Haninan yebꞌ juxhta Timoteo chikotzꞌibꞌnhetojanh huneꞌ carta tiꞌ tawet wuxhta Filemón;

xahan ayach juhanh,

jetbꞌipaxo kobꞌa yinh ismunil Komam Dios.

2 Chikotzꞌibꞌnhepaxtojanh tet ix janabꞌ Apia,

yebꞌpaxo tet yaꞌ juxhta Arquipo,

yaꞌ kaw kolwa jinhanh yinh ismunil Komam Dios,

yebꞌ tet sunil mak ayxako yul isqꞌabꞌ Komam Dios chiskutxbꞌa isbꞌa bꞌey hawatut.

3 Haꞌojabꞌ Komam Dios Mame,

yebꞌ Komam Jesucristo Jahawil chiꞌaqꞌni iskꞌulchꞌanil iskꞌul,

yebꞌ aqꞌankꞌulal teyet.

4 Yet chintxahlihan tet Komam Dios hunta el,

chaxhinnatijan,

chiwaqꞌnihan yuchꞌandiosal tawinh tet Komam.

5 Yuto xawabꞌehan tato kaw xahan chawil makta yetxa Komam yehi,

yebꞌ ta kaw ayko hawanma yinh Komam Jesús,

Jahawil.

6 Kaw chinqꞌanan tet Komam Dios ta haꞌ anma xayako isbꞌa yul isqꞌabꞌ Komam Jesucristo,

yu chila ta ayko hawanma yinh Komam Dios,

kaw chistxumiloj tato hanhkꞌanhe Komam Jesucristo chiꞌaqꞌni iskꞌulal jet.

7 Wuxhtaj,

kaw chintzalahan yebꞌ xin kaw chiyiqꞌ yip wanmahan yu iskꞌulchꞌanil hakꞌul,

yuto hawu yuxin xaꞌischah makta yetxa Komam Dios yaqꞌlobꞌal yanma.

8 Hanintiꞌan ischejabꞌ Komam Jesucristo wehan,

yuxin chu walnihan tawet bꞌaytet kaw yilal hawatxꞌeni.

9 Yajaꞌ hakaꞌ chu yay kosat koqꞌanni hunu tzet ye tuꞌ,

hak tuꞌ chu walnitojan tawet,

yuto kaw xahan ayach wuhan.

Hanin Pablo intiꞌan icham inxahan,

kaw xin ayinikojan preso yu chiwalikꞌojan Istzotiꞌ Komam Jesucristo.

10 Kaw chinokan inqꞌanaꞌan tawet yinh naj Onésimo,

naj tiꞌ hakaꞌtanhe inkꞌaholan ye naj,

yuto ischah naj Komam Jesucristo yul yanma yet ayinikojan preso tiꞌ.

11 Naj Onésimo tiꞌ,^a

hakaꞌ hunu chejabꞌ kaw matzet chiꞌoknikoj,

hak tuꞌ ye naj hawu yet yalanhtokanoj,

yajaꞌ wal tinanh xin kaw chiꞌoknoko naj hawu,

hakaꞌ yu yokniko naj wuhan bꞌey tiꞌ.

12 Wal tinanh chiwatojan naj takꞌatanh hunelxa,

kꞌul chu hachahni naj,

hakaꞌojtam haninan chinhachahan.

13 Wochebꞌalan chikankano naj inkꞌatanhan yu inchejnihan naj,

haꞌojtam xin hach chaxhinchejan selelo naj yulbꞌal ayiniktijan yul preso tiꞌ yu Tzotiꞌ Kꞌul yet Kolbꞌanile.

14 Yajaꞌ mach chisje inkꞌulan inwatxꞌehan hunu tzet ye tuꞌ yalanhto maxhto chiwabꞌehan tzet chawute hawalni,

haxinwal huneꞌ chinqꞌanan tawet tiꞌ machojabꞌ lanhbꞌiloj,

wal xin yinhojabꞌ hawanma chitita.

15 Naj Onésimo tiꞌ,

el naj hanikꞌ tiempohal takꞌatanh,

yajaꞌ yunhe ismeltzo naj takꞌatanh yinh hunelnhe,

16 yajaꞌ matxa hakaꞌo hunu chejabꞌ,

wal xin kaw nimanojabꞌxa yelapno naj yul hasat,

hakaꞌ hunu juxhta kaw ochebꞌil ju.

Wal hinan kaw xahan ay naj wuhan bꞌey tiꞌ,

wal hachpaxo xin,

ekꞌnahojabꞌ xahan chawil naj.

Machnhehojabꞌtaj yu jet anmahil naj yuxin xahan chawil naj,

wal xin to yu juxhtaxa naj yinh Komam Jesucristo.

17 Yuxin ta kaw juxhtaxa kobꞌa yinh Komam chawabꞌe,

chah naj hakojtam haninan chinapnihan takꞌatanh.

18 Tato ay hunu istxꞌojal iswatxꞌe naj tawinh,

maka ta ay iskꞌas naj tawet,

teye wetan.

19 Hanin Pablo intiꞌan hankawinan chintzꞌibꞌnhetojan,

tato ay iskꞌas naj tawet haninan chintohlahan,

waxanhka xin chinnatijan tawet tato aypaxo hakꞌas wetan,

yuto haninan walan Istzotiꞌ Komam Jesucristo tawet yet hachahni Komam yul hawanma.

20 Hach wuxhtaj yije tzet chinqꞌanan tawet tiꞌ,

yuto yuninalxa Komam Dios hawehi.

Aqꞌ yaqꞌlobꞌal wanmahan,

yuto juxhtaxa kobꞌa yinh Komam Jesucristo.

21 Chintzꞌibꞌnhetojan hunteqꞌan tiꞌ tawet yuto wohtajan tato kaw yijem hach,

kaw wohtapaxojan tato ekꞌbꞌalto tzet chayije yibꞌanh tzet chiwaltotiꞌan.

22 Chiwalnipaxtojan tawet,

chasay nino bꞌay chinehan yet chinapnihan texol.

Kaw xin chiwakojan yipo wanmahan ta yu chextxahli winhan tet Komam Dios,

chiꞌel yinh iskꞌul Komam intohan kexwilnojan.

23 Chalto juxhta Epafras ta chawil habꞌa bꞌey tuꞌ,

ayko yaꞌ preso wintajan bꞌey tiꞌ yu yalnipaxikꞌo Istzotiꞌ Komam Jesucristo.

24 Chalpaxto juxhta Marcos,

juxhta Aristarco,

juxhta Demas yebꞌ juxhta Lucas ta cheyil hebꞌa bꞌey tuꞌ;

ebꞌyaꞌ tiꞌ wet munlawomalan yinh ismunil Komam Dios.

25 Haꞌojabꞌ Komam Jesucristo Jahawil chiꞌanayo iskꞌulchꞌanil iskꞌul teyibꞌanh bꞌey tuꞌ.