Hunteqꞌan kuybꞌanile chiꞌaqꞌlax tet anma ayxako yul isqꞌabꞌ Komam
5
Tinanh xin chiwaltojan hunteqꞌan chejbꞌanile tiꞌ teyet hex anciano hex xol ebꞌnaj uxhtaje yul hunun konhobꞌ,
yuto hanintiꞌan anciano inpaxojan hakaꞌ hex tuꞌ.
Kaw wilan yaqꞌlen Komam Cristo isyaꞌtajil,
yuxin ay waqꞌni kabꞌo hinbꞌahan inchahnihan iskꞌulchꞌanil teyintaj,
huneꞌ chito isyebꞌalo isbꞌa.
2 Tanhewe makta yetxa Komam Dios yehi,
aqꞌbꞌiliko yul heqꞌabꞌ yu hetanheni,
yuto hakaꞌ ismeꞌ Komam Dios yehi.
Munlahanhwe yinh sunil heyanma,
hakaꞌ choche iskꞌul Komam Dios,
machojabꞌ yinh lanhbꞌilal,
yebꞌ mach yunhe heyiqꞌni melyu yuxin chexmunlahi.
Munlahanhwe yinh tzalahilal,
elojabꞌ yinh heyanma hewatxꞌeni.
3 Mach yahawo cheyute hebꞌa yinh makta chiꞌaqꞌlax hetanhe.
Wal xin yewe kꞌul-la bꞌeybꞌale tet,
haxinwal kaw kꞌul chutepaxo isbꞌeybꞌal.
4 Hak tuꞌ xin hayet chihul Komam iswiꞌehal jinh hanhonh tanhem anmahonh tiꞌ,
kat kochahni ispaj huneꞌ kaw nanxa yok iskꞌulchꞌanil,
huneꞌ tuꞌ machi bꞌaqꞌinhal chilahwi.
5 Hakexpax tuꞌ hex tzehtaj,
yijem cheyute hebꞌa tet ebꞌyaꞌ anciano.
Chewchotanhehojabꞌ cheyute hebꞌa yet chexkolwa teyinh hunun hex,
yuto chal yul Yum Komam Dios hakaꞌ tiꞌ:
«Chispahto Komam makta nime winaj chute isbꞌa,
walpaxo mak chiyo isbꞌa xin,
chaqꞌ Komam iskꞌulchꞌanil iskꞌul tet,»a
xhihayoj.
6 Wal xin iweyo hebꞌa yalanh yip Komam Dios,
hak tuꞌ xin chexyikanh Komam yet chꞌapni istiempohal.
7 Sunil hebꞌiskꞌulal chꞌok yachno yinh heyanma,
aweko yul isqꞌabꞌ Komam yuto Komam aynhetikꞌako yinh iskꞌul konhyilni.
8 Kaw helan cheyute hebꞌa,
majwahanhwej yuto haꞌ naj matzwalil,
naj ayko ishowal jinh,
lahan naj hakaꞌ hunu noꞌ bꞌalam kaw chꞌel yaw yet chꞌekꞌ saywal yinh noꞌ meꞌ yu iskꞌuxnaytoj;
hak tuꞌ yekꞌ naj saywal jinh.
9 Yuxin lahweko heyaniko heyanma yinh Komam,
hak tuꞌ xin chu hepahnito naj.
Yuto heyohtaj tato haꞌ ebꞌnaj juxhta yinh Komam pujanto sunil yul sat yibꞌanhqꞌinal tiꞌ,
lahan isyaꞌtajil chil ebꞌnaj hakaꞌ hex tuꞌ.
10 Yajaꞌ hayet chilahwi jabꞌen isyaꞌtajil hanikꞌ tiempohal tiꞌ,
kaw tzꞌajan chonhelkaniko yu Komam Dios,
kat xin yaqꞌni Komam jip yebꞌ kolinhbꞌan kobꞌa,
yebꞌ kaw tꞌinhan chonhyute Komam awtenhehonh yetbꞌihoj;
yaqꞌnikano iskꞌulal iskꞌul jet yinh hunelnhe,
yuto hunxa je yebꞌ Komam Jesucristo.
11 Hal-laxojabꞌi ta kaw niman yelapno isbꞌi Komam Dios yinh sunilbꞌal tiempo.
¡Hakojabꞌ tuꞌ!
Chihal-laxtoj ta chil isbꞌa ebꞌnaj juxhta yinh iskawil
12 Huneꞌ incartahan chiwatojan teyet tiꞌ,
haꞌ juxhta Silvano chiꞌinitoj.
Yaꞌ juxhta tiꞌ kaw yijem yaꞌ sikꞌlebꞌil yul insatan.
Hayebꞌ tzotiꞌ chiwaltotiꞌan haꞌ chexiptzeni,
yebꞌ xin chiwaltojan teyet tato xahechah iskꞌulchꞌanil iskꞌul Komam Dios.
Linhbꞌawe hebꞌa yinh iskꞌulchꞌanil iskꞌul Komam.
13 Ebꞌnaj juxhta ayxako yul isqꞌabꞌ Komam ay yul ismajul Babilonia sikꞌbꞌilxalo yu Komam Dios,
hakaꞌ yu kexissikꞌniloj,
chalto ebꞌnaj ta cheyil hebꞌa yinh hekawil.
Yebꞌpaxo yaꞌ Marcos,
yaꞌ inkꞌaholan yinh isbꞌi Komam,
chalpaxto yaꞌ ta cheyil hebꞌa yinh hekawil.
14 Qꞌambꞌewe hanikꞌ heye hunun hex yuto heyuxhtaxa hebꞌa.
Ayojabꞌ aqꞌankꞌulal yul heyanma hex ayexxako yul isqꞌabꞌ Komam Jesucristo.
¡Hakojabꞌ tuꞌ!