Kuybꞌanile yinh anma mohyomxa
3
Hakpax tuꞌ hex ixale hex tiꞌ,
yijem cheyute hebꞌa tet heyichamil,
haxinwal ta ay hex tiꞌ maxhto chako yanma heyichamil yinh Istzotiꞌ Komam Dios,
chistxum isbꞌa ebꞌnaj heyu,
mach yechto txꞌiꞌal tzet cheyal tet ebꞌnaj.
2 Yuto chiyil ebꞌnaj tato kaw tohol hebꞌeybꞌal,
yebꞌ ta kaw yijem hex.
3 Kꞌulojabꞌ cheyute hebꞌa,
maxhtaj hetzanten hebꞌa yinh loloꞌal hakaꞌ hemamen xil hewiꞌ yinh kaw nanxa islowi,
maka heyaniko heyanma yinh chꞌen ome maka chꞌen uwe kaw aykanh istohol hakaꞌ chꞌen oro,
yebꞌpaxo yinh xilqꞌape kaw aykanh istohol,
yuto maxhtaj hunteqꞌan tuꞌ chexwatxꞌeniko yul sat Komam Dios.
4 Wal xin haꞌojabꞌ iskꞌulchꞌanil heyanma haꞌ cheyil hewatxꞌeꞌ,
haxinwal kaw kꞌulchꞌan hex yul sat Komam Dios.
Haꞌ huneꞌ hekꞌulchꞌanil tuꞌ,
haꞌ ton iskꞌulal hekꞌul yebꞌ aqꞌankꞌulal yul heyanma,
haꞌ huneꞌ tuꞌ machi bꞌaqꞌinhal chiꞌetaxtoj,
kaw ay yelapno ye yul sat Komam Dios.
5 Hakpax tuꞌ hunteqꞌan ebꞌix ix yet Komam Dios yet payat,
kaw kꞌulchꞌan yanma ebꞌix yul sat Komam yuto hanhechꞌan Komam yako ebꞌix yipo yanma,
yebꞌ xin kaw yijem yute isbꞌa ebꞌix tet yichamil.
6 Hakaꞌ yaꞌ Sara,
kaw yijem yute isbꞌa tet yaꞌ Abraham,
yalni yaꞌ yinh yaꞌ hakaꞌ tiꞌ:
«Mam,»
xhi yaꞌ yinh yaꞌ.
Yuxin kꞌul cheyute henabꞌal hex ixale hex tiꞌ.
Machojabꞌ hunu tzet ye tuꞌ bꞌay chexxiwi.
Ta chewatxꞌe hakaꞌ tuꞌ lahan henabꞌal hakaꞌ yaꞌ Sara.
7 Hakexpax tuꞌ hex ichamile hex tiꞌ,
kꞌul cheyute heyanma yinh heyixal.
Ohtanheweloj ta lahan ebꞌix hakaꞌ hunu vaso nabꞌ ispohi.
Ayojabꞌ yelapno ye ebꞌix yul hesat yuto lahan koqꞌinal chikochah tet Komam yebꞌ ebꞌix.
Yuxin kꞌul cheyute hebꞌa yinh ebꞌix yunhe matzet chꞌok hexolbꞌal yet chexok txahlo tet Komam.
Ay bꞌay chijil isyaꞌtajil yu kowatxꞌen iskꞌulal
8 Yebꞌpaxo xin chiwaltojan hunxa tiꞌ teyet,
hunxanhehojabꞌ cheyute henabꞌal hesunil.
Kꞌulchꞌanojabꞌ cheyute hekꞌul,
xahanojabꞌ cheyil hebꞌa hunun hex yuto heyuxhtaxa hebꞌa,
heyanabꞌxapaxo ebꞌix ix yinh Komam.
Tzꞌayojabꞌ hekꞌul teyinh hunun hex,
chewchotanhe cheyute hebꞌa.
9 Mach chepajtze txꞌoj tet mak txꞌoj chiswatxꞌe teyinh.
Machika chetzꞌaktiꞌnhe mak chextzꞌaktiꞌnheni,
haꞌ heyet qꞌanwe iskꞌulal Komam Dios yibꞌanh anma,
yuto awtebꞌil hexxa yu Komam yu hechahni iskꞌulchꞌanil iskꞌul.
