2 Chintzꞌibꞌnhetojan huneꞌ carta tiꞌ tawet wuxhta Timoteo;

inkꞌaholan haweh yinh Komam,

yuto wuhan yuxinto hachayto isyelal yul hawanma.

Yaqꞌabꞌ Komam Dios Mame yebꞌ Jahawil Jesucristo iskꞌulal yebꞌ issaqꞌalil iskꞌul yebꞌ xin aqꞌankꞌulal tawet.

3 Yet inbꞌeyan yul ismajul Macedonia,

kaw inqꞌanan tawet tato chaxhkankano yul konhobꞌ Efeso yunhe hakachni ebꞌnaj chiꞌaqꞌni hunteqꞌan kuybꞌanile maxhtaj yekoj.

4 Machojabꞌ chischah ebꞌnaj juxhtaj yebꞌ ebꞌix janabꞌ yabꞌeꞌ hunteqꞌan ikꞌtiꞌ yebꞌ tzotiꞌ mach istanhbꞌal yibꞌanhilo ebꞌnaj jichmam.

Hunteqꞌan tuꞌ,

kaw komon tzotiꞌ teyelenhe bꞌahil yehi,

mach chikolwa jinh yinh koyijen tzet chal Komam Dios,

yebꞌ janiko janma yinh Komam.

5 Haꞌ tzet yelapno chejbꞌanile chiwaltotiꞌan,

haꞌ koxahannhen kobꞌa,

huneꞌ koxahannhen kobꞌa chitit yul janma kaw saj,

yebꞌ machi nichꞌano istxꞌojal nabꞌil yu,

yebꞌ janayto yul janma yinh Komam yinh kaw isyelal.

6 Wal xin,

ay ebꞌnaj texol tuꞌ xayilo isbꞌa yinh hunteqꞌan iskꞌulal tuꞌ,

haxa yinh hunteqꞌan issukal bꞌay chako isnabꞌal.

7 Choche ebꞌnaj chꞌok ebꞌnaj kuywawomal yinh kuybꞌanile aykano yu yaꞌ Moisés,

yaj mach chitxumcha yu ebꞌnaj yinh tzet chala,

yebꞌpaxo yinh tzet chaqꞌ ebꞌnaj iskuyuꞌ anma,

kaw xin chischilbꞌa ebꞌnaj yalni.

8 Johtaj tato kꞌul kuybꞌanile aykano yu yaꞌ Moisés,

yajaꞌ ta hakaꞌ tzet choche Komam Dios yinh,

haꞌ chijikꞌoj.

9 Txumweloj tato mach aqꞌlax chejbꞌanile yu yaꞌ Moisés yu iskachwa yinh anma kꞌul chute isbꞌa;

wal xin to yu iskachwa yinh anma manhkꞌom yinh tzet chal Komam Dios,

yebꞌ mach yijemoj,

yebꞌ hunteqꞌan machi Dios yul sat,

kaw mulumpaxoj,

hunteqꞌan anma machiswalil yanma,

hunteqꞌan chiyahni sunil tzet chitit bꞌay ay Komam Dios,

hunteqꞌan chipotxꞌni ismam maka ismiꞌ,

yebꞌ sunil hunteqꞌan anma maqꞌom.

10 Chikachwapaxo yinh makta ixlom yebꞌ makta winajlom,

yebꞌ hunteqꞌan ebꞌnaj cheta isbꞌa yebꞌ yet winajil,

yebꞌ mak chiꞌelqꞌanto yet anmahil,

yebꞌ xin mak leqꞌtiꞌ,

yebꞌ hunteqꞌan tonhetikꞌa chawte isbꞌi Komam Dios xol sukal tzotiꞌ chilayala,

hakpax tuꞌ xin sunil hunteqꞌan anma chikajni kuybꞌanile kaw yel chala.

11 Haꞌ huneꞌ kuybꞌanile kaw yel chala,

haꞌ ton Tzotiꞌ Kꞌul yet Kolbꞌanile kaw saqꞌalkanoj.

Huneꞌ yaqꞌkano Komam Dios wetan yunhe walnikꞌojan xol anma;

kaw niman yelapno Komam Dios.

12 Chiwaqꞌan yuchꞌandiosal tet Komam Jesucristo Jahawil,

yuto yaqꞌ Komam wipan,

yu yijem hinan chil Komam,

yuxinto kinyakojan Komam yinh ismunil,

13 waxanhka xin walan tzotiꞌ txꞌoj yinh Komam yet yalanhtokanoj,

yebꞌ kaw kaj wilan Komam,

yebꞌ hinbꞌahan Komam.

Yaj xin kaw tzꞌay iskꞌul Komam Dios winhan yuto mach wohtajojan tato machiswalil hunteqꞌan inwatxꞌeꞌ tuꞌan,

yebꞌ xin maxhto chinchahan Komam Jesucristo yul wanmahan.

14 Yajaꞌ kaw nimankano iskꞌulchꞌanil iskꞌul Komam yaqꞌ wetan,

yebꞌ wanaytojan yul wanmahan yinh Komam,

yaqꞌnipaxo iskꞌulchꞌanil iskꞌul wetan hakaꞌ huneꞌ chaqꞌ Komam tet mak hunxa ye yebꞌ Komam Jesucristo.

15 Huneꞌ chiwaltiꞌan kaw yelkanoj.

Sunil anma yilal yanayto yul yanma tato hulikꞌo Komam Jesucristo yul sat yibꞌanhqꞌinal tiꞌ yunhe iskolni sunil anma mulum.

Xol sunil hunteqꞌan anma mulum tuꞌ,

hanintiꞌan ekꞌbꞌal mulum hinan.

16 Yuxin tzꞌay iskꞌul Komam Dios winhan.

Hak tuꞌ xin,

winhan isyelo Komam Jesucristo sunil isnimankꞌulal chiyaqꞌ tet anma mulum.

Yuxinto haninan ayinikojan yechelo sunil anma chichahnayto Komam Jesucristo yul yanma yunhe ischahnikano qꞌinale mach istanhbꞌal.

17 Yuxin nimanojabꞌ yelapno Komam yul kosat,

jaqꞌaꞌweko ismay Komam Dios yinh sunilbꞌal tiempo.

Komam tuꞌ machi bꞌaqꞌinhal chikamiloj,

yahawnhetikꞌa yehiko sunilbꞌal tiempo mach chijil yinh Komam yu kosat,

haꞌnhe kaw Dios.

¡Hakojabꞌ tuꞌ!

18-19 Wuxhta Timoteo,

inkꞌaholan yinh Komam.

Chiwaltojan huneꞌ hachejbꞌanil tiꞌ,

tato chawihti hawanma tawinh,

hapahnito istxꞌojal hakaꞌ hunu naj soldado mach chixiw yaqꞌni howal.

Hak tuꞌ chawute habꞌa,

kꞌulojabꞌnhetikꞌa hanabꞌal hakaꞌ yalni hunteqꞌan ebꞌyaꞌ tawinh,

Komam Espíritu aqꞌni yalaꞌ ebꞌyaꞌ.

Aypaxo hunteqꞌanxa ebꞌnaj yu mach kꞌulo chiꞌekꞌ yinh isnabꞌal yuxinto yilo yanma yinh Komam.

20 Hak tuꞌ yute isbꞌa naj Himeneo yebꞌ naj Alejandro;

yuxin wakojan ebꞌnaj yul isqꞌabꞌ naj matzwalil yunhe yilni ebꞌnaj tato mach chu jalni tzotiꞌ txꞌoj yinh Komam Dios.