Iskuybꞌanil ebꞌnaj ayikto yalanh chejbꞌanile
6
Chiwaltojan tawet yinh ebꞌnaj loqꞌbꞌil yu ispatrón yu yok chejabꞌoj.
Ayojabꞌ yelapno yahaw ebꞌnaj tuꞌ yul sat,
haxinwal mach chibꞌuchlax isbꞌi Komam Dios yebꞌpaxo xin kuybꞌanile chijalanh.
2 Yaj tato ay hunu mak ayxako ispatrón tuꞌ yul isqꞌabꞌ Komam Dios,
machojabꞌtaj yu tuꞌ yuxin matxa yelapno naj yul sat,
yu yuxhtaxa isbꞌa iskawanhil yinh Komam,
wal xin kaw kꞌulojabꞌ chu ismunla naj chejabꞌ yul isqꞌabꞌ ispatrón,
yuto naj chichahni huneꞌ munil tuꞌ ayxako yul isqꞌabꞌ Komam,
juxhtaxa yehi,
yebꞌ kaw xahan ay ju.
Haꞌ hunteqꞌan tuꞌ,
yilal hawok hakuyni kat hawalni tato yilal isyijelaxi.
Mach chu janiko janma yinh chꞌen melyu
3 Tato ay anma nan kuybꞌanile chiyalikꞌoj,
mach lahano yebꞌ kuybꞌanile kaw kꞌul yet Komam Jesucristo,
yebꞌ mach lahano yebꞌ kuybꞌanile chalni yinh tzet chu yaniko konabꞌal yinh Komam Dios,
4 hunteqꞌan anma tuꞌ,
kaw kanhye yalni,
yaj xin kaw matzet yohtaj.
Hunteqꞌan anma tuꞌ tonhe chiyoche isteyeꞌleko anma yinh tzet yelapno ye tzotiꞌ.
Haꞌ ton yinh tuꞌ chiꞌichiko chichonkꞌulal,
yebꞌ howal,
yebꞌ bꞌuchwal,
hak tuꞌ xin chu yok kabꞌkꞌulal.
5 Matxatikꞌa chisbꞌej anma tuꞌ isteyelen isbꞌa,
kaw matxatikꞌa kꞌulo yul iswiꞌ,
matxa isyelal Istzotiꞌ Komam Dios ayko yinh.
Haꞌ huneꞌ nabꞌil yu anma,
haꞌ ton yiqꞌni niman melyu yinh kuybꞌanile chabꞌilxa ju.
Mach chahunbꞌa habꞌa yebꞌ hunteqꞌan anma tuꞌ.
6 Yajaꞌ yinh kaw yeli,
niman iskꞌulal chikochah yinh kuybꞌanil chabꞌilxa ju tuꞌ,
yaj xin ta chijaqꞌ tzalaho kokꞌul yinh tzet ay yul koqꞌabꞌ.
7 Wal xin,
matzet iqꞌbꞌil ju yet kopitzkꞌa yul sat yibꞌanhqꞌinal tiꞌ,
yebꞌ xin matzet chijipaxto jintaj yet chonhkamtoj.
8 Yuxin ta ay tzet chikolo yebꞌ xin ta ay xil koqꞌap,
jaqꞌaꞌ tzalaho kokꞌul.
9 Yuto haꞌ mak choche chiꞌok qꞌalomal,
chiꞌaykꞌay yul isqꞌabꞌ istxꞌojal,
kat yochento tzettaj ye tuꞌ machi nino iskꞌulal chiswatxꞌe yinh,
kat yochenpaxto ismachiswalilal.
Hak tuꞌ chu yetaxkanto isnabꞌal,
kat iskꞌaykantoj.
10 Yuto haꞌ jochento chꞌen melyu,
chonhyito kowatxꞌen sunil ismajanil istxꞌojal.
Ay ebꞌnaj juxhta tiꞌ yu yako yanma yinh chꞌen melyu yilo yanma yinh Komam,
istitkano niman isyaꞌtajil bꞌiskꞌulal yibꞌanh ebꞌnaj.
Kolinhbꞌawe kobꞌa yinh Komam Jesucristo
11 Wal hach tiꞌ wuxhta Timoteo,
yet Komam Dios hawehi.
Elanh tet hunteqꞌan istxꞌojal tuꞌ,
haꞌ iskꞌulal chasayiloj.
Qꞌan yip hawanma tet Komam Dios.
Tohol chawute habꞌelwi yinh Komam yinh sat anma.
Xahan chawil hawet anmahil,
ijle isyaꞌtajil chiꞌay tawibꞌanh.
Chewojabꞌ chawute habꞌa.
12 Ako yinh hakꞌul halahniko hawaniko hawanma yinh Komam Dios,
kaw yachyonhe chawuko yinh huneꞌ hasabꞌehal,
haꞌ ton haqꞌinal mach istanhbꞌal.
Yu huneꞌ tuꞌ,
yuxin awtebꞌil hach yu Komam Dios,
yebꞌ xin kaw kꞌul yu hataqꞌwen yinh sat txꞌiꞌal maka,
tato haꞌ Komam Jesús,
haꞌ Jahawil yehikoj.
13 Wal tinanh yinh sat Komam Dios,
chiꞌaqꞌni isqꞌinal sunil tzettaj ye tuꞌ,
yebꞌ xin yinh sat Komam Jesucristo,
Komam halni isyelal sata naj Poncio Pilato,
chiwaltojan hachejbꞌanil.
14 Yilal hayijen hunteqꞌan kuybꞌanile tiꞌ.
Machojabꞌ nino tzet chamanhkꞌo,
haxinwal machi bꞌaytet yinh chaxhkachlaxi masanto yet chihul Komam Jesucristo hunelxa.
15 Wal xin chihul huneꞌ tiempohal hakaꞌ chiyoche Komam Dios,
kat yijni isbꞌa hunteqꞌan tiꞌ,
yuto yul isqꞌabꞌ Komam Dios ay sunil.
Kaw saqꞌal yet Komam,
isreyal ebꞌnaj rey ye Komam,
yahawilpaxo ebꞌnaj yahawil ye Komam.
16 Hanhechꞌan Komam Dios machi bꞌaqꞌinhal chikami.
Ay Komam xol huneꞌ issajilqꞌinal bꞌay machi hunu mak chiyu ishitziko iskꞌatanh.
Maxhto hunu mak xaꞌilni yinh Komam,
machipaxo mak chu isqꞌoji yilni Komam.
¡Bꞌitnhelaxojabꞌ isbꞌi Komam yu ishelanil yebꞌ yu yip ay yinh sunilbꞌal tiempo!
¡Hakojabꞌ tuꞌ!
17 Ebꞌnaj juxhta ay isqꞌalomal yul sat yibꞌanhqꞌinal tiꞌ,
hal tet ebꞌnaj tato mach chisloloꞌnhe isbꞌa.
Machojabꞌ xin chako yanma ebꞌnaj yinh isqꞌalomal,
yuto huneꞌ qꞌalomal tuꞌ chitanhiloj.
Wal xin yaqꞌabꞌiko yanma ebꞌnaj yinh Komam Dios.
Komam chꞌaqꞌni sunil tzettaj ye tuꞌ jet yinh kaw niman yu iskꞌulalo jinh.
18 Hal tet ebꞌnaj tato kaw kꞌul chute iskꞌul.
Yaqꞌabꞌiko ebꞌnaj yinh iskꞌul iswatxꞌen iskꞌulal,
kolwahojabꞌ ebꞌnaj yinh anma matzet aya,
machojabꞌ chꞌoqꞌ ebꞌnaj yaqꞌni.
19 Ta chisbꞌeybꞌalnhe ebꞌnaj iskꞌulal,
ay isqꞌalomal ebꞌnaj lanhan iskutxbꞌan satkanh,
kat xin ischahni huneꞌ qꞌinale mach istanhbꞌal.
Islahobꞌal chejbꞌanile yalto yaꞌ Pablo tet yaꞌ Timoteo
20 Hach Timoteo,
kaw chawil habꞌa yinh tzet abꞌebꞌiliko yul haqꞌabꞌ.
Mach chawabꞌeto hunteqꞌan txꞌoj tzotiꞌ machi nino iskꞌulal chaqꞌa.
Mach chawabꞌepaxto hunteqꞌan helanile maxhtaj yekoj chal ebꞌnaj chonhkajni yu chijalikꞌo isyelal.
21 Ebꞌnaj ok tzujno yinta hunteqꞌan kuybꞌanile tuꞌ,
xaꞌishekꞌilo isbꞌa ebꞌnaj yinh isyelal.
Haꞌojabꞌ Komam Dios chiꞌaqꞌni aqꞌankꞌulal tawet.
¡Hakojabꞌ tuꞌ!