3 Yu ishelanil yip Komam Dios,

yuxin xayaqꞌ Komam sunil tzet chiꞌokniko ju yunhe ay koqꞌinal mach istanhbꞌal,

yebꞌ xin yu koyijen tzet chal Komam.

Yaqꞌ Komam huneꞌ tuꞌ jet yet johtanhenh Komam Jesucristo,

Komam konhawten yu ishelanil yebꞌ yu iskꞌulchꞌanil isye Komam jet.

4 Hak tuꞌ xin yu yaqꞌni Komam yaltebꞌanil jet,

hunteqꞌan tzet kaw kꞌulchꞌankanoj yebꞌ kaw ay yelapno yehi.

Yunhe yu hunteqꞌan tzet yalte Komam tuꞌ,

yuxin chikochah koqꞌinal yinh isqꞌinal Komam,

hak tuꞌ xin yu kokolchalo yul isqꞌabꞌ isyahbꞌetajil ay yul sat yibꞌanhqꞌinal tiꞌ yu istxꞌojal yanma anma.

5 Yuxin maxhnhehojabꞌtaj janiko janma yinh Komam,

wal xin kaw yilal janiko yinh kokꞌul kowatxꞌen kobꞌeybꞌal.

Kaw yilalpaxo kochꞌibꞌ yinh ishelanil konabꞌal yinh Komam Dios,

6 yebꞌ kokachni kobꞌa yinh tzet mach kꞌuloj,

yebꞌ niman chijute kokꞌul jaqꞌni techaho isyaꞌtajil,

yebꞌ koyijen tet Komam Dios.

7 Chikoye iskꞌulchꞌanil kokꞌul yinh ebꞌnaj juxhtaj yebꞌ ebꞌix janabꞌ yebꞌ xin koxahannhen anma sunil.

8 Ta chiꞌilchalo hunteqꞌan tiꞌ jinh,

yebꞌ ta lanhan kochꞌibꞌ yinh,

ay chonhokniko yul sat Komam Dios chal tuꞌ,

mach nabꞌnheho johtanhelo Komam Jesucristo Jahawil.

9 Yaj wal mak mach chiꞌilchalo hunteqꞌan tiꞌ yinh xin,

lahan hakaꞌtikꞌa mach chu ismujlito nahat,

maka xin mach chu yilni.

Xaꞌisnahulnhetoj tato txꞌahbꞌilxalo hanta ismul ayko yinh yet yalanhto tuꞌ.

10 Yuxin wal tinanh wuxhtaj,

wanabꞌ,

xakexyawte Komam Dios,

yebꞌ xakexissikꞌilo Komam yetoj,

yuxin lahweko helinhbꞌan hebꞌa yinh hunteqꞌan tiꞌ.

Ta hak tuꞌ chewatxꞌe,

maxhtikꞌa chexaykꞌayi.

11 Hak tuꞌ xin chꞌaqꞌlax sunil iskꞌulchꞌanil Komam jet,

kat jokkano yinh hunelnhe yul isqꞌabꞌ Komam Jesucristo Jahawil,

Kokolomalpaxoj.

12 Yuxin ayinnhetikꞌakojan walnihan teyet yunhe henaniti hunteqꞌan kuybꞌanile tiꞌ,

waxanhka kaw yeli heyohtaj yebꞌ xin linhan hex yinh istꞌinhanil.

13 Yaqꞌ isbꞌa itzitz intohan,

haꞌ huneꞌ chintxuman tinanh,

kaw yilal kexwiptzenkanojan yinh hunteqꞌan kuybꞌanile tiꞌ,

yunhe mach chikꞌayto heyu.

14 Yuto xayaqꞌ Komam Jesucristo Jahawil intxumulojan tato matxa nimano tzꞌayik ayinikꞌojan yul sat yibꞌanhqꞌinal tiꞌ.

15 Yuxin chiwako yinh inkꞌulan intzꞌibꞌnhenkantojan hunteqꞌan kuybꞌanile tiꞌ teyet,

hak tuꞌ xin chenati yinh sunilbꞌal tiempo yetxa kinelan yul sat yibꞌanhqꞌinal tiꞌ.

16 Huneꞌ kuybꞌanile aqꞌbꞌilxa teyet juhanh yinh tzet yelapno ye yip Komam Jesucristo,

yebꞌ xin yinh tzet chu yul Komam hunelxa,

kaw mach ikꞌtiꞌoj,

mach tonhe nabꞌilkanh juhanh.

Wal xin haꞌ kaw hanhonhanh jilanh yu isbꞌaqꞌ kosatanh isqꞌaqꞌal yip Komam.

17 Jilanh yet yaniko Komam Dios Mame ismay Komam Jesucristo,

ishelni isbꞌa yil-lax yinh Komam yet yelayti yaw xol moyan,

yalni hakaꞌ tiꞌ:

«Haꞌ naj tiꞌ Inkꞌaholan,

kaw xahan ay wuhan,

kaw chintzalahan yinh naj,»

xhihaytij.

18 Hanhkawonhanh jabꞌehanh hunteqꞌan tzotiꞌ ayilo yul satkanh tuꞌ yet ayonhanh yebꞌ Komam Jesús iswiꞌ huneꞌ witz kaw txahul.^a

19 Haꞌ huneꞌ tuꞌ xin,

kaw kam chꞌaqꞌni istꞌinhanil Istzotiꞌ Komam tzꞌibꞌnhebꞌilkano yu ebꞌyaꞌ ischejabꞌ Komam yet payxa.

Yuxin kaw kꞌul yuto cheyako heyanma hekuyni hunteqꞌan tzotiꞌ tuꞌ,

yuto hakaꞌ hunu lámpara saqꞌal ismujli xol qꞌejholo masanto yet lanhanxa issajbꞌiloj yet chꞌahilo sajbꞌes,

hak tuꞌ xin yehi.

Haꞌ huneꞌ tuꞌ chimujli yinh heyanma masanto chisajbꞌiloj.

Haꞌ chal yelapno huneꞌ tuꞌ,

haꞌ ton yet chul Komam Cristo.

20 Haꞌ ebꞌyaꞌ ischejabꞌ Komam Dios yalanhtokanoj istzꞌibꞌnhenkano ebꞌyaꞌ yul Yum Komam yinh hunteqꞌan tzet kaw yilal yuli.

Yaj kaw yilal johtanheniloj tato machi hunu mak chisje istxumni yul yet ischukil yinh tzet chiyal yelapno hunteqꞌan tzet tzꞌibꞌnhebꞌilkano tuꞌ.

21 Yuto haꞌ ebꞌyaꞌ ischejabꞌ Komam tuꞌ kaw machi hunu tzet ye tuꞌ isnahti ebꞌyaꞌ yul yet ischukil yet istzꞌibꞌnhenkanoj,

wal xin haꞌ Komam Dios aqꞌni yohtanhelo ebꞌyaꞌ yu Komam Espíritu Santo.