2 Hex wuxhtaj,

hex wanabꞌ,

hayet chihul tzijxanhe ilwebꞌal teyibꞌanh,

kaw aqꞌwe tzalaho hekꞌul sikꞌlebꞌil.

3 Heyohtaj ta hayet chul ilwebꞌal teyibꞌanh yu yil-laxi ta ayko Komam Dios yipo heyanma,

hak tuꞌ chu hekuyni istecha ilwebꞌal heyu.

4 Yilal helahniko heyaqꞌni heyanma istecha heyu,

hak tuꞌ chu hechꞌibꞌ yinh yet Komam Dios,

yebꞌ xin tzꞌajan chexelkaniko yinh iskꞌulal Komam,

hak tuꞌ xin matxa nichꞌano tzet mach tzꞌajanoj hex yinh yet Komam.

5 Tato ay hunujex maxhto tzꞌajano hehelanil,

qꞌanwe tet Komam Dios,

kat yaqꞌni Komam teyet,

yuto mach chismale Komam yaqꞌni tet makta chiqꞌanni.

Chaqꞌ Komam tet,

yaj mach chaliko Komam yinh sat mak bꞌay chaqꞌ Komam huneꞌ tuꞌ.

6 Hayet chikoqꞌanni kohelanil tet Komam,

koqꞌanawe yinh sunil janma.

Machojabꞌ chikabꞌkon janma,

yuto haꞌ mak chikabꞌkon yanma,

lahan hakaꞌ haꞌ mar chꞌekꞌ jobꞌla yu jaqꞌeqꞌ;

nanantaxanhe bꞌay chitokanikoj.

7 Haꞌ mak hak tuꞌ yekoj,

tajka chꞌekꞌ yinh isnabꞌal ta ay tzet chischah tet Komam Dios Jahawil.

8 Yuto nan chꞌekꞌ yinh isnabꞌal tinanh,

nanxapaxo chꞌekꞌ yinh isnabꞌal hekal,

hak tuꞌ xin mach tꞌinhano yeko yinh isbꞌeybꞌal.

9 Tato ay hunu juxhtaj maka hunu janabꞌ yaꞌta yehi,

yilal yaqꞌni tzalaho yanma yinh Komam,

yuto ay yelapno ye yul sat Komam Dios.

10 Hakpax tuꞌ ebꞌnaj juxhta yebꞌ ebꞌix janabꞌ qꞌalom,

tzalahojabꞌi yet chiꞌilaxayo yu Komam Dios,

yuto haꞌ mak qꞌalom lahan hakaꞌ isxumakil teꞌ telaj machi nahatli.

11 Yuto hayet chiꞌahilo tzꞌayik kat ispohkanh yip qꞌaꞌ,

chitajilo teꞌ telaj,

kat yay hona isxumakil teꞌ,

hak tuꞌ xin matxa kꞌulchꞌano jilni teꞌ.

Hakaꞌ ishowayo isxumakil teꞌ telaj tuꞌ,

hak tuꞌ iskꞌayayo ebꞌnaj qꞌalom yet chiskutxbꞌan ebꞌnaj isqꞌalomal yul sat yibꞌanhqꞌinal tiꞌ.

12 Saqꞌal yet mak chitecha ilwebꞌal yu,

yuto hayet chilahwi istecha ilwebꞌal yu huneꞌ mak tuꞌ,

chaqꞌ Komam huneꞌ ispaj selel tet,

haꞌ ton huneꞌ isqꞌinal mach istanhbꞌal,

haꞌ ton huneꞌ corona haltebꞌil yu Komam tet mak chitzala yinh Komam.

13 Hayet chonhmontelax kowatxꞌen hunu istxꞌojal,

machojabꞌ chijala ta haꞌ Komam Dios chonhmonten kowatxꞌen huneꞌ tuꞌ,

yuto Komam mach chu konhismonten kowatxꞌen hunu istxꞌojal,

machipaxo tzet chimonten Komam yu yaniko ismul.

14 Wal xin,

haꞌ istxꞌojal ayko jinh haꞌ chonhmonteni,

kat konhyinito yinh istxꞌojal.

15 Ta chijako janma yinh istxꞌojal aytikꞌako jinh,

yinh chipitzkꞌati komul.

Haxa yet chichꞌibꞌ huneꞌ istxꞌojal yul janma tuꞌ,

kat yul huneꞌ kamikal jinh.

16 Wuxhtaj wanabꞌ,

hex kaw xahan ay wuhan,

mach cheyaqꞌ subꞌchaho hebꞌa.

17 Sunil tzet kꞌul yebꞌ sunil tzet tzꞌajan yehi tet Komam Dios chikochah.

Haꞌ Komam watxꞌenhe sunil tzet chimujli yul satkanh.

Haꞌ hunteqꞌan tuꞌ xin chishel isbꞌa,

wal Komam Dios,

huneꞌnhetikꞌa haꞌ Komam.

18 Yuto el yinh iskꞌul Komam yaqꞌni koqꞌinal mach istanhbꞌal yu Istzotiꞌ kaw yeli,

huneꞌ yaqꞌ jet yet kochahni yul janma.

Yu huneꞌ tuꞌ xin,

hanhonh kaw bꞌabꞌelonh sata sunil tzet watxꞌebꞌil yu Komam Dios.

19 Wuxhtaj wanabꞌ,

hex xahan ay wuhan,

hajbꞌawe hetxikin cheyabꞌeni,

yajaꞌ machojabꞌ komono cheyal hunu tzet ye tuꞌ yinh anhe,

mach komono chitit hehowal.

20 Yuto yet chitit kohowal,

maxhtaj istoholal tzet choche Komam chikowatxꞌe.

21 Yuxin bꞌejwekano sunil istxꞌojal yebꞌ sunil ismachiswalilal kaw chipoh yul yibꞌanhqꞌinal tiꞌ.

Kꞌulchꞌanojabꞌ chu hechahni Istzotiꞌ Komam Dios chal-lax teyet,

huneꞌ tzꞌunbꞌilxa yul heyanma yu Komam,

yuto haꞌ chexkolni tet sunil istxꞌojal.

22 Machojabꞌ tonhe cheyabꞌe Istzotiꞌ Komam,

wal xin yilal heyijeni.

Yaj tato tonhe cheyabꞌe tzet chala,

mach cheyijepaxoj,

hexkawex cheyaqꞌ subꞌchaho hebꞌa.

23 Haꞌ mak chiꞌabꞌen Istzotiꞌ Komam Dios,

mach chiswatxꞌepaxo tzet chala,

lahan hakaꞌ hunu mak chiyil sat yul chꞌen espejo,

24 yajaꞌ lahwi yilni sat tuꞌ,

kaw yinh anhe chito nahul yu tzet yil-lax sat.

25 Wal mak mach chito nahul Istzotiꞌ Komam Dios yu,

to kaw chako yinh iskꞌul yinh huneꞌ tzet chabꞌe tuꞌ kat isyijeni,

kaw saqꞌal yet;

haꞌ Istzotiꞌ Komam tuꞌ chexbꞌejtzonilo yul isqꞌabꞌ ismachiswalilal.

26 Ta ay hunu mak yijem yinh tzet chal Komam Dios yalni,

yaj ta mach chaqꞌ kachaꞌ istiꞌ yinh istxꞌojal,

haꞌ huneꞌ anma tuꞌ chiyaqꞌ subꞌchaho isbꞌa ischukil.

Hak tuꞌ xin nabꞌanhe chala tato yijem yinh tzet chal Komam Dios.

27 Yaj ta chonhkolwa yinh nixhte mebꞌaꞌ unin,

yebꞌ yinh ebꞌix hunix ayko yinh ej isyaꞌtajil,

kat xin kopohnilo kobꞌa yinh istxꞌojal yul sat yibꞌanhqꞌinal tiꞌ,

wal tuꞌ kaw lanhan koyijen tzet chal Komam Dios Mame.