Munlajonhwe hakaꞌtikꞌa kohelanil aqꞌbꞌil yu Komam Dios
4
Yuxin hakaꞌ yu yabꞌen Komam Cristo isyaꞌtajil yinh isnimanil yet iskami,
hak tuꞌ xin chu jabꞌen isyaꞌtajil,
yuto xakonhkam yinta Komam hanhonh tiꞌ;
haꞌ ebꞌnaj kamnaxa,
matxa chako ismul ebꞌnaj.
2 Hakojabꞌ tuꞌ chijute kobꞌa,
koyijewe tzet choche Komam Dios yulbꞌal yet ayonh yul sat yibꞌanhqꞌinal tiꞌ.
Matxahojabꞌ chikowatxꞌe hakaꞌ tzet chiyoche konimanil.
3 Hayet yalanhto niman tiempo kexekꞌ hewatxꞌeꞌ tzet chiswatxꞌe anma mach ohtanheho Komam Dios,
wal xin kanojabꞌkano hunteqꞌan tuꞌ tinanh.
Yet yalanhto tuꞌ,
hanhechꞌan istxꞌojal chewatxꞌe,
cheyaqꞌni yubꞌ tzet yoche heyanma,
chexekꞌpaxo yinh ukꞌu teꞌ,
cheyekꞌtzen nimeta qꞌinh nanxa islowi,
kaw niman ukꞌe cheyukꞌkanoj.
Cheyinipaxayo hebꞌa tet ej tioxh,
huneꞌ tuꞌ kaw chisyah Komam Dios.
4 Haꞌ ebꞌnaj mach ohtanheho Komam Dios tuꞌ,
chikꞌay iskꞌul ebꞌnaj yuto matxa chebꞌeybꞌalnhe hunteqꞌan istxꞌojal chiswatxꞌe ebꞌnaj,
yuxin chibꞌuchwa ebꞌnaj teyinh.
5 Yaj wal hunteqꞌan anma tuꞌ,
yilal istaqꞌwikanh yinh ismul yet chiꞌilchati yu Komam aqꞌbꞌilxa ismunil yilni tzet chꞌeliko mak itzitz yebꞌ mak kamnaxa.
6 Wal xin hal-lax istzotiꞌal kolbꞌanile tet anma kamnaxa tuꞌ.
Waxanhka xakami hakaꞌ iskam anma yul sat yibꞌanhqꞌinal tiꞌ yet yilchati yu Komam Dios,
yajaꞌ yet yabꞌen huneꞌ kolbꞌanile,
ischahnikano yanma anma tuꞌ isqꞌinal hakaꞌtikꞌa isqꞌinal Komam Dios.
7 Lanhanxa yul istiempohal bꞌay chitanhilo sunil tzet ye tuꞌ,
yuxin helanojabꞌ cheyute hebꞌa,
itzꞌatnhehojabꞌ henani hetxahli.
8 Yebꞌ xin ay hunxa kaw yilal yehi,
haꞌ hexahannhen hebꞌa yinh sunil heyanma,
yuto yet xahan chijil kobꞌa chikonahulnheto txꞌiꞌal ismul jet anmahil.
9 Hayet chꞌapni hunu juxhtaj maka hunu janabꞌ isqꞌanaꞌ bꞌay chiwayi,
sunilojabꞌ heyanma chechahni,
machojabꞌ chexok tzotelo yinh.
10 Aqꞌwe chejaꞌ hebꞌa teyet hunun hex hatatikꞌa tzet munilal aqꞌbꞌilxa teyet yu Komam Dios.
Kꞌul cheyute hebꞌa yinh hemunil aqꞌbꞌilxa teyet yuto nananta hemunil aqꞌbꞌil yu iskꞌulchꞌanil iskꞌul Komam.
11 Haꞌ mak chalnikꞌo Istzotiꞌ Komam Dios xol anma,
yilalojabꞌ haꞌ kaw istꞌinhanil Istzotiꞌ Komam chiyala,
yebꞌ xin haꞌ mak chaqꞌ chejaꞌ isbꞌa texol,
iswatxꞌehojabꞌ yinh sunil yip aqꞌbꞌil yu Komam.
Hak tuꞌ xin chihal-lax kꞌul-la tzotiꞌ yinh Komam Dios heyu yu tzet iswatxꞌe Komam Jesucristo.
¡Hal-laxojabꞌi ta kaw niman yelapno ye Komam Jesucristo!
Hanhe Komam yet ay yalaxiko ismay yebꞌ yip yinh sunilbꞌal tiempo.
¡Hakojabꞌ tuꞌ!
Chꞌekꞌyaꞌ janma yuto ayonhxako yul isqꞌabꞌ Komam
12 Wuxhtaj wanabꞌ hex xahan ay wuhan,
mach chikꞌay hekꞌul yu hunteqꞌan isyaꞌtajil xahul teyibꞌanh,
tajkato chenah tato machi bꞌay wal istitiko hunteqꞌan tuꞌ.
13 Wal xin,
kaw tzalahanhwej,
yuto haꞌ hunex cheyabꞌe isyaꞌtajil hakaꞌ yaqꞌle Komam Cristo.
Yuxin hayet chul Komam yebꞌ isqꞌaqꞌal yip,
kaw chiyiqꞌkanokanh yip tzalahilal yul heyanma.
14 Ta chibꞌuchwa anma teyinh yuto ayexxako yul isqꞌabꞌ Komam Cristo,
kaw kꞌul heyet,
yuto Yespíritu Komam Dios kaw niman yelapno ayxako teyinh.
Haꞌ anma tuꞌ,
chal tzotiꞌ txꞌoj yinh Komam,
wal hexpaxo xin cheyal kꞌul-la tzotiꞌ yinh Komam.
15 Ta ay hex chꞌekꞌyaꞌ heyanma,
yajaꞌ tanhe mach yuho hunu potxꞌwal,
maka xin yu eleqꞌ,
makato yu hunu mule kaw txꞌoj,
maka yu heyaniko hebꞌa xol hunu tzet ye tuꞌ mach cheyok yinh.
16 Wal xin ta cheyil isyaꞌtajil yu ayexxako yul isqꞌabꞌ Komam Cristo,
mach chextxꞌixwi,
halwe kꞌul-la tzotiꞌ yinh Komam Dios yuto yetxa Cristo heyehi.
17 Yuto xaꞌichiko istiempohal bꞌay chiꞌil-lax tzet chiꞌeliko sunil anma,
yajaꞌ to jinh hanhonh ayonhxako yul isqꞌabꞌ Komam Dios chiꞌichiko bꞌabꞌel,
yuxin ta jinh chiꞌichikoj,
¿tzettaxka xin chꞌelpaxiko anma mach chiyijen Istzotiꞌ Komam yet kolbꞌanile?
18 Ta kaw yaꞌta istzujcha kolbꞌanile yu mak kꞌulxa yul sat Komam Dios,
hajxam anma kaw machi yelapno Komam yul sat,
yebꞌ anma kaw txꞌoj isbꞌeybꞌal.
19 Yuxin hayet chihul isyaꞌtajil jibꞌanh,
yaj ta hak tuꞌ chꞌel yinh iskꞌul Komam Dios,
kaw yilal janiko janma yinh Komam,
machojabꞌ chikobꞌej kowatxꞌen iskꞌulal,
yuto haꞌ Komam tuꞌ watxꞌenhehonh,
kaw xin chiyij isbꞌa yinh tzet chiyala.