Haꞌ bꞌaytet yilal iswatxꞌen yuninal Komam Dios
3
Chanati tet ebꞌnaj juxhtaj,
isyijeꞌabꞌ ebꞌnaj yinh tzet chal naj jahaw,
yebꞌpaxo tet ebꞌnaj yahawil konhobꞌ.
Yijemojabꞌ chute isbꞌa ebꞌnaj,
hinanojabꞌ ebꞌnaj iswatxꞌen tzet ye tuꞌ kꞌul.
2 Yebꞌ xin machojabꞌ txꞌojo istzotel ebꞌnaj yinh hunu maka,
machojabꞌ aqꞌom howal ebꞌnaj,
kꞌulchꞌanojabꞌ chiyute iskꞌul ebꞌnaj,
chewchotanhehojabꞌ chute yanma ebꞌnaj yinh yet anmahil.
3 Yuto hayet yalanhtokanoj haꞌ hunonh ayonhiko yinh issukal,
manhkꞌomonh yinh tzet chal Komam Dios,
yebꞌ kꞌaynajonhtoj,
ayonhiko yalanh yekꞌnajil janma yebꞌpaxo tzet choche konimanil.
Hanhetikꞌa istxꞌojal kowatxꞌe yebꞌ ischiwa kokꞌul jinh hununonh.
Konhyahlaxi,
koyahnipaxo jet anmahil.
4 Haxa yet isyeni Komam Dios Kokolomal iskꞌulchꞌanil iskꞌul,
yebꞌ hanta isxahanil ay sunil anma yu,
5 hak tuꞌ yu konhiskolni Komam.
Maxhtaj yu iskꞌulal kowatxꞌe yuxin konhiskol Komam,
machoj,
to yu tzꞌay iskꞌul Komam jinh.a
Konhistxꞌah Komam yinh komachiswalilal,
haꞌ chaliloj tato konhitzitzbꞌikanh yinh iskayelal yet yaqꞌni Komam Espíritu Santo akꞌ qꞌinale jet.
6 Yu Kokolomal Jesucristo xin,
yaqꞌ Komam Dios Komam Espíritu Santo jet yinh isyaxilal.
7 Kꞌulonhxa yul sat Komam,
yaj yu iskꞌulchꞌanil iskꞌul,
yuxin yaqꞌ Komam koqꞌinal aynhetikꞌa yinh hunelnhe,
huneꞌ ayko yipo janma.
8 Hunteqꞌan kuybꞌanile tiꞌ kaw yeli,
yuxin chiwochehan tato maxhtikꞌa chabꞌej hawalni,
haxinwal haꞌ mak chiyako yanma yinh Komam Dios,
chiyako yinh iskꞌul iswatxꞌen tzet kaw kꞌul.
Hunteqꞌan kuybꞌanile tiꞌ kaw kꞌul,
kaw chikolwa jinh kosunil.
9 Yajaꞌ mach chawako habꞌa xol ebꞌnaj chilaisteyele isbꞌa yinh sukal tzotiꞌ,
yebꞌ ebꞌnaj chiꞌichenti istzotiꞌal tzet yelapno ye ebꞌnaj ichmame.
Mach chawapaxiko habꞌa xol ebꞌnaj komon chilayaqꞌle howal,
yebꞌ chilaisteyele isbꞌa yinh isley yaꞌ Moisés.
Matzet chal yelapno hunteqꞌan tuꞌ,
matzet chiqꞌ ebꞌnaj yinh.
10 Ta ay mak chal pohnoto yuninal Komam Dios yu kuybꞌanile mach yeloj,
chaxhkachwa yinh hunel maka kayel,
yaj ta mach chabꞌe tzet chawala,
chawilo texol.
11 Haꞌ mak chiwatxꞌen hakaꞌ tuꞌ,
hawohtaj tato xayetato isbꞌa,
haꞌtikꞌa ismul chiswatxꞌe tuꞌ,
haꞌ chiꞌaniko yinh isyaꞌtajil.
Ischejbꞌanil yaꞌ Tito yato yaꞌ Pablo
12 Hayet chinchejnitojan juxhta Artemas maka yuxhta Tíquico takꞌatanh,
chawako yinh hakꞌul hato bꞌey konhobꞌ Nicópolis kinhawilaꞌan,
yuto chiwochehan ta haꞌ bꞌey tuꞌ ayinan yet chiꞌekꞌ nhabꞌil.
13 Hantatikꞌa chu hawu chaxhkolwa yinh juxhta licenciado Zenas yebꞌ juxhta Apolos islahni isbꞌel,
yunhe mach chitanhayo tzet chiꞌokniko yu ebꞌyaꞌ.
14 Hak tuꞌ xin chiqꞌayilo ebꞌnaj juxhta tuꞌ iswatxꞌen iskꞌulal,
haxinwal yet ay tzet chꞌoknikoj yohtaxa ebꞌnaj iskolwahi,
hak tuꞌ xin ay ismunil ebꞌnaj yul sat Komam Dios.
Yet yalnito yaꞌ Pablo ta chil isbꞌa ebꞌnaj juxhtaj
15 Sunil ebꞌnaj juxhta aykꞌo inkꞌatanhan bꞌey tiꞌ,
chalto ebꞌnaj ta cheyil hebꞌa yinh hekawil.
Chawal tet sunil ebꞌnaj ayxako yul isqꞌabꞌ Komam xahan chonhilnihanh bꞌey tuꞌ ta chil isbꞌa ebꞌnaj.
Yaqꞌabꞌayo Komam Dios iskꞌulchꞌanil iskꞌul teyibꞌanh bꞌey tuꞌ.
¡Hakojabꞌ tuꞌ!