CARTA ALAXTO TET ANMA HEBREO AYXAKO YUL ISQꞌABꞌ KOMAM DIOS
Tzotel Komam Dios tet anma yu Iskꞌahol
1
Yet yalanhtokanoj txꞌiꞌal el yebꞌ nanantanhe yu istzotel Komam Dios tet ebꞌyaꞌ jichmam yu ebꞌyaꞌ ischejabꞌ Komam.
2 Yajaꞌ wal yinh islahobꞌal tiempo tiꞌ tzotel Komam Dios jet yu Iskꞌahol,
haꞌ xin yul isqꞌabꞌ Iskꞌahol tuꞌ yakaniko sunil tzettaj ye tuꞌ;
yuto yu Iskꞌahol yuxin iswatxꞌe Komam sunil tzet ay yul sat yibꞌanhqꞌinal tiꞌ.
3 Haꞌ Iskꞌahol Komam tuꞌ chiyenilo isqꞌaqꞌal yip Komam Dios yebꞌ yechel Komam yehi.
Haꞌ xin yip Istzotiꞌ Iskꞌahol tuꞌ iqꞌnhe sunil tzettaj ay yul sat yibꞌanhqꞌinal tiꞌ.
Lahwi konhissajnhenkano Komam Kꞌahole yinh komul,
yok tzꞌonhno yinh iswatxꞌqꞌabꞌ Komam Dios yul satkanh.
Kaw ekꞌbꞌal yelapno Iskꞌahol Komam Dios yibꞌanh ebꞌnaj ángel
4 Iskꞌahol Komam Dios,
kaw ekꞌbꞌal yelapno ye yibꞌanh ebꞌnaj ángel;
yuto haꞌ ismunil Komam ekꞌbꞌal yelapno ye yibꞌanh ismunil ebꞌnaj.
5 Wal xin machi hunu ebꞌnaj ángel bꞌay yal Komam Dios hakaꞌ yu yalni tet Komam Cristo:
«Hach tiꞌ,
hach Inkꞌaholan,
chiwaqꞌkanojan hakawil yinh huneꞌ tzꞌayik tiꞌ,»a
xhi Komam.
Maxhtaj yinh hunu ebꞌnaj ángel bꞌay yalpaxo Komam hakaꞌ tiꞌ:
«Haninan Ismam naj.
Inkꞌaholan ye naj,»
xhi.
6 Chalnipaxo yinh yet yaniti Komam Dios hunpilan Iskꞌahol yul sat yibꞌanhqꞌinal tiꞌ:
«Yiqꞌabꞌayo isbꞌa sunil ebꞌnaj yángel Komam Dios tet naj,»b
xhihayoj.
7 Walpaxo yinh ebꞌnaj ángel chal hakaꞌ tiꞌ:
«Chuteko Komam Dios ebꞌnaj ángel hakaꞌ jaqꞌeqꞌ kat yutenpaxiko Komam ischejabꞌ hakaꞌ xaj qꞌa qꞌaꞌ,»c
xhi.
8 Walpaxo yinh Iskꞌahol Komam tuꞌ chala:
«Hach Dios,
yahaw hach yinh sunilbꞌal tiempo.
Haꞌ istoholal xin chawatxꞌe yet ayachiko Yahawiloj.
9 Kaw chaxhtzala yinh iskꞌulal,
wal istxꞌojal xin chayaha.
Yuxin sikꞌbꞌil hachilo yu Komam Dios haDiosal.
Kaw ekꞌbꞌal tzalahilal yaqꞌ tawet sata ebꞌnaj hawetbꞌi,»d
xhi.
10 Chalnipaxoj:
«Hach tiꞌ Mam Wahawil yet yichebꞌanil hawatxꞌe txꞌo txꞌotxꞌ,
hawatxꞌenpaxo satkanh.
11 Sunil tzet watxꞌebꞌil hawu tuꞌ chitanhkaniloj.
Wal hach tiꞌ xin ayachnhetikꞌa yinh sunilbꞌal tiempo.
Sunil tzet watxꞌebꞌil tuꞌ chiꞌichambꞌiloj hakaꞌ chu isxilbꞌilo hunu xilqꞌape.
12 Chapajtzoyo hakaꞌ chu ispajtzolaxayo hunu qꞌap qꞌap,
kat hahelni hakaꞌ chu ishelni hunu mak xil isqꞌap,
yajaꞌ wal hach xin huneꞌnhetikꞌa haꞌ hach yinh sunilbꞌal tiempo,
machi bꞌaqꞌinhal chaxhtanhiloj,»e
xhihayoj.
13 Machi hunu ebꞌnaj ángel bꞌay yal Komam Dios hakaꞌ yu yalni tet Iskꞌahol:
«Ayanh tzꞌonhno yinh inwatxꞌqꞌabꞌan masanta chiwaqꞌaꞌkojan makta ayko ishowal tawinh yalanh hawoj,»f
xhi Komam.
14 Sunil ebꞌnaj ángel espíritu ebꞌnaj,
ayko ebꞌnaj ischejabꞌo Komam Dios yu iskolwa yinh makta chischah iskolbꞌanil.