10 Yuto chal yul Yum Komam hakaꞌ tiꞌ:
«Tato ay mak choche isxahannhe iskawil,
yebꞌ ta choche tzalahilalnhetikꞌa chꞌekꞌ hunun tzꞌayik yilaꞌ,
kaw yilal iskachni istiꞌ,
machojabꞌ chal tzotiꞌ txꞌoj yebꞌ xin leqꞌtiꞌal.
11 Kaw yilal ispohnilo isbꞌa xol istxꞌojal,
kꞌulojabꞌ tzet chiswatxꞌe,
issayaꞌbꞌilo aqꞌankꞌulal haꞌojabꞌnhetikꞌa xin chiswatxꞌe.
12 Yuto Komam Dios Jahawil,
chitanhen mak kaw kꞌul isbꞌeybꞌal,
kat xin yabꞌenpaxo Komam istxah.
Walpaxo anma machiswalil chiyute isbꞌa xin,
chiskaj Komam,»a
xhihayoj.
13 Ta hanhe iskꞌulal chesaya,
kat hebꞌelwi yinh kaw kꞌul,
¿maktikꞌa chiꞌuteniko istxꞌojal teyinh?
Machi maka.
14 Yaj tato cheyabꞌe isyaꞌtajil yu iskꞌulal chebꞌeybꞌalnhe ¡kaw saqꞌal heyet!
yuxin mach chexxiw tet hunuxa mak anmahil.
Mach cheyaqꞌ kabꞌkonokanh heyanma.
15 Wal xin aqꞌwe tzalaho heyanma yinh Komam Cristo Jahawil,
ayojabꞌ yelapno Komam yul hesat.
Helan cheyute hebꞌa hetaqꞌwi tet mak chiqꞌambꞌen teyet yinh kuybꞌanile bꞌay ayko heyanma.
Chewchotanhehojabꞌ chu heyalni tet,
yebꞌ xin yinh aqꞌankꞌulal.
16 Yuxin kꞌul cheyute hebꞌa,
hak tuꞌ xin aqꞌankꞌulalnhetikꞌa ye henabꞌal,
haxinwal makta txꞌoj istzotel teyinh yu iskꞌulal chewatxꞌe yu ayexxako yinh Komam Cristo,
chitxꞌixwikanh yinh leqꞌtiꞌal chal teyinh.
17 Kaw kꞌul ta yu kowatxꞌen iskꞌulal yuxin chiꞌekꞌyaꞌ janma yaj ta hak tuꞌ chꞌel yinh iskꞌul Komam Dios,
sata ta chꞌekꞌyaꞌ janma yu kowatxꞌen istxꞌojal,
nabꞌnhe huneꞌ tuꞌ.
18 Yuto hak tuꞌ yu iskam Komam Cristo istohlan komul yinh hunelnhe.
Kaw kꞌul Komam yaj ekꞌyaꞌ yanma jinh hanhonh mulumonh tiꞌ yu konhyinito Komam tet Komam Dios.
Haꞌ isnimanil Komam kami,
yajaꞌ yanma Komam machi kami.
19 Hayet kamom Komam tuꞌ,
bꞌeykꞌo yanma Komam yalaꞌ Istzotiꞌ Komam Dios tet anma kamom majan xol isyaꞌtajil.
20 Haꞌ hunteqꞌan anma tuꞌ,
manhkꞌon tzet yal Komam Dios yet payxa yulbꞌal istiempohal yaꞌ Noé.
Yet huneꞌ tiempohal tuꞌ kaw niman yute iskꞌul Komam yinh anma yet yechman iswatxꞌen yaꞌ Noé teꞌ barco,
yaj xin waxajwanhnhe anma kolchalo xol ha haꞌ yul teꞌ barco.
21 Haꞌ huneꞌ ha haꞌ tuꞌ yechelnhe iqꞌbꞌil yu haꞌ tato chonhkolchahi.
Haꞌ yelapno ye hun tuꞌ,
chonhkolchahi,
maxhtaj yu yel istzꞌilal konimanil yu haꞌ,
to hayet chiꞌahkano haꞌ kowiꞌ chikoyeniloj tato kꞌulxa konabꞌal yul sat Komam yuto xaꞌitzitzbꞌikanh Komam Jesucristo.
22 To Komam yul satkanh,
tinanh ayko Komam yinh iswatxꞌqꞌabꞌ Komam Dios.
Haꞌ xin ebꞌnaj ángel yebꞌ hunteqꞌan ay yelapnoj,
yebꞌ hunteqꞌan ay iskanhil yehi,
ayikto yalanh ischejbꞌanil Komam.