Chejbꞌanile yibꞌanhilo bꞌaytet yinh yilal kotxahli
2
Wal tinanh,
haꞌ hunteqꞌan tiꞌ chintaqꞌetojan teyet,
tato cheqꞌan tet Komam Dios sunil tzet chilaokniko heyu.
Yilal hetxahli tet Komam,
kat heyaniko sunil tzet cheyoche yul isqꞌabꞌ Komam,
kat heyaqꞌni yuchꞌandiosal tet Komam yinh sunil anma ay yul sat yibꞌanhqꞌinal tiꞌ.
2 Yilal kotxahli tet Komam Dios yinh ebꞌnaj yahaw konhobꞌ yebꞌ hunteqꞌanxa ebꞌnaj ayko jahawil,
haxinwal mach isyaꞌtajil chihul koxol kat jekꞌ yinh aqꞌankꞌulal;
haxinwal chu janiko janma yinh Komam Dios kat jekꞌ yinh istoholal.
3 Hunteqꞌan kotxah tuꞌ kaw kꞌul,
yebꞌ kaw saqꞌal yul sat Komam Dios,
Kokolomal.
4 Chiyoche Komam Dios tato sunil anma chikolchahi,
kat yohtanhenilo isyelal.
5 Yuto huneꞌnhechꞌan Komam Dios aya,
yebꞌpaxo huneꞌnhechꞌan mak chitzotel jinh tet Komam,
haꞌ ton Komam Jesucristo,
Komam ok anmahil.
6 Yako isbꞌa Komam Jesucristo yul isqꞌabꞌ kamikal yunhe istohlan ismul sunil anma.
Huneꞌ tiꞌ isyelo isbꞌa yet yapni istiempohal.
7 Yuxinto aqꞌlax inmunilan wokan ischejabꞌo Komam Jesucristo yunhe inpujbꞌanikꞌojan huneꞌ tuꞌ,
kat inkuynikantojan anma mach Israeloj yinh isyelal,
yebꞌ yinh janiko janma yinh Komam.
Huneꞌ chiwaltiꞌan mach leqꞌtiꞌaloj,
to kaw yeli.
8 Yuxinto chiwochehan tato chitxahli ebꞌnaj juxhta ay yul hunun konhobꞌ.
Sajojabꞌ yanma ebꞌnaj yet chiyanikanh isqꞌabꞌ yet chitxahli.
Machojabꞌ chichiwa iskꞌul,
machojabꞌpaxo ishowal yinh hunuxa yet anmahil.
9 Wal ebꞌix janabꞌ,
yaqꞌabꞌiko ebꞌix xil isqꞌap hakaꞌ kaw yehi yinh istoholal,
machojabꞌ leqꞌtiꞌo chute isbꞌa yaniko xil isqꞌap.
Machojabꞌ nanxa islow chute isxinito xil iswiꞌ maka yaniko yelawil hakaꞌ chꞌen oro maka chꞌen perla,
maka xilqꞌape kaw aykanh istohol.
10 Machojabꞌ hako tuꞌ chute isbꞌa ebꞌix,
wal xin to haꞌ iskꞌulal haꞌ chissay ebꞌix iswatxꞌeꞌ,
yuto ayxako ebꞌix yul isqꞌabꞌ Komam Dios.
11 Tonhehojabꞌ tukan ebꞌix yabꞌen kuybꞌanile,
yijemojabꞌ xin chute isbꞌa ebꞌix.
12 Mach chisje inkꞌulan tato chikuywa ebꞌix ix xol ebꞌnaj winaj,
maka xin chipalkꞌonpaxo ebꞌix yibꞌanh ebꞌnaj.
Wal xin tonhehojabꞌ tukan ebꞌix yabꞌen yinh tzet chihal-laxi yet chꞌaqꞌlax kuybꞌanile.
13 Yuto bꞌabꞌel iswatxꞌe Komam Dios naj Adán,
tzujanxa iswatxꞌenpaxo Komam ix Eva.
14 Maxhtaj naj Adán subꞌcha yu naj matzwalil,
wal xin to haꞌ ix Eva,
yaykꞌay ix yinh manhkꞌomal tet Komam Dios.
15 Yajaꞌ ebꞌix tuꞌ,
chikolcha ebꞌix yet chilni ebꞌix yinh nixhte yunin,a
yebꞌ ta chako yanma ebꞌix yinh Komam,
yebꞌ ta chisxahannhe ebꞌix yet anmahil,
yebꞌ ta toholnhetikꞌa yehiko ebꞌix yinh isyelal Komam Dios,
yebꞌ ta chispohilo isbꞌa ebꞌix yinh istxꞌojal.