Kuybꞌanile yinh tzet chute isbꞌa yaꞌ Timoteo xol mak ayxako yul isqꞌabꞌ Komam Dios
5
Yet chaxhkachwa yinh ebꞌyaꞌ ichamtaxa,
mach howo chu hatzotel tet ebꞌyaꞌ,
wal xin haqꞌankꞌulal chaxhtzoteli,
hakaꞌ chiyu hatzotel tet hamam.
Haxapaxo tet ebꞌnaj tzehla winaj,
aqꞌankꞌulal chaxhtzoteli,
hakaꞌ hatzotel tet hunu kaw hawuxhtaj.
2 Hakpax tuꞌ tet ebꞌix janabꞌ ixnamtaj,
kꞌulchꞌanojabꞌ chiyu hatzotel tet ebꞌix,
hakaꞌ chawute hatzotel tet hamiꞌ.
Yebꞌpaxo tet ebꞌix qꞌopotaj,
kꞌulojabꞌ chiyu hatzotel tet ebꞌix hakojtam tet hunu hawanabꞌ chaxhtzoteli.
Machojabꞌ nino istxꞌojal nabꞌil hawu.
3 Kolwahanh yinh ebꞌix kamnaxa yichamil,
ebꞌix machi bꞌay chikawxi iskꞌul.
4 Ta ay ebꞌix hunix tuꞌ ay yunin,
maka yuninal yuninal,
haꞌ hunteqꞌan tuꞌ yet ay iskolwa yinh tzet chiꞌokniko yu ebꞌix.
Yuto ebꞌnaj uninale yilal isyijen ebꞌnaj iskolwahi,
yebꞌ ispajtzen tet ismam maka ismiꞌ,
yuto kaw kꞌul huneꞌ tuꞌ yul sat Komam Dios,
kaw chitzala Komam yinh.
5 Yaj wal hunu ix hunix kaw ischukilxanhe,
matxa mak yinh chikawxi iskꞌul,
kachannhe yinh Komam Dios chikawxi iskꞌul,
yebꞌ xin mach chisbꞌej ix istxahli tet Komam chꞌekꞌ tzꞌayik,
chꞌekꞌ aqꞌbꞌal,
chu iskolwa yuninal Komam Dios yinh ix.
6 Yaj tato ay hunu ix hunix chiꞌekꞌ yinh istxꞌojal tzet choche iskꞌul,
mach chu iskolwa yuninal Komam yinh ix,
yuto waxanhka itzitz isnimanil ix,
yaj wal yul sat Komam Dios kamom ix.
7 Halpaxo hunteqꞌan kuybꞌanile tiꞌ tet ebꞌnaj juxhtaj,
yebꞌ tet ebꞌix janabꞌ,
haxinwal machi hunu istxꞌojal chihal-laxiko yinh sat.
8 Ta ay hunu juxhtaj mach chikolwa yinh mak ayto yu isbꞌa yebꞌi,
yebꞌ ta hak tuꞌ chutepaxo yul yatut,
huneꞌ mak tuꞌ matxa chu yalni isbꞌa yuninalo Komam Dios,
yebꞌ ekꞌna machiswalil sata anma maxhto chichahni Istzotiꞌ Komam yul yanma.
9 Haꞌ ix hunix bꞌay wal iskolwa yuninal Komam Dios,
haꞌ ix tzꞌajanxa yinh 60 habꞌil yebꞌ xin ta mach issay ix hunuxa winaj yet aytokꞌo yichamil.
10 Yebꞌ tato ohtabꞌil iskꞌulal iswatxꞌe ix yet yalanhtokanoj,
ta kꞌul yu yaqꞌni chꞌibꞌo ix yunin,
yebꞌ tato yaqꞌ ix bꞌay chiway anma ekꞌ iskꞌatanh,
yebꞌ tato istxꞌah ix yoj yuninal Komam ekꞌ iskꞌatanh,
yebꞌ xin ta kolwa ix yinh anma yaꞌta yekoj,
yebꞌ xin ta iskꞌulalnhetikꞌa iswatxꞌe ix;
ta hak tuꞌ chu iskolwa yuninal Komam Dios yinh ix.
11 Wal ebꞌix hunix qꞌopoto mach chu hawaniko ebꞌix yinh istxolal isbꞌi ebꞌix hunix,
yuto ay ebꞌix haꞌ tzet choche iskꞌul haꞌ chiswatxꞌe,
chisbꞌejnikano ebꞌix huneꞌ munil yet Komam Jesucristo,
yuto haꞌ ismohyi ebꞌix haꞌ ayko yinh iskꞌul.
12 Hak tuꞌ chu iskankano ebꞌix txꞌojal kat ismanhkꞌonkanh huneꞌ munil chabꞌilxa yu tuꞌ.
13 Yebꞌ istiꞌlaxanhe nha chꞌekꞌ ebꞌix choche,
kat isqꞌayilo ebꞌix isahil.
Maxhnhetaj huneꞌ tuꞌ,
wal xin chiqꞌaypaxilo ebꞌix halo qꞌumal,
chanito isbꞌa ebꞌix xol tzettaj ye tuꞌ yebꞌ tzotiꞌ mach chiyok ebꞌix yinh.
14 Yuxinto chiwochehan tato chimohyi ebꞌix hunix qꞌopoto,
ayojabꞌ yunin ebꞌix kat yok ebꞌix yilno yatut;
haxinwal machi bꞌay chikawxi anma chonhkajni yinh Istzotiꞌ Komam Dios.
15 Chiwaltojan hunteqꞌan tiꞌ tawet yu ay ebꞌix hunix tiꞌ xameltzoto yintaj.
Haxa tzet chal naj matzwalil lanhan isyijen ebꞌix tinanh.
16 Tato ay hunu juxhtaj maka hunu ix janabꞌ ay hunu ix hunix yul yatut,
yilal iskolwa yinh ix.
Machojabꞌ chiꞌok ix yijatzo yuninal Komam,
haxinwal hanhe yinh ebꞌix yinh kaw yeli machi hunu mak bꞌay chikawxi iskꞌul,
haꞌ bꞌay chikolwa yuninal Komam.
17 Haꞌ ebꞌyaꞌ anciano kꞌul yijbꞌali yinh yuninal Komam Dios,
yilal niman yelapno ebꞌyaꞌ yul sat ebꞌnaj juxhtaj sunil.
Haktikꞌapax tuꞌ ebꞌyaꞌ chipujbꞌanikꞌo Istzotiꞌ Komam Dios,
yebꞌpaxo chikuywa yinh Istzotiꞌ Komam kaw ekꞌbꞌalojabꞌ niman yelapnoa ye ebꞌyaꞌ.
18 Yuto chal Istzotiꞌ Komam Dios hakaꞌ tiꞌ:
«Mach chubꞌ heyaqꞌaꞌko yet istiꞌ noꞌ wakax yet chixanhwi trigo noꞌ,»b
xhihayoj.
Chalnipaxoj:
«Haꞌ ebꞌnaj munlawom,
yilal ischahni ebꞌnaj istohol,»c
xhihayoj.
19 Mach tonhehojabꞌnhetikꞌa chawabꞌeto yinh tzet chal hunu mak chiꞌok aqꞌokꞌule tawet yinh hunu yaꞌ anciano,
wal xin yilal ay kawanh maka oxwanh testigo chihalni ta yeli.
20 Tato ay hunu juxhtaj maka hunu ix janabꞌ mach chisbꞌej yaniko ismul,
yilal hakachni yinh sat sunil yuninal Komam Dios,
haxinwal chixiw sunil yuninal Komam yaniko ismul.
21 Yinh sat Komam Dios yebꞌ xin yinh sat Komam Jesucristo yebꞌ xin yinh sat ebꞌnaj yángel Komam Dios,
chintaqꞌetojan hunteqꞌan chejbꞌanile tiꞌ tawet tato kaw yilal hayijeni.
Lahanojabꞌnhe chawute habꞌa yinh ebꞌnaj juxhta yebꞌ ebꞌix janabꞌ;
machojabꞌ chawato habꞌa yinh hunu maka.
22 Mach komono chawako ismunil hunu juxhta yul isqꞌabꞌ yinh anhe yalanhto maxhto chawil isbꞌeybꞌal,
haxataxka chꞌelikoj hach hunach chawato habꞌa yinh istxꞌojal huneꞌ mak tuꞌ.
Wal xin,
machojabꞌ chawato habꞌa xol tzet ye tuꞌ machiswalil.
23 Chiwaltojan tawet yu huneꞌ yaꞌkꞌul naunhe chiꞌok tawinh,
mach chiyu hawukꞌni ha haꞌ ischukil,
wal xin kꞌul ta chawukꞌpaxo nixhtejo teꞌ vino anhil.
24 Wal yinh isbꞌeybꞌal anma,
ay mak tiꞌ ixtanh jilni ismul yet yalanhto maxhto chiꞌil-laxi tzet chiꞌelikoj.
Ay mak xin hato yet chꞌil-laxi tzet chiꞌelikoj katto yixtanhwi ismul.
25 Hakpax tuꞌ ye anma chiꞌuten iskꞌulal,
ixtanh yil-laxi,
yaj ay mak tiꞌ mach ixtanho iskꞌulal lanhan iswatxꞌen tinanh,
masantikꞌa chiꞌixtanhwiloj kat xin isyenilo isbꞌa,
mach chikankano yinh ewantajil.