Kuybꞌanile yinh isbꞌeybꞌal ebꞌyaꞌ chiꞌok ijbꞌalomal
3
Yinh kaw yeli,
ta ay hunu mak chiꞌok ijbꞌalomal xol yuninal Komam Dios,
huneꞌ munil tuꞌ kaw saqꞌalkanoj.
2 Yajaꞌ haꞌ mak chiꞌok ijbꞌalomal tuꞌ,
machojabꞌ nino istxꞌojal sata anma,
huneꞌnhehojabꞌ yixal.
Toholojabꞌ chiyute isnabꞌal yebꞌ isbꞌeybꞌal,
yilal yaqꞌni bꞌay chiway anma chiꞌekꞌ iskꞌatanh.
Helanojabꞌ iskuywahi,
yebꞌ xin ayojabꞌ yelapno yul sat anma.
3 Machojabꞌ ukꞌum teꞌoj,
machojabꞌ aqꞌom howal,
yebꞌ machojabꞌ ayko yanma yinh chꞌen melyu.
Wal xin kꞌulchꞌanojabꞌ iskꞌul yebꞌ xin chewla winaj chute isbꞌa.
4 Yohtajojabꞌ yaqꞌni kuybꞌanile yul yatut haxinwal yijem chiꞌeliko yuninal,
yebꞌ xin chixiw yuninal tet.
5 Yajaꞌ ta mach chu iskuyni yuninal yul yatut,
maxhtikꞌam chu yokpaxo ilwal yinh mak ayxako yul isqꞌabꞌ Komam.
6 Mak chꞌok ijbꞌalomal xol yuninal Komam Dios tuꞌ,
machojabꞌtaj hunu mak tolto chahnhe Komam Jesucristo yul yanma,
yuto ta hak tuꞌ subꞌuta isloloꞌnhen isbꞌa,
kat yaykꞌay yinh isyaꞌtajil hakaꞌ yu yaykꞌay naj matzwalil.
7 Wal xin,
kꞌulojabꞌ isbꞌeybꞌal mak ijbꞌalom tuꞌ sata anma maxhto chako isbꞌa yul isqꞌabꞌ Komam,
haxinwal machi mak chiꞌinilo ispixan,
yebꞌ mach chiꞌaykꞌay yul isqꞌabꞌ naj matzwalil.
Kuybꞌanile yinh tzet chu ismunla ebꞌyaꞌ diácono
8 Hakpax tuꞌ mak chiꞌok diáconohal,
isyelalojabꞌnhetikꞌa chiyala.
Machojabꞌ nananta tzet chilayala,
machojabꞌ chiꞌukꞌi.
Machojabꞌ ayoko yanma yinh yiqꞌni ismelyu yu leqꞌtiꞌal.
9 Yilal yaniko yanma yinh kuybꞌanile aqꞌbꞌilkano jet yu Komam Dios,
huneꞌ kuybꞌanile chabꞌilxayto yul janma,
yebꞌ xin sajojabꞌnhetikꞌa isnabꞌal.
10 Yinh bꞌabꞌel,
yilal yil-laxi ta mach ismul,
lahwi tuꞌ xin kat yaqꞌlax ismunil yinh diáconohal.
11 Hakpax tuꞌ xin ebꞌix janabꞌ chiꞌok yinh huneꞌ munil tiꞌ,
toholojabꞌ isbꞌeybꞌal ebꞌix yul sat anma.
Machojabꞌ hobꞌom tzotiꞌ ebꞌix.
Nanojabꞌnhetikꞌa yu ebꞌix yinh tzet chiswatxꞌe.
Yijemojabꞌ chiyute isbꞌa ebꞌix yinh sunil.
12 Ebꞌyaꞌ juxhta chiꞌok diáconohal,
huneꞌnhehojabꞌ yixal,
yohtajojabꞌ iskuywa yul yatut yebꞌ yinh sunil yuninal.
13 Yinh kaw yeli ebꞌyaꞌ diácono kꞌul chiyute isbꞌa yinh ismunil,
niman yelapno chiꞌelkaniko yul sat yuninal Komam,
yebꞌ xin chiqꞌ yip yanma istzotel yinh janayto yul yanma yinh Komam Jesucristo.
Yebꞌilxakano jet tzet ye kokuybꞌanil
14 Ayko yinh inkꞌulan intohan kaxhwilnojan yinh lembꞌil,
yajaꞌ xin chintzꞌibꞌnhetojan huneꞌ hum tiꞌ tawet,
15 yunhe ta chiꞌekꞌ tiempo wapnihan,
hawohtaxa tzet chawatxꞌe xol yuninal Komam Dios.
Hanhonh tiꞌ Yatut Komam Dios itzitz jehi,
yuto hanhonh kaw chijalikꞌo huneꞌ kuybꞌanile yet isyelal,
yebꞌ xin hanhonh chijako yip huneꞌ kuybꞌanile tiꞌ yinh sat anma.
16 Yinh kaw yeli chiwalkanojan,
kaw aykano yelapno ye huneꞌ kokuybꞌanil chiꞌaqꞌlax tiꞌ,
yuxin chiyal hakaꞌ tiꞌ:
«Yako isbꞌa Komam anmahil,
yet yulikꞌo koxol.
Haxa Komam Espíritu Santo yeniloj tato tohol isnabꞌal.
Ilbꞌil Komam yu ebꞌnaj ángel.
Hal-laxikꞌo Istzotiꞌ Komam xol anma nan konhobꞌal.
Ay anma yul sat yibꞌanhqꞌinal tiꞌ kaw yako yanma yinh Komam.
Chahlax Komam yinh iskꞌulchꞌanil yul satkanh,»
xhi.