuni,
hakaꞌ yebꞌil teyet juhanh.
Hanhonhtiꞌanh yet ayonhanh texol machi hunu tzꞌayikal tiꞌ mach konhmunlahanh.
8 Heyohtaj tato mach tonheho konhwaꞌanh texol,
wal xin konhmunlahanh tzꞌayikal yebꞌ aqꞌbꞌalil yunhe matzet chikoqꞌananh teyet.
9 Waxanhka xin ay jipanh koqꞌannihanh tzet chikolohanh teyet,
yaj konhmunlahanh yunhe koyenikanojanh tato hak tuꞌ cheyutepaxoj.
10 Yet ayonhanh texol tuꞌ,
chijalnihanh huneꞌ kuybꞌanile tiꞌ:
«Mak mach chisje iskꞌul chimunlahi,
machojabꞌ chiwaꞌpaxoj,»
konhchihanh.
11 Yaj xin xajabꞌepaxojanh tato ay mak texol tuꞌ tonhe chiꞌekꞌi,
mach chimunlahi;
tonhetikꞌa chato isbꞌa xol tzet ye tuꞌ machi yok yinh.
12 Haꞌ tet hunteqꞌan anma tuꞌ chijaltojanh yu yip Komam Jesucristo tato munlahojabꞌ yinh aqꞌankꞌulal,
haxinwal haꞌ kaw chiꞌiqꞌni tzet chislo.
13 Hex wuxhtaj,
hex wanabꞌ,
machojabꞌ chexsikilo hewatxꞌen iskꞌulal.
14 Tato ay mak mach chiyijen tzet chijaltojanh yul huneꞌ hum tiꞌ,
tonhehojabꞌ cheyila maka matxa xin chehunbꞌa hebꞌa yebꞌi haxinwal chitxꞌixwikanh.
15 Yaj xin mach cheyako hehowal yinh,
wal xin kuywe yinh istoholal,
yuto juxhtapaxo yehi.
Yet yalnito yaꞌ Pablo ta chil isbꞌa makta ayxako yul isqꞌabꞌ Komam Dios
16 Haꞌojabꞌ Komam yahawil aqꞌankꞌulal chiꞌaqꞌni aqꞌankꞌulal teyet hesunil yinh hunun tzꞌayik.
Tzalahojabꞌ hekꞌul,
waxanhka ay bꞌiskꞌulal chiꞌay texol.
Ayojabꞌnhetikꞌako Komam heyetbꞌiho hesunil.
17 Wal hanin Pablo intiꞌan,
hankawinan chintzꞌibꞌnhetojan tato cheyil hebꞌa yinh hekawil.
Inbꞌihan chiꞌok yinh huneꞌ hum tiꞌ hakaꞌ chu intzꞌibꞌnhentojan sunil ej incartahan.
18 Haꞌojabꞌ Komam Jesucristo chiꞌaqꞌni iskꞌulchꞌanil teyet hesunil.
¡Hakojabꞌ tuꞌ!