Kuybꞌanile yinh anma chibꞌejnikano Istzotiꞌ Komam Dios
4
Yaj habꞌan yalni Komam Espíritu Santo tato yet chihul islahobꞌal tiempo,
txꞌiꞌal anma chilo isbꞌa yinh Istzotiꞌ Komam Dios bꞌay yako yanma,
kat isto yinta hunteqꞌan espíritu leqꞌtiꞌwom chiꞌaqꞌni subꞌchaho anma,
yebꞌ yinh kuybꞌanile chitit yinh ebꞌnaj ischejabꞌ naj matzwalil.
2 Chabꞌento anma tzet chal ebꞌnaj leqꞌtiꞌwom chal isbꞌa kꞌulal.
Haꞌ hunteqꞌan ebꞌnaj tuꞌ kamnajilo isnabꞌal,
matxa chiyabꞌeto tzet chal yanma.
3 Hunteqꞌan ebꞌnaj tuꞌ chiskach ebꞌnaj ismohyi anma.
Aypaxo hunteqꞌan tzet chilolax tiꞌ chiskach ebꞌnaj islolaxi;
yajaꞌ xin haꞌ Komam Dios anhekano tzet chilolaxi.
Hanhonh ayonhxako yul isqꞌabꞌ Komam tiꞌ,
yu koloni yuxin aykano yu Komam.
Hayet chikoloni xin chijaqꞌ yuchꞌandiosal yinh tet Komam Dios,
yuto johtaxa isyelal.
4 Sunil tzet watxꞌebꞌil yu Komam Dios kaw kꞌul,
yuxin mach chu jalni ta ay hunu tzet tiꞌ machiswalil.
Sunil chu koloni,
kachannhe chijaqꞌ yuchꞌandiosal yinh tet Komam yet chikoloni.
5 Yuto haꞌ Istzotiꞌ Komam Dios chihalni ta sunil tzet iswatxꞌe Komam kaw kꞌulkanoj,
yebꞌpaxo kotxah chihalni kꞌulal sunil tzet chikolo.
Kuybꞌanile yinh ebꞌyaꞌ ischejabꞌ Komam Jesucristo kꞌul chute isbꞌa
6 Tato chakuykanto ebꞌnaj juxhtaj yebꞌ ebꞌix janabꞌ yinh hunteqꞌan tiꞌ,
kꞌulach ischejabꞌo Komam Jesucristo chal tuꞌ,
lanhan hachꞌibꞌ yinh kaw kꞌul yinh tzet chu janiko janma yinh Komam,
yebꞌ yinh kuybꞌanile kaw kꞌul chitikꞌa hayije.
7 Wal xin,
mach chachah hunteqꞌan yikꞌtiꞌal ebꞌnaj jichmam machi nino iskꞌulal chaqꞌ jet,
yuto sukal tzotiꞌnhe yehi.
Haꞌojabꞌ yet Komam Dios chaqꞌaytze habꞌa yinh.
8 Yinh kaw yeli yet chikoqꞌaytzen kobꞌa jaqꞌni labꞌanbꞌo konimanil yinh hunu sajach chikolwa jinh,
yajaꞌ ta chikoqꞌaytze kobꞌa yinh yet Komam Dios,
ekꞌbꞌalto kꞌul,
yuto chaqꞌ iskꞌulal jet yul sat yibꞌanhqꞌinal tiꞌ,
yebꞌ yet ayonhxa yul satkanh.
9 Haꞌ huneꞌ chiwaltiꞌan kaw yeli,
sunil anma yilal yanayto yul yanma.
10 Yuxin chꞌahilo kokꞌul jaqꞌni jip komunla yinh yet Komam Dios,
yuto haꞌ Komam itzitz ayko yipo janma.
Haꞌ Komam tuꞌ Iskolomal sunil anma,
yuxin haꞌ mak chichahni yul yanma,
chikolchahi.
11 Hunteqꞌan chiwaltiꞌan,
haꞌ chawaqꞌ iskuyuꞌ anma,
kat hawalni tet tato chisyije.
12 Machojabꞌ mak chalni tato matzet hawohtaj yuto tzeh hachto.
Wal xin toholojabꞌ chawute habꞌa haxinwal chayelo xol ebꞌnaj juxhtaj tato hak tuꞌ chiyutepaxo isbꞌa.
Kꞌulojabꞌ hatzoteli,
toholojabꞌ habꞌeybꞌal,
yebꞌpaxo xin xahan chawil hawet anmahil,
kꞌulojabꞌ hanabꞌal,
yebꞌ xin hayenilo yinh tzet chu janayto yul janma yinh Komam Dios,
kat hapohnilo habꞌa yinh istxꞌojal hakaꞌ yuninal Komam Dios.
13 Hayet maxhto chinapnihan,
ako yinh hakꞌul hawilni Istzotiꞌ Komam Dios yabꞌeꞌ ebꞌnaj juxhtaj yebꞌ ebꞌix janabꞌ.
Chawiptzenpaxo ebꞌnaj yinh Istzotiꞌ Komam,
kat hakuyni ebꞌnaj yinh.
14 Kaw mach chahinkꞌulnhe huneꞌ hahelanil aqꞌbꞌil tawet yu Komam Dios,
huneꞌ hal-laxilto yet yanayo isqꞌabꞌ ebꞌyaꞌ anciano tawibꞌanh.
15 Ako hawanma yinh sunil hunteqꞌan chiwaltiꞌan,
haxinwal sunil mak chiꞌilni tato hunun tzꞌayik hawiqꞌni hawip yinh yet Komam.
16 Chawil habꞌa yinh tzet chawu yebꞌ xin yinh tzet chiyu hakuywahi.
Lahiko habꞌelwi yinh hunteqꞌan tiꞌ.
Tato toholnhetikꞌa chawute habꞌa yinh chaxhkolcha yu,
kat iskolcha sunil mak chiꞌabꞌen tzet chawal tuꞌ.