ISCARTA YAꞌ SAN PABLO YATO TET YAꞌ TITO
Yichebꞌanil iscarta yaꞌ Pablo
1
Hanin Pablo intiꞌan,
ismunlawom Komam Dios wehan,
yebꞌpaxo ischejabꞌ Komam Jesucristo yu winitijan anma sikꞌbꞌilxalo yu Komam Dios,
kat yaniko yanma yinh Komam Jesucristo,
yunhe yohtanhenilo isyelal kuybꞌanile chonhinito kowatxꞌen tzet choche Komam Dios.
2 Hakton tuꞌ inmunilan yunhe yaniko anma tuꞌ yinh iskꞌul ischahni qꞌinale mach istanhbꞌal haltebꞌilkano yu Komam Dios yettax maxhto chiwatxꞌikano sat yibꞌanhqꞌinal tiꞌ;
wal xin kaw mach chako Komam leqꞌtiꞌal.
3 Tinanh xin,
xaꞌayilo istiempohal bꞌay isyelo Komam Istzotiꞌ jet.
Haꞌ Komam Dios Kokolomal halnhe wetan ta yilal inyijenan walnikꞌojan Istzotiꞌ.
4 Chintzꞌibꞌnhetojan huneꞌ incartatiꞌan tawet wuxhta Tito.
Yinh kaw isyelal inkꞌaholan hawehi yinh Komam bꞌay ayxako janma,
yuto haninan walan Istzotiꞌ Komam hawabꞌeꞌ.
Yaqꞌabꞌ Komam Dios yebꞌ xin Kokolomal Jesucristo iskꞌulal yebꞌ iskꞌulchꞌanil iskꞌul tawet yebꞌpaxo xin aqꞌankꞌulal.
Ismunil yaꞌ Tito yul ismajul txꞌotxꞌ Creta
5 Kaxhwakanojan bꞌey txꞌotxꞌ Creta tuꞌ yunhe hawatxꞌen sunil hunteqꞌan ayto iswatxꞌi,
kat hasaynikano mak chiꞌok ancianohal xol ebꞌnaj juxhtaj yul hunun konhobꞌ bꞌey tuꞌ,
hakaꞌ wute walnikanojan tawet.
6 Haꞌ mak chiꞌok ancianohal tuꞌ,
kꞌulojabꞌ isbꞌeybꞌal haxinwal machi mak chalni hunu tzet ye tuꞌ yinh.
Huneꞌnhehojabꞌ yixal,
yebꞌ xin ayojabꞌiko yuninal yul isqꞌabꞌ Komam Dios,
machojabꞌ mak chalni yinh yuninal tuꞌ ta txꞌoj tzet chiswatxꞌe yebꞌ ta manhkꞌom.
7 Yuto ebꞌyaꞌ chiꞌok ijbꞌalomal yinh yuninal Komam Dios kꞌulojabꞌ isbꞌeybꞌal,
yuto yilomal ismunil Komam Dios yehi.
Machojabꞌ chiyikanh isbꞌa,
yebꞌ machojabꞌ ishowal iswiꞌ.
Machojabꞌ chukꞌpaxo teꞌ ukꞌe,
yebꞌ machojabꞌ istzan yinh yaqꞌlen howal,
yebꞌpaxo yiqꞌni ismelyu yinh tzet ye tuꞌ mach kꞌuloj.
8 Wal xin mak chiꞌok ancianohal,
yilal yaqꞌni bꞌay chiway makta chiꞌekꞌ iskꞌatanh.
Hanhehojabꞌ iskꞌulal choche iswatxꞌeꞌ,
toholojabꞌ isnabꞌal,
yebꞌ hanhehojabꞌ istoholal chiswatxꞌe.
Hanhkꞌanhehojabꞌ yinh yet Komam Dios chako isnabꞌal,
yebꞌ iskachni isnimanil yinh tzet ye tuꞌ mach kꞌuloj.
9 Yilalojabꞌ yaniko isnabꞌal yinh kuybꞌanile kaw yel chala,
huneꞌ aqꞌbꞌil iskuyuꞌ.
Hak tuꞌ xin chu yiptzen anma yu kuybꞌanile kaw yeli,
kat yay iskꞌul makta ayko ishowal yinh Istzotiꞌ Komam Dios yu.
10 Wal xin kaw ay ebꞌnaj mach chischah yabꞌeꞌ istoholal kuybꞌanile,
hanhe hunteqꞌan tzotiꞌ matzet chal yelapno chal ebꞌnaj,
kat yaqꞌni subꞌchaho ebꞌnaj anma,
haꞌ ton ebꞌnaj xin chalni ta yilal yaqꞌlax circuncidar makta ayxako yul isqꞌabꞌ Komam.
11 Yilal chikachlax ebꞌnaj tuꞌ,
yuto bꞌajxanhetuꞌwal chꞌekꞌ ebꞌnaj,
kat yaqꞌni somchahoto ebꞌnaj isnabꞌal anma yu kuybꞌanile maxhtaj yehi chal ebꞌnaj.
Chute ebꞌnaj hakaꞌ tuꞌ yunhe yiqꞌni ebꞌnaj ismelyu.
12 Ay huneꞌ naj ay bꞌey Creta tuꞌ,
ay isnabꞌal ayko xol yet konhobꞌ,
yal naj hakaꞌ tiꞌ:
«Haꞌ ebꞌnaj wet konhobꞌtiꞌan,
leqꞌtiꞌ ebꞌnaj,
lahan ebꞌnaj hakaꞌ hunu no noqꞌ kaw how.
Isah ebꞌnaj yebꞌpaxo xin kaw peqꞌ iswaꞌi,»
xhi naj.
13 Yel chal naj yuxin yilal hakachni ebꞌnaj tuꞌ sikꞌlebꞌil,
haxinwal chiyako ebꞌnaj yinh yanma huneꞌ kuybꞌanile yel chala,
14 yebꞌ yunhe mach chishajbꞌa istxikin ebꞌnaj yinh hunteqꞌan ikꞌtiꞌ chisnakanh ebꞌnaj ah Israel,
yebꞌ xin yunhe mach chisyijeto ebꞌnaj tzet chal anma kaw machi yelapno ye sunil isyelal yul sat.
15 Wal hanhonh sajxa ye konabꞌal tiꞌ,
sunil tzet ye tuꞌ kꞌul yul kosat.
Walpaxo mak maxhto chiyako yanma yinh Komam Dios maxhto sajo ye isnabꞌal,
kaw mach kꞌulo sunil tzet ye tuꞌ yul sat,
yuto machiswalil tzet chiꞌekꞌ yinh isnabꞌal yebꞌ yinh yanma.
16 Chal ebꞌnaj tato yohta ebꞌnaj Komam Dios,
yajaꞌ tzet chiswatxꞌe ebꞌnaj chiyeniloj tato mach yohtajo ebꞌnaj Komam.
Tonhetikꞌa chichiwa iskꞌul ebꞌnaj yinh anma,
mach chisyijepaxo ebꞌnaj tzet chal Komam.
Machi hunu tzet ye tuꞌ kꞌul chiswatxꞌe ebꞌnaj.