3 Jalaꞌwe kꞌul-la tzotiꞌ yinh Komam Dios,

ismam Komam Jesucristo.

Yu iskꞌulchꞌanil iskꞌul Komam Dios jinh,

yuxin konyaqꞌ pitzkꞌaho yinh iskayelal,

yunhe iskawxi kokꞌul kochahni koqꞌinal mach istanhbꞌal.

Huneꞌ tiꞌ xatzujcha ju yuto itzitzbꞌikanh Komam Jesucristo xol kamom yu yip Komam Dios.

4 Xayaqꞌ Komam Dios koqꞌinal yu kochahni komajul kꞌubꞌabꞌil jet yu Komam yul satkanh.

Huneꞌ tuꞌ,

mach chiꞌetaxtoj,

machi tzꞌil chihitziko yinh,

yebꞌpaxo xin maxhtikꞌa chitajtoj.

5 Yuto xajayto yul janma yinh Komam Dios,

yuxin chonhiskꞌubꞌa Komam yu yip yunhe istzujcha apno kokolbꞌanil tꞌinhanxa ye yu Komam,

huneꞌ chiyelax yet chꞌapni islahobꞌal tzꞌayik.

6 Yu huneꞌ tiꞌ,

yuxin kaw chonhtzalahi,

waxanhka yilal jekꞌ yinh txꞌiꞌal ej isyaꞌtajil hanikꞌoxa tiempohal.

7 Hakaꞌ chꞌen oro,

kaw yilal chiꞌilwelax chꞌen xol qꞌa qꞌaꞌ yunhe yilchaloj ta kaw kꞌul chꞌen maka ta mach kꞌulo chꞌen.

Hakonhpax tuꞌ,

kaw yilal chonhilwelaxi,

kat yilchaloj tato kaw yeli ayko janma yinh Komam Dios maka mach xin.

Hayet chitecha ilwebꞌal ju xin yu ayko janma yinh Komam,

ekꞌbꞌal yelapno huneꞌ tuꞌ yul sat Komam Dios sata chꞌen oro chiꞌilwelax tuꞌ,

waxanhka xin chitanhilo chꞌen.

Yaj ta chitecha ilwebꞌal ju,

kaw chitzala Komam Jesucristo jinh yet chihul Komam,

kat yaqꞌni Komam issaqꞌalil iskꞌul jet,

yebꞌ kaw ay yelapno chonhelkaniko yul sat.

8 Waxanhka matxa heyil Komam Jesucristo,

yajaꞌ xahan ay Komam heyu.

Waxanhka mach lanhano heyilni,

yajaꞌ cheyayto yul heyanma yinh Komam,

yuxin kaw chextzalakanoj.

Haꞌ huneꞌ hetzalahilal tuꞌ,

kaw kꞌulchꞌankanoj,

machi tzotiꞌ chiqꞌoji yalnilo iskꞌulchꞌanil teyet.

9 Yuto xatzujcha apno hekolbꞌanil heyu yu heyako heyanma yinh Komam.

10 Ebꞌyaꞌ ischejabꞌ Komam Dios ekꞌlena yet payxa,

tzotel ebꞌyaꞌ yinh hanta iskꞌulchꞌanil Komam Dios chaqꞌ jet.

Issayni ebꞌyaꞌ yinh nanhkꞌulal yinh kaw tzet yelapno ye kolbꞌanile tiꞌ.

11 Haꞌ Yespíritu Komam Cristo ayko yinh ebꞌyaꞌ,

haꞌ aqꞌni yohtanhelo ebꞌyaꞌ yinh tzet chu yekꞌyaꞌ yanma Komam Cristo,

yebꞌ xin iskꞌulchꞌanil chihul yet chiyijni isbꞌa tuꞌ.

Haꞌ ebꞌyaꞌ tuꞌ issay ebꞌyaꞌ yilaꞌ mak huneꞌ chal Yespíritu tuꞌ yebꞌ yinh tzet tiempohal chu hunteqꞌan tuꞌ.

12 Yajaꞌ yaqꞌ Komam Dios yohtanhelo ebꞌyaꞌ tato haꞌ hunteqꞌan kuybꞌanil yal ebꞌyaꞌ tuꞌ,

mach yeto ebꞌyaꞌ yehi;

to jet ye hanhonh tiꞌ.

Tinanh xin,

xaꞌaqꞌlax heyohtanhelo yu ebꞌyaꞌ pujbꞌanikꞌo Tzotiꞌ yet kolbꞌanile yu ishelanil Komam Espíritu Santo alaxti yul satkanh.

¡Haꞌ hunteqꞌan tuꞌ xin,

kaw yoche ebꞌnaj ángel yilaꞌ!

13 Yuxin helanojabꞌ cheyute hebꞌa,

txumwe yinh tzet chewatxꞌe,

kawxojabꞌ hekꞌul yinh iskꞌulchꞌanil iskꞌul Komam Dios chaqꞌ jet yet chul Komam Jesucristo hunelxa.

14 Hex tiꞌ,

yuninalxa Komam Dios heyehi kaw yijem hex tet Komam yuxin matxa chexekꞌ yinh heyochento tzettaj txꞌoj hewatxꞌe yet yalanhtokanoj,

yet maxhto cheyohtanhelo Komam Dios.

15 Wal xin ekꞌanhwe yinh sunil iskꞌulal,

machojabꞌ nino istxꞌojal chewatxꞌe,

yuto Komam Dios kexawtenheni,

kaw machi nichꞌano istxꞌojal yinh Komam.

16 Yuto chal Komam yul Yum hakaꞌ tiꞌ:

«Ekꞌanhwe yinh iskꞌulal,

machojabꞌ nino istxꞌojal teyinh yuto hanintiꞌan machi nichꞌano istxꞌojal winhan,»^a

xhi Komam.

17 Haꞌ Komam Dios tuꞌ,

chiꞌilni tzet chiꞌeliko hunun anma hatatikꞌa tzet chiswatxꞌe.

Kaw lahan chiꞌilchati anma yu Komam,

machi hunu tiꞌ chebꞌaꞌto Komam ismul.

Yuxin tato chijal Komam Dios Komamoj,

ayojabꞌ yelapno Komam yul kosat yulbꞌal ayonhtokꞌo yul sat yibꞌanhqꞌinal tiꞌ.

18 Komam Dios xakonhiskolilo yinh huneꞌ kobꞌeybꞌal matzet chaliloj,

huneꞌ kochah tet komam komiꞌ.

Johtaj ta kokolbꞌanil mach loqꞌbꞌilo yu tzet chitanhiloj yul sat yibꞌanhqꞌinal tiꞌ hakaꞌ chꞌen oro yebꞌ chꞌen plata.

19 Wal xin haꞌ ischikꞌil Komam Jesucristo kaw niman yelapnoj,

haꞌ qꞌoji isloqꞌni kokolbꞌanil.

Aqꞌlaxkamo Komam yu yok xahanbꞌalil,

hakaꞌ hunu noꞌ meꞌ machi nichꞌano isyabꞌil,

machipaxo istzakaꞌil.

20 Nabꞌilxatikꞌa huneꞌ tiꞌ yinh Komam yet maxhto chiwatxꞌi huneꞌ yul sat yibꞌanhqꞌinal tiꞌ yu Komam Dios.

Yaj wal tinanh xin xaꞌisyekanh isbꞌa Komam Jesucristo yinh islahobꞌal tzꞌayik tiꞌ yu yaqꞌlax iskꞌulal jet.

21 Yu Komam Jesucristo,

yuxin xajako janma yinh Komam Dios.

Haꞌ Komam Dios aqꞌni itzitzbꞌokanh Komam Jesucristo xol anma kamom,

yaqꞌni iskꞌulchꞌanil iskꞌul tet.

Yu Komam Jesús tuꞌ,

yuxin chijako janma yinh Komam Dios,

kat xin iskawxipaxo kokꞌul yinh Komam.

22 Wal tinanh xin yu xakoyije huneꞌ kuybꞌanil kaw yel chala,

yuxin sajxa ye janma yu Komam Dios.

Hak tuꞌ xin xahan chijil ebꞌnaj juxhtaj yebꞌ ebꞌix janabꞌ,

yuxin kaw yilal koxahannhen kobꞌa yinh sunil janma yebꞌ xin yinh sunil jip.

23 Yuto pitzkꞌanajonhxa yet iskayel yaj mach yinho komam komiꞌ kambꞌehal yehi,

wal xin yu Istzotiꞌ Komam Dios pitzkꞌanajonhxa.

Yuto haꞌ Istzotiꞌ Komam kaw itzitz,

aynhetikꞌa yinh sunilbꞌal tiempo.

24 Yuto chiyal yul Yum Komam Dios hakaꞌ tiꞌ: