2 Chintzꞌibꞌnhetojan huneꞌ incartatiꞌan tawet wuxhta Timoteo,

kaw xahan ayach wuhan,

yuto inkꞌaholan haweh yinh Komam.

Haꞌojabꞌ Komam Dios Mame yebꞌ xin Komam Jesucristo chiꞌaqꞌni iskꞌulchꞌanil iskꞌul yebꞌ aqꞌankꞌulal tawet,

kat istzꞌay iskꞌul tawinh.

3 Hayet chaxhinnanitijan yet chintxahlihan hunun tzꞌayik yebꞌ hunun aqꞌbꞌal chiwaqꞌan yuchꞌandiosal tet Komam Dios tawinh.

Yinh istoholal innabꞌalan chinmunlahan yinh ismunil Komam Dios,

hakaꞌ yu ismunla ebꞌyaꞌ wichmaman yet payat.

4 Chinnatijan yet hawoqꞌi yet hakankano wuhan.

Chiwochehan chaxhwilan hunelxa yunhe kam yahkanokanh tzalahilal yul wanmahan.

5 Chinnatijan tato yinh kaw yeli ayko hawanma yinh Komam Jesucristo.

Hakaꞌ hamiꞌ ixnam Loida yebꞌ hamiꞌ Eunice,

haꞌ bꞌabꞌel yako yanma yinh Komam,

kaw xin wohtajan tato hak tuꞌ hawanipaxiko hawanma yinh Komam.

6 Yuxin chiwaltojan tawet tato ayachojabꞌnhetikꞌako hawaniko yip hahelanil yaqꞌkano Komam Dios tawet yet wanayo inqꞌabꞌan yibꞌanh hawiꞌ.

7 Wal xin,

huneꞌ Espíritu xayaqꞌ Komam Dios jet,

mach chiyaqꞌ xiwkilal yul janma,

wal xin to chaqꞌ yip janma,

yebꞌ koxahannhen kobꞌa,

yebꞌpaxo kokachni kobꞌa yinh ej istxꞌojal.

8 Yuxin mach chaxhtxꞌixwi hawalnikꞌo Istzotiꞌ Komam Jesucristo,

yebꞌ xin mach chaxhtxꞌixwipaxoj yuto ayinikojan preso tiꞌ yu Istzotiꞌ Komam.

Wal xin yu hawip chaqꞌ Komam Dios yilal hachahni ej isyaꞌtajil chihul tawibꞌanh yu chawalikꞌo Istzotiꞌ Komam chiꞌaqꞌni kolbꞌanile.

9 Wal tinanh kolbꞌil honhxa yu Komam,

yebꞌ awtebꞌil honhxa yu jokkano yeto Komam.

Yaj maxhtaj yu tzet chikowatxꞌe yuxin kolbꞌil honhxa,

machoj;

wal xin to yu nabꞌilxatikꞌa yu Komam yet yalanhto maxhto chiswatxꞌe yul sat yibꞌanhqꞌinal tiꞌ,

yaqꞌnipaxo iskꞌulchꞌanil iskꞌul jet yu Komam Jesucristo.

10 Isyelo Komam Dios iskꞌulchꞌanil iskꞌul tuꞌ yinh Komam Jesús yet yulikꞌo yul sat yibꞌanhqꞌinal tiꞌ.

Yaqꞌnikano tanho yip huneꞌ kamikal jibꞌanh,

yaqꞌni ohtanhelaxo huneꞌ qꞌinale mach istanhbꞌal yu kuybꞌanile yet kolbꞌanile.

11 Haꞌ Komam Dios aqꞌnhe inmunilan walnikꞌojan huneꞌ Tzotiꞌ yet kolbꞌanile tiꞌ,

kinyanikojan ischejabꞌo Komam Jesucristo,

yebꞌ kuywawomal xol anma mach Israeloj.

12 Yuxin chiwilan hunteqꞌan isyaꞌtajil chiꞌay wibꞌanhtiꞌan,

yajaꞌ machi nichꞌano chintxꞌixwihan,

yuto wohtajan mak yinh ayko wanmahan.

Wohtapaxojan ta tzet chiwaqꞌan iskꞌubꞌaꞌ Komam Dios,

ay yip Komam iskꞌubꞌani masanto yet chꞌayilo islahobꞌal tzꞌayik.

13 Hunteqꞌan kuybꞌanile aqꞌbꞌil tawet wuhan,

yinh kaw yeli yet Komam Dios yehi,

haꞌ hunteqꞌan tuꞌ chawilto habꞌeybꞌalnheni.

Tinanh hunxa je yebꞌ Komam Jesucristo,

yuxin ako hawanma yinh Komam,

yebꞌ xin xahan chawil hawet anmahil.

14 Wal xin,

yu yip Komam Espíritu Santo ayko jinh hununonh,

yuxin kaw chayaꞌilnhe hunteqꞌan kuybꞌanile aqꞌbꞌil tawet yu Komam Dios.

15 Hawohtaj tato sunil ebꞌnaj ay bꞌey yul ismajul Asia bꞌejnhe inkanojan,

xol ebꞌnaj tuꞌ ayko naj Figelo yebꞌ naj Hermógenes.

16 Haꞌojabꞌ Komam Dios chiꞌanayo iskꞌulal yibꞌanh makta ay bꞌey yatut juxhta Onesíforo,

yuto txꞌiꞌal el hulikꞌo yaꞌ yaqꞌaꞌ isnimanbꞌal inkꞌulan.

Waxanhka ayiniktijan yul preso tiꞌ,

yaj mach txꞌixwilo yaꞌ winhan.

17 Wal xin hulnhe yaꞌ yul konhobꞌ Roma tiꞌ,

yok yaꞌ kinissaynihan,

masan kinilchahan yu yaꞌ.

18 Haꞌojabꞌ Komam Dios chiꞌaqꞌni iskꞌulchꞌanil iskꞌul tet juxhta Onesíforo tuꞌ yinh islahobꞌal tzꞌayik.

Hach tiꞌ kaw hawohtaj ta kolwa yaꞌ jinh yet ayonh yul konhobꞌ Efeso.