Kuybꞌanile yel chala
2
Wal hach hach tiꞌ,
haꞌ bꞌaytet lahan yalni yebꞌ kuybꞌanile kaw tohol,
haꞌ chawaqꞌ iskuyuꞌ anma.
2 Chawal tet ebꞌyaꞌ juxhtaj ichamejxa,
helanojabꞌ chute isnabꞌal.
Ayojabꞌ yelapno ebꞌyaꞌ yul sat anma,
machojabꞌ chato isbꞌa xol istxꞌojal.
Kaw toholojabꞌ yeko yanma ebꞌyaꞌ yinh kuybꞌanile kaw yeli,
yebꞌ xin xahanojabꞌ chil yet anmahil.
Yaqꞌabꞌ yip yanma ebꞌyaꞌ istecha ilwebꞌal yu.
3 Haktikꞌapax tuꞌ ebꞌyaꞌ janabꞌ ixnamejxa,
kꞌulojabꞌ chute isbꞌa yinh tzet chiswatxꞌe hakaꞌ chiyoche Komam Dios.
Machojabꞌ halom qꞌumalo ebꞌyaꞌ,
machojabꞌ chiꞌukꞌwipaxo teꞌ.
Kꞌulojabꞌ isbꞌeybꞌal ebꞌyaꞌ chisye tet anma.
4 Isyebꞌabꞌilo ebꞌix janabꞌ ixnamtaxa tuꞌ tet ebꞌix qꞌopotaj yinh tzet chute isxahannhen yichamil yebꞌ isyaꞌilnhen yunin.
5 Yebꞌ ta kꞌulojabꞌ tzet chiꞌekꞌ yinh isnabꞌal,
yebꞌ ta tohol chute isbꞌa,
kat xin isyaꞌilnhen ebꞌix yatut.
Kꞌulchꞌanojabꞌ chute iskꞌul ebꞌix yinh yet anmahil.
Yijemojabꞌ chute isbꞌa ebꞌix tet yichamil,
hak tuꞌ xin machi mak txꞌoj istzotel yinh Istzotiꞌ Komam Dios.
6 Iptze ebꞌnaj juxhta tzehtaj haxinwal toholnhetikꞌa isnabꞌal ebꞌnaj.
7 Kꞌulojabꞌ sunil tzet chawatxꞌe sata ebꞌnaj yu yilnito ebꞌnaj habꞌeybꞌal,
kuywahanh yinh sunil istoholal hawanma,
yebꞌpaxo yinh aqꞌankꞌulal.
8 Haꞌ tzotiꞌ kꞌul haꞌ chawala,
haxinwal mach hunu mak chu yalni tato machiswalil kuybꞌanile chawal tuꞌ.
Hak tuꞌ xin chitxꞌixwikanh ebꞌnaj ayko ishowal yinh kuybꞌanile tuꞌ,
yuto machi hunu tzet tzꞌaj yalaꞌ ebꞌnaj tawinh.
9 Halpaxo tet ebꞌnaj munlawom,
yijemojabꞌ chute isbꞌa ebꞌnaj tet ispatrón,
kꞌulchꞌanojabꞌ chute iskꞌul ebꞌnaj.
Machojabꞌ chistaqꞌwe ebꞌnaj istiꞌ ispatrón.
10 Machojabꞌ chꞌelqꞌan ebꞌnaj yinh ispatrón.
Toholojabꞌ chiyute isbꞌa ebꞌnaj,
hak tuꞌ chu isyenilo ebꞌnaj tet anma tato kaw kꞌul kuybꞌanile yet Komam Dios Kokolomal.
11 Yuto Komam Dios xaꞌisyelo iskꞌulchꞌanil iskꞌul jet,
haꞌ ton yinh xin ay iskolbꞌanil sunil anma ay yul sat yibꞌanhqꞌinal tiꞌ.
12 Haꞌ iskꞌulchꞌanil Komam Dios tuꞌ,
aqꞌni konabꞌaloj tato kaw yilal kobꞌejnikano sunil tzet machiswalil,
yebꞌ sunil tzet mach kꞌulo chijocheko yul sat yibꞌanhqꞌinal tiꞌ.
Haxa yinh istoholal konabꞌal chonhekꞌi,
yebꞌ kowatxꞌen istoholal,
yebꞌ yaniko janma yinh Komam Dios.
13 Jechmawe huneꞌ tzet kaw nanxa yok iskꞌulal ayko yipo kokꞌul,
huneꞌ tzꞌayik kaw kꞌulchꞌan bꞌay chisyekanh isbꞌa Kokolomal,
haꞌ ton Komam Jesucristo,
koDiosal kaw helan.
14 Haꞌ Komam tuꞌ yaqꞌkamo isbꞌa koseleloj konhiskolnilo yinh istxꞌojal yul sat yibꞌanhqꞌinal tiꞌ.
Konhissajnhe Komam yinh komul yunhe jok iskonhobꞌoj,
yunhe haxanhe iskꞌulal chijoche kowatxꞌeꞌ.a
15 Haꞌ huneꞌ tiꞌ,
yilal hawaqꞌni iskuyuꞌ makta ayxako yul isqꞌabꞌ Komam,
chawaniko yip yanma.
Tato ay ebꞌnaj machiswalil chute isbꞌa,
sunil hawanma chakachni.
Haꞌojabꞌ iskꞌulal chawatxꞌe haxinwal machi mak chalni ta machi hawelapnoj